អតីតបុគ្គលិកម្នាក់បានអះអាងថាក្រុមហ៊ុន Kim Soo Hyun បានប្រើ Seo Ye Ji ជាពពែរងគ្រោះជំនួស

ការចោទប្រកាន់កន្លងមកជុំវិញក្រុមហ៊ុន Gold Medalist ជាភ្នាក់ងារបច្ចុប្បន្នមានជម្លោះជាមួយគ្រួសារសពតារាសម្តែង Kim Sae Ron បានផ្ទុះឡើងវិញ។ អតីតបុគ្គលិកម្នាក់បានអះអាងថា Seo Ye Ji គឺជាជនរងគ្រោះរបស់ក្រុមហ៊ុន ហើយថា Kim Sae Ron បានដឹងពីព័ត៌មានសំខាន់ៗទាក់ទងនឹងការប្រព្រឹត្តខុសរបស់ទីភ្នាក់ងារនេះ។ បុគ្គលម្នាក់ដែលបកអាក្រាតនេះអះអាងថាជាអតីតបុគ្គលិកក្រុមហ៊ុនកម្សាន្ត Gold Medalist។

អតីតបុគ្គលិកដែលមិនបញ្ចេញអត្តសញ្ញាណនេះបានសរសេរនៅក្នុងផ្នែក comment នៃវីដេអូ YouTube ថា «កាលពីបួនឆ្នាំមុនខ្ញុំបានធ្វើការនៅ Gold Medalist ប៉ុន្តែត្រូវបានបណ្តេញចេញបន្ទាប់ពីបែកធ្លាយព័ត៌មានសំខាន់ៗអំពី Seo Ye Ji ទៅកាន់ប្រព័ន្ធផ្សព្វផ្សាយចំនួនពីរ។ ទោះជាយ៉ាងណាក៏ដោយ អ្នកយកព័ត៌មានមិនបានផ្សព្វផ្សាយព័ត៌មាននេះទេ ដោយសារតែ Lee Sa Rang (បងប្អូនជីដូនមួយរបស់ Kim Soo Hyun និងជាស្ថាបនិកទីភ្នាក់ងារ) ណែនាំពួកគេកុំឱ្យធ្វើ ដោយខ្លាចថាវានឹងធ្វើឱ្យខូចកេរ្តិ៍ឈ្មោះរបស់ក្រុមហ៊ុន»។

មានការចោទប្រកាន់បន្ថែមទៀតថា «មានបញ្ហាជាច្រើនដែលបង្កឡើងដោយ Kim Soo Hyun និងបងប្អូនជីដូនមួយរបស់តារាសម្តែងរូបនេះគឺ Lee Sa Rang ប៉ុន្តែ Seo Ye Ji ត្រូវបានគេប្រើប្រាស់ជាខែលរងថ្មបាក់ជាពពែរងគ្រោះជំនួស ហើយមតិអវិជ្ជមានមួយចំនួនអំពីនាងពិតជាមានប្រភពមកពីក្រុមហ៊ុន»។

ប្រភពដដែលនេះបានបញ្ជាក់ផងដែរថា «ក្រុមហ៊ុន Gold Medalist ថែមទាំងបានឱ្យមនុស្សកុហក Seo Ye Ji ទៀតផង។ ការចោទប្រកាន់ថានាងឈ្លើយចំពោះបុគ្គលិកត្រូវបានប្រឌិត ហើយភ្នាក់ងារបានបង់ប្រាក់ឱ្យបុគ្គលដើម្បីផ្សព្វផ្សាយការអះអាងមិនពិតទាំងនេះ។ បុគ្គលិកក្រុមហ៊ុនក៏បានបង្កើតរឿងមិនពិតថានាងបានប្រព្រឹត្តអំពើហិង្សានៅសាលា ហើយលោក Lee Sa Rang បានបញ្ជាឱ្យអ្នកកាសែតផ្សព្វផ្សាយការភូតកុហកទាំងនោះ»។

អតីតបុគ្គលអះអាងទៀតថា Seo Ye Ji បានចុះកុងត្រាជាមួយ Gold Medalist ម្តងទៀត ដោយសារតែនាងជឿជាក់លើ Kim Soo Hyun ប៉ុន្តែចុងក្រោយ នាងត្រូវបានគេកេងប្រវ័ញ្ច ខណៈដែលភ្នាក់ងារទទួលបានប្រាក់ចំណេញ។ អតីតបុគ្គលិករូបនេះក៏បានលើកឡើងពី Kim Sae Ron ដោយបញ្ជាក់ថា «នាងដឹងការពិតសំខាន់ៗ។ ខ្ញុំចង់ផ្ញើសារនេះទៅកាន់ឪពុកម្តាយរបស់នាង៖ ប្រសិនបើអ្នករកឃើញសៀវភៅកំណត់ហេតុពណ៌ផ្កាឈូករបស់ Kim Sae Ron អ្នកនឹងរកឃើញការពិតបន្ថែមទៀតអំពីអ្វីដែលបានកើតឡើងរវាងនាង និង Kim Soo Hyun »។ ចុងក្រោយរូបគេបានសរសេរថា «ឪពុកម្តាយនាងមិនបាច់ព្រួយបារម្ភទេ។ Gold Medalist នឹងលាតត្រដាងខ្លួនដោយមិនដឹងខ្លួន»។

ការអត្ថាធិប្បាយនេះត្រូវបានសរសេរនៅមុនពេល Kim Sae Ron ទទួលមរណភាព។ យោងទៅតាមក្រុមគ្រួសាររបស់នាង នាងបានរក្សាទុកសៀវភៅកំណត់ហេតុជាប្រចាំ ហើយគម្របរបស់វាពិតជាពណ៌ផ្កាឈូក ស្របតាមការអះអាងរបស់អតីតបុគ្គលរូបនោះចេញមកអះអាងបែបនេះមែន។

Seo Ye Ji បានចុះកិច្ចសន្យាផ្តាច់មុខជាមួយក្រុមហ៊ុន Gold Medalist ក្នុងឆ្នាំ ២០១៩ ប៉ុន្តែបានប្រឈមមុខនឹងការរិះគន់យ៉ាងខ្លាំងបន្ទាប់ពីមានភាពចម្រូងចម្រាសជាមួយអតីតមិត្តប្រុស Kim Jung Hyun ។ នាងបានចាកចេញពីក្រុមហ៊ុននៅខែវិច្ឆិកា ឆ្នាំ ២០២៣ ហើយឥឡូវនេះស្ថិតនៅក្រោមភ្នាក់ងារសិល្បករ Sublime ។

ជាមួយនឹងពាក្យចចាមអារ៉ាមដែលភ្ជាប់នាងទៅនឹងទំនាក់ទំនងដែលត្រូវបានចោទប្រកាន់របស់ Kim Soo Hyun និង Kim Sae Ron នោះ Seo Ye Ji បានលើកឡើងដោយផ្ទាល់នូវការរំពឹងទុកនេះ។ នៅថ្ងៃទី ១៣ ខែមីនា នាងបានសរសេរថានាងមិនមាន ទំនាក់ទំនងជាមួយ Kim Soo Hyun ឬបងប្អូនជីដូនមួយរបស់តារាសម្តែងរូបនេះមានឈ្មោះថាLee Sa Rang ទេ៕