ប្លែកតែក៏ម្យ៉ាងដែរសម្រាប់អ្នកខ្វះគូ! សេវាកម្មជួលមិត្តស្រី ឬដៃគូរ កំពុងទទួលការចាប់អារម្មណ៍ខ្លាំងទាំងខ្មែរ និងជនបរទេស

អតីតបេក្ខភាព Top5 Master Chef រដូវកាលទី៣ លោកសុធារិទ្ធ បានធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំង ដោយអំឡុងពេលលោកទៅកម្សាន្តនៅប្រទេសជប៉ុន និងបានជួលនារីជប៉ុនម្នាក់ធ្វើជាមិត្តស្រីរបស់លោកមួយថ្ងៃ។

ផ្ដើមក្បាលដំបូងនៃវីដែអូដែលលោកបានបង្ហោះកាលពីថ្ងៃទី ១១ ខែមិនា ឆ្នាំ២០២៥នេះ លោកបាននិយាយថា លោកមកជប៉ុនលើកនេះដើម្បីជួបសង្សារបស់លោក ដែលការនិយាយបែបនេះបានធ្វើអោយមហាជន និងអ្នកគាំទ្រជាច្រើនភ្ញាក់ផ្អើលជាខ្លាំង ព្រោះតាំងពីដើមមកមិនដែលដឹងថាលោកមានទំនាក់ទំនងស្នេហានោះទេ។

នៅក្នុងវីដេអូដដែលសុធារិទ្ធបានបន្តថា លោកបានជួបមិត្តស្រីរបស់លោកនៅក្នុង Appណាត់ជួបមួយ ហើយនាងមានឈ្មោះថា Erica ដែលតាមពិតទៅលោក និងមិត្តស្រីលោកមិនដែលស្គាល់គ្នាពីមុនមកនោះទេ ហើយការណាត់ជួបរបស់អ្នកទាំង២នេះ គឺដោយសារលោកបានជ្រើសរើសសេវាកកម្មជួលមិត្តស្រី ១ថ្ងៃតាមរយៈApp ណាត់ជួបប៉ុណ្ណោះ។ អ្នកគាំទ្រហាក់មានការចម្លែកចិត្តបន្តិចក្រោយពីបានដឹង ក៏ដោយសារតែពីមុនមកមិនដែលដឹងថាមានសេវាកម្មបែបនេះទាល់តែសោះ។

អ្វីដែលកាន់តែគួរអោយចាប់អារម្មណ៍ គឺក្នុងវីដេអូណាត់ជួបជាមួយមិត្តស្រី ១ ថ្ងៃនោះដែរ លោក សុធារិទ្ធ គ្រាន់តែជូននាងទៅញ៉ាំអាហារ ដើរលេងកម្សាន្ត ជាពិសេសលោកក៏បានចែករំលែកនូវការនិយាយភាសាខ្មែរដល់ Erica ថែមទៀតផង។

លោក សុធារិទ្ធ បានបញ្ជាក់ថា ការជួលមិត្តស្រីជប៉ុន ១ ថ្ងៃនេះ លោកត្រូវចំណាយថ្លៃឈ្នួល ១២០ ដុល្លារ ប៉ុន្តែរាល់ការចំណាយផ្សេងៗ រួមទាំងការសុំថតវីដេអូរបស់នាង គឺលោកជាអ្នកចំណាយដោយខ្លួនឯងបន្ថែមពីលើដូចគ្នា​ និងបន្ទាប់ពីនោះអ្នកទាំង២បានចែកផ្លូវគ្នាត្រឡប់មកវិញធម្មតា៕