រឿងអាស្រូវធំបំផុតក្នុងអាជីពមិនធ្លាប់មានចំពោះតារាសម្តែងកំពូល Kim Soo Hyun ពេលនេះរូបលោកបានបាត់បង់អ្នកគាំទ្រនៅលើបណ្តាញសង្គមរាប់ម៉ឺននាក់ត្រឹមតែមួយប៉ប្រិចភ្នែក ខណៈអ្នកនិយមលេងអ៊ីនធឺណិតកូរ៉េទាមទារម៉ាកយីហោដែលតារារូបនេះផ្សព្វផ្សាយចំនួន១៩ឱ្យធ្វើពហិកា Kim Soo Hyun ។ ទន្ទឹមនឹងនោះក៏មានមហាជនមួយចំនួនព្រួយបារម្ភថាការធ្វើពហិកានេះអាចប្រែ Kim Soo Hyun ទៅជា Lee Sun Kyun ទីពីរ មុនពេលការពិតត្រូវបានបង្ហាញ។
តារាសម្ដែងកូរ៉េខាងត្បូង Kim Soo Hyun ដែលជាតារាមួយរូបដែលទទួលបានការពេញចិត្តបំផុតនិងស៊ីថ្លៃជាងគេប្រចាំប្រទេស ពេលនេះកំពុងស្ថិតនៅក្នុងរឿងអាស្រូវក្តៅគគុក បន្ទាប់ពីការចោទប្រកាន់ពីក្រុមគ្រួសាររបស់អតីតតារាសម្តែង Kim Sae Ron ។ នៅពេលដែលមានការរំពឹងទុកកាន់តែខ្លាំងឡើងទាក់ទងនឹងការជាប់ពាក់ព័ន្ធរបស់លោកនៅក្នុងកាលៈទេសៈដែលនាំទៅដល់ការសោកនាដកម្មរបស់នាង អ្នកនិយមលេងអ៊ីនធឺណិតកូរ៉េកំពុងទាមទារឱ្យម៉ាកយីហោផ្តាច់ទំនាក់ទំនងជាមួយ Kim Soo Hyun ឬប្រឈមមុខនឹងការធ្វើពហិកាយ៉ាងទូលំទូលាយ។ គណនី Instagram របស់ Kim Soo Hyun បានបាត់បង់អ្នកតាមដាន២០០K(២០ម៉ឺននាក់) ត្រឹមរយៈពេលខ្លីដែលជាសញ្ញានៃការធ្វើពហិកាមិនធ្លាប់មានពីមុនមកប្រឆាំងនឹងតារាសម្តែងកំពូលកូរ៉េ។
អ្នកនិយមលេងអ៊ីនធឺណិតកំណត់គោលដៅកិច្ចព្រមព្រៀងទាំង ១៩ របស់ Kim Soo Hyun
ដោយ បច្ចុប្បន្ននេះលោកតំណាងឱ្យម៉ាកល្បីចំនួន ១៩នៅទូទាំងឧស្សាហកម្មផ្សេងៗ រួមទាំងម៉ូត ហិរញ្ញវត្ថុ គ្រឿងសំអាង និងការលក់រាយ។ ជាមួយនឹងរឿងអាស្រូវនេះរបស់ Kim Soo Hyun ឥឡូវនេះត្រូវបានផ្សារភ្ជាប់ទៅនឹងការចោទប្រកាន់ដ៏ធ្ងន់ធ្ងរ អ្នកនិយមលេងអ៊ីនធឺណិតបានអះអាងថា ការបន្តទំនាក់ទំនងរបស់លោកជាមួយម៉ាកទាំងនេះអាចធ្វើឱ្យខូចកេរ្តិ៍ឈ្មោះរបស់ពួកគេ ជាពិសេសស្ថាប័នហិរញ្ញវត្ថុដែលផ្តល់អាទិភាពដល់ភាពគួរឱ្យទុកចិត្ត។ 
អ្នកនិយមលេងអ៊ីនធឺណិតមួយចំនួនថែមទាំងបានស្នើឱ្យកំណត់គោលដៅម៉ាកយីហោអន្តរជាតិដោយសារប្រជាប្រិយភាពរបស់ Kim Soo Hyun នៅក្នុងប្រទេសចិន និងទីផ្សារក្រៅប្រទេសផ្សេងទៀត។ប្រសិនបើម៉ាកយីហោចាប់ផ្តើមផ្តាច់ទំនាក់ទំនង ផលប៉ះពាល់ផ្នែកហិរញ្ញវត្ថុលើលោក Kim Soo Hyun អាចមានច្រើន ដោយតម្លៃនៃការបញ្ចប់កិច្ចសន្យា ការបាត់បង់ការយល់ព្រម និងការធ្លាក់ចុះសក្តានុពលនៃឱកាសជ្រើសរើសនាពេលអនាគត។
ជាមួយគ្នានេះក៏មានមហាជនមួយចំនួនព្រួយបារម្ភថាការធ្វើពហិការនេះអាចប្រែ Kim Soo Hyun ទៅជា Lee Sun Kyun ទីពីរ ហើយបានអំពាវនាវឱ្យគ្រប់គ្នាចៀសវាងការរិះគន់ខ្លាំងៗ មុនពេលការពិតត្រូវបានបង្ហាញ។ អតីតតារាសម្តែង Lee Sun Kyun ត្រូវបានគេប្រទះឃើញស្លាប់ក្នុងរថយន្តកាលពីខែធ្នូ ឆ្នាំ២០២៣ ក្នុងពេលលោកស្ថិតក្រោមការសង្ស័យនៃការប្រើប្រាស់គ្រឿងញៀន ខណៈមុនស្លាប់លោកបានបដិសេធថាមិនបានប្រើប្រាស់ឡើយ។
Kim Soo Hyun មានអាយុ ៣៧ ឆ្នាំរូបនេះបានចូលប្រឡូកក្នុងវិស័យសិល្បៈក្នុងឆ្នាំ ២០០៧ ហើយត្រូវបានជាប់នៅក្នុងរឿងអាស្រូវដ៏ធំបំផុតក្នុងអាជីពរបស់លោកនៅពេលដែលឆាណែលយូធូប Garo Sero Institute ដែលជាគណនីពិសេសក្នុងការរាយការណ៍អំពី «អាថ៌កំបាំង» នៃឧស្សាហកម្មកម្សាន្តកូរ៉េ បានចេញផ្សាយព័ត៌មានថា តារាសម្តែងរូបនេះ «គ្មានបេះដូង ជាមនុស្សកុហក ហើយបានរុញ Kim Sae Ron ដល់កម្រិតស្លាប់»៕
