Meta បារម្ភពីការអភិវឌ្ឍបច្ចេកវិទ្យា AI ខ្លាំងពេកអាចបណ្តាលឱ្យមានគ្រោះថ្នា.ក់ ធ្ងន់ធ្ងរដល់មនុស្សវិញ

ក្រុមហ៊ុនបច្ចេកវិទ្យាលំដាប់ពិភពលោក Meta របស់លោក Mark Zuckerberg បានប្រកាសពីការអនុវត្តគោលនយោបាយថ្មីឈ្មោះ Frontier AI Framework យ៉ាងតឹងរ៉ឹង ដើម្បីគ្រប់គ្រងការអភិវឌ្ឍបច្ចេកវិទ្យា AI និងការពារការយកបច្ចេកវិទ្យាទំនើបទៅប្រើប្រាស់ពុំត្រឹមត្រូវធ្វើឱ្យមានគ្រោះថ្នា.ក់ ដល់សង្គម ។ Frontier AI Framework នឹងបែងចែកប្រព័ន្ធ AI ជា២ប្រភេទតាមកម្រិតគ្រោះថ្នាក់ រួមមាន ៖ High Risk និង Critical Risk ។

ក្រុមហ៊ុន Meta បញ្ជាក់ថា ការវាយតម្លៃគ្រោះថ្នាក់របស់ប្រព័ន្ធបច្ចេកវិទ្យា AI នឹងផ្តោតលើកត្តាជាច្រើន ព្រមទាំងសក្តានុពលនៃប្រព័ន្ធបង្កគ្រោះថ្នាក់, ការយក AI ទៅប្រើប្រាស់ពុំត្រឹមត្រូវ និងផលប៉ះពាល់អាចកើតឡើងក្នុងសង្គម ។ ការវាយតម្លៃគ្រោះថ្នាក់នឹងធ្វើឡើងដោយក្រុមអ្នកស្រាវជ្រាវទាំងក្នុង និងក្រៅក្រុមហ៊ុន ។

សម្រាប់ប្រព័ន្ធ AI ដែលត្រូវវាយតម្លៃថា ស្ថិតក្នុងប្រភេទ High Risk គឺ Meta នឹងដាក់កំណត់ការចូលប្រើប្រាស់ និងពុំបង្ហាញជាសាធារណៈ រហូតដល់ Meta អាចកាត់បន្ថយគ្រោះថ្នាក់បាន ។ រីឯប្រព័ន្ធ AI ស្ថិតក្នុងប្រភេទ Critical Risk គឺ Meta នឹងអនុវត្តវិធានការផ្តល់សុវត្ថិភាពយ៉ាងតឹងរ៉ឹងដើម្បីការពារការបែកធ្លាយ ឬអាចបញ្ឈប់ការអភិវឌ្ឍ AI រហូតដល់ Meta ជឿជាក់ថា ប្រព័ន្ធ AI គ្មានគ្រោះថ្នាក់ ។

ការប្រកាសនយោបាយថ្មី Frontier AI Framework ដើម្បីគ្រប់គ្រងបច្ចេកវិទ្យា AI របស់ Meta បង្ហាញថា ក្រុមហ៊ុនបារម្ភពីគ្រោះថ្នាក់អាចកើតឡើងដោយសារការអភិវឌ្ឍ AI ខ្លាំងពេក ហើយក្រុមហ៊ុនមានគោលបំណងទទួលខុសត្រូវដល់សង្គម ដោយកំណត់វិធានការ និងអនុវត្តច្បាស់លាស់ក្នុងការគ្រប់គ្រងបច្ចេកវិទ្យាទំនើប ។

ក្រៅពីនេះ Meta ក៏ចង់ជូនដំណឹងទៅកាន់ក្រុមហ៊ុនផ្សេងៗដែលធ្វើការពាក់ព័ន្ធនឹងបច្ចេកវិទ្យា គួរតែផ្តោតសារៈសំខាន់លើការគ្រប់គ្រង AI និងរួមគ្នាបង្កើតវិធានការអភិវឌ្ឍ AI ប្រកបដោយសុវត្ថិភាព និងការទទួលខុសត្រូវ ៕