លោក ខេមរៈ សិរីមន្ត តារាចម្រៀងមានងារជាឧកញ៉ា រួមទាំងតារាចម្រៀង លាង សុផាឡែន បានសម្តែងក្តីអបអរចំពោះ OG Golden ដែលបានក្លាយជាម្ចាស់ជ័យលាភីក្នុងការប្រលងចម្រៀងរ៉េបកាលពីពេលថ្មីៗមកនេះ។ យ៉ាងណាមិញ រៀមច្បងទាំងពីរព្រលយពាក្យសង្ឃឹមថា OG នឹងក្លាយជាយុវជនគំរូមានសុជីវធម៌ សីលធម៌ មានបទចម្រៀងអត្ថន័យល្អៗ កុំសរសេរចម្រៀងមានពាក្យជេរប្រើពាក្យអសុរោះ។.png)
នៅលើបណ្តាញសង្គមរបស់ ឧកញ៉ា ខេមរៈ សិរីមន្ត ជាតារាចម្រៀងប្រឡូកវិស័យសិល្បៈអស់រយៈពេលជាង២០ឆ្នាំបានបង្ហោះរូបភាព OG Golden ដោយភ្ជាប់មកជាមួយអត្ថន័យថា «អបអរសាទរប្អូនប្រុសដែលជាប់ជ័យលាភីកម្មវិធីរ៉េបភើ fighter …ប្អូននឹងក្លាយជាទំពាំងស្នងឬស្សីថ្មី សង្ឃឹមថាប្អូននឹងក្លាយជាគំរូល្អដល់យុវវ័យមានសុជីវធម៌ គុណធម៌ ជាគំរូដល់ពួកគេ សរសេរចម្រៀងកុំមានពាក្យជេរពាក្យអសុរោះណាប្អូន ជូនពរប្អូនជោគជ័យក្នុងវិស័យរ៉េបភើនេះ»។
មិនត្រឹមតែតារាចម្រៀងឧកញ៉ា ខេមរៈសិរីមន្ត ប៉ុណ្ណោះទេសង្ឃឹមថា OG ជាអ្នកជំនាន់ថ្មីក្នុងវិស័យរ៉េបមិនប្រើសម្តីអសុរោះនៅក្នុងចម្រៀងក្នុងនោះដែរតារាចម្រៀង លាង សុផាឡែន ដែលជារៀមច្បងមួយរូបដែលប្រឡូកក្នុងវិស័យសិល្បៈជាច្រើនឆ្នាំក៏សង្ឃឹមថា OG នឹងមានបទចម្រៀងមានអត្ថន័យល្អ។
កញ្ញា លាង សុផាឡែន បានបង្ហោះយ៉ាងដូច្នេះថា «ជីវិតធ្លាប់ជាអ្នកដឹកជញ្ជូន តែមិនចោលក្តីស្រមៃខ្លួនឯង ឥឡូវនេះ ក្តីស្រមៃរបស់ប្អូនក្លាយជាពិត បងសូមអបអរសាទរប្អូនប្រុស OG សង្ឃឹមថាប្អូនជាទំពាំងស្នងក្នុងវិស័យ រ៉េបភើ យ៉ាងល្អនឹងជាគំរូដល់យុវវ័យ និងមានបទចំរៀងអត្តន័យដែលល្អៗច្រើន ជូនពរប្អូនប្រុសជោគជ័យក្នុងដំណើរជីវិតក្នុងវិស័យចំរៀងរ៉េបភើ»។
គួរបញ្ជាក់ថា OG Golden កូនក្រុមរបស់ Ruthko ដែលគ្រូបង្វឹករូបនេះទទួលមរណភាពក្នុងហេតុការណ៍គ្រោះថ្នាក់ចរាចរណ៍បានក្លាយជាម្ចាស់ជ័យលាភីក្នុងកម្មវិធី Rapper Fighter កាលពីរាត្រីថ្ងៃទី២ កុម្ភៈ ដោយបានយកឈ្នះបេក្ខជន៤រូបផ្សេងទៀតដោយ ម្ចាស់ជ័យលាភីទទួលបានខ្សែក Rapper Fighter ជាមួយនឹងទឹកប្រាក់ ៦០លានរៀល៕
