ជាការពិតណាស់ នៅពេលដែលមនុស្សកើនអាយុ ឬប្រើប្រាស់ខួរក្បាលច្រើន អាចធ្វើឱ្យប្រសិទ្ធភាពនៃខួរក្បាលថយចុះ ងាយនឹងភ្លេចភ្លាំង។ ខួរក្បាលមានតួនាទីគ្រប់គ្រង និងបញ្ជាចលនា ឥរិយាបថ ក៏ដូចជាចង្វាក់បេះដូង សម្ពាធឈាម តុល្យភាពសារធាតុរាវក្នុងរាងកាយ និងសីតុណ្ហភាពជាដើម…។ វាក៏ទាក់ទងទៅនឹងការយល់ដឹង អារម្មណ៍ ការចងចាំ ការសិក្សា និងចលនាផ្សេងៗ របស់ខួរក្បាលផងដែរ។ ហេតុនេះដើម្បីជួយឱ្យមានការចងចាំខ្ពស់ យើងសូមណែនាំអាហារ ៨ ប្រភេទដែលល្អបំផុតសម្រាប់សុខភាពខួរក្បាល៖
១.ទឹក៖ ទឹកគឺជាសារធាតុដ៏សំខាន់បំផុតមួយសម្រាប់មនុស្ស ដែលជំនួយដល់រាងកាយ និងខួរក្បាល ធ្វើការបានល្អ។ ដូច្នេះការផឹកទឹកទៀងទាត់មិនត្រឹមជួយឱ្យមានសុខភាពល្អប៉ុណ្ណោះទេ ក៏ជួយឱ្យខួរក្បាលដំណើរការល្អ មានការចងចាំខ្ពស់ផងដែរ។
២.អង្ករសម្រូប៖ យោងតាមការសិក្សាបានឱ្យដឹងថា អង្ករសម្រូបមានថាមពលគ្រប់គ្រាន់ក្នុងការកាត់បន្ថយជាតិស្ករក្នុងឈាម និងជំនួយដល់ការចងចាំ។
៣.ត្រីសាម៉ុន៖ ត្រីសាល់ម៉ុន សម្បូរទៅអាស៊ីតខ្លាញ់អូមេហ្គា ៣ ដែលសារធាតុទាំងនេះជួយពង្រឹងរាងកាយឱ្យមាំមួន ការពារខួរក្បាល និងប្រឆាំងការរលាក។
៤.សូកូឡា៖ សូកូឡា សម្បូរទៅដោយសារធាតុ Flavonoids ដែលជួយដល់លំហូរឈាមទៅកាន់ខួរក្បាល នាំអុកស៊ីហ្សែនទៅខួរក្បាលបានច្រើនជាងមុន និងអាចឱ្យខួរក្បាលធ្វើការបានល្អជាងមុនផងដែរ។
៥.បន្លែបៃតង៖ បន្លែបៃតង ពិតជាមានអត្ថប្រយោជន៍ខ្លាំងណាស់ចំពោះសុខភាព ដែលវាជួយកម្ចាត់ខ្លាញ់មិនល្អក្នុងឈាម ពង្រឹងសុខភាពថ្លើម ពង្រឹងសុខភាពខួរក្បាល និងទប់ស្កាត់ជំងឺមហារីក…។
៦.ទឹកដោះគោ៖ ទឹកដោះគោ គឺសម្បូរទៅដោយសារធាតុចិញ្ចឹម និងមានអត្ថប្រយោជន៍ជាច្រើន ដែលជួយថែរក្សាឆ្អឹង ពង្រឹងធ្មេញ ជំនួយដល់ការចងចាំ និងជួយក្នុងការលូតលាស់រាងកាយ។
៧.គ្រាប់ធញ្ញជាតិ៖ គ្រាប់ធញ្ញជាតិ សម្បូរទៅដោយវីតាមីន E និងពពួកខ្លាញ់ អាចជួយឱ្យខួរក្បាលមានថាមពល និងជួយឱ្យអារម្មណ៍ល្អ។
៨.តែបៃតង៖ តែបៃតង ត្រូវគេទទួលស្គាល់ជាឱសថបុរាណដែលមានរសជាតិឈ្ងុយឆ្ងាញ់ ហើយវាក៏មានប្រសិទ្ធភាពក្នុងការបង្កើនប្រព័ន្ធភាពស៊ាំ ប្រឆាំងជំងឺទឹកនោមផ្អែម និងជំនួយដល់ខួរក្បាល៕.png)
