«ទឹកធ្លាក់ជ្រាវ» ដែលមានទីតាំងស្ថិតនៅក្នុងភូមិតាំងសំរោង ឃុំអមលាំង ស្រុកថ្ពង ខេត្ដកំពង់ស្ពឺ គឺជាទឹកធ្លាក់ដែលមានជម្រាលច្រើនដំណាក់ អំណោយផលដល់ការងូតទឹកលេងកម្សាន្ដពីសំណាក់ភ្ញៀវទេសចរជាតិ និងអន្ដរជាតិ។ តំបន់រមណីយដ្ឋានទឹកធ្លាក់នេះគឺមានសក្តានុពលធំធេងណាស់ ព្រោះវាស្ថិតក្នុងតំបន់ជួរភ្នំឱរ៉ាល់ដែលប្រមូលផ្តុំដោយសហគមន៍ទេសចរណ៍ អេកូទេសចរណ៍ ទេសចរណ៍ផ្សងព្រេង ហើយអ្វីដែលពិសេសនោះ គឺតំបន់នេះមានទឹកធ្លាក់ពីលើភ្នំរហូតដល់ ១៥ ម៉ែត្រដែលមានភាពទាក់ ទាញខ្លាំងបំផុតសម្រាប់ភ្ញៀវទេសចរទៅលេងកម្សាន្ត។ 
ជាការពិតណាស់ សហគមន៍ទេសចរណ៍ទឹកធ្លាក់ជ្រាវ មិនត្រឹមជាតំបន់ទាក់ទាញភ្ញៀវទេសចរគ្រប់ជាតិសាសន៍ប៉ុណ្ណោះទេ ប៉ុន្តែក៏ជាតំបន់ដ៏មានសក្តានុពលបំផុតមួយប្រចាំខេត្តកំពង់ស្ពឺផងដែរ។ នៅទីនេះក្រៅពីងូតទឹកលេងកម្សាន្តយ៉ាងសប្បាយរីករាយ លោកអ្នកក៏អាចបោះតង់ អង្គុយគយគន់ទេសភាពព្រៃភ្នំពណ៌បៃតងខៀវខ្ចី មើលទឹកធ្លាក់ ស្រូបយកខ្យល់អាកាសបរិសុទ្ធ និងអង្គុយតាមក្ចុសស្តាប់សំឡេងសត្វយំលាយឡំនឹងស្នូរទឹកជ្រោះហូរធ្លាក់ពីលើថ្មយ៉ាងមានក្តីសុខទៀតផង។ 
លើសពីនេះលោកអ្នកក៏អាចធ្វើម្ហូបដោយខ្លួនឯងតាមចំរាក់ផ្ទាំងថ្មក្រោមម្លប់ដើមឈើដ៏ត្រជាក់ ញ៉ាំជាមួយបងប្អូន គ្រួសារ និងមិត្តភក្តិយ៉ាងមានក្តីសុខ។ បច្ចុប្បន្នតំបន់នេះគឺមានប្រជាប្រិយភាពខ្លាំងណាស់ ដោយសារមានភ្ញៀវទេសចរទៅទស្សនាជាហូរហែឥតឈប់ឈរតែម្តង ជាពិសេសគឺថ្ងៃចុងសប្តាហ៍ និងថ្ងៃបុណ្យទាន ដែលបានជួយលើកស្ទួយជីវភាពប្រជាសហគមន៍នៅក្នុងតំបន់នោះបានកាន់តែល្អប្រសើរជាងមុន។
គួរបញ្ជាក់ដែរថា សហគមន៍ជ្រាវ និងរមណីយដ្ឋានចម្ការក្រូចគឺនៅជាប់គ្នា ដូច្នេះលោកអ្នកអាចទៅលេងចម្ការក្រូចក៏បាន ឬទៅលេងសហគមន៍ជ្រាវក៏បាន។ នៅសហគមន៍ជ្រាវនេះគឺជាសហគមន៍ដែលមានទឹកធ្លាក់ពីដំណាក់ទី១ រហូតដល់ដំណាក់ទី៧ កាលណាយើងឡើងកាន់តែខ្ពស់ទឹកធ្លាក់កាន់តែស្អាត និងមានទិដ្ឋភាពបែបស្ងប់ស្ងាត់ គឺជាជម្រើសដ៏ល្អបំផុតសម្រាប់បងប្អូនក្នុងការទស្សនា។ 
ហេតុនេះដើម្បីទៅដល់ទីតាំងនៃរមណីយដ្ឋានទឹកជ្រោះជ្រាវ ភ្ញៀវទេសចរគឺមានភាពងាយស្រួល មិនមានការធ្វើដំណើរដោយថ្មើរជើងនៅលើផ្លូវវែងឆ្ងាយនោះទេ ហើយចំពោះរថយន្តអាចបើកឡើងទៅដល់ក្បែរទីតាំងលេងកម្សាន្តតែម្តង។ ទោះជាយ៉ាងណា រមណីយដ្ឋានទឹកធ្លាក់ជ្រាវគឺមិនមានហាងធំៗ និងទំនើបដូចជារមណីយដ្ឋានដ៏ទៃនោះទេ តែប្រជាពលរដ្ឋអាចធ្វើការកម្មង់ម្ហូបអាហារបាន ដោយអ្នកលក់នៅទីនោះមានភ្នាក់ងារដឹកជញ្ជូនទៅដល់កន្លែង និងមានសេវាកម្មល្អផងដែរ៕
