គ្រប់រុក្ខជាតិទាំងអស់មិនប្រាកដថាល្អនោះទេ រុក្ខជាតិខ្លះធ្វើឱ្យកន្លែងរស់នៅមានសោភ័ណភាពជួយបន្សុទ្ធខ្យល់ ដែលនាំមកនូវអារម្មណ៍ស្រស់ស្រាយ និងផាសុកភាព។ ប៉ុន្តែរុក្ខជាតិខ្លះទៀតក៏នាំឱ្យមានគ្រោះថ្នាក់ដល់អាយុជីវិតរបស់យើងផងដែរ ដោយសារវាមានផ្ទុកជាតិពុលដ៏កាចសាហាវមួយ។ ដូច្នេះអ្នកគួរប្រយ័ត្នកុំដាំរុក្ខជាតិខាងក្រោមនេះនៅក្នុងផ្ទះឱ្យសោះ៖
១. Nerium oleander៖ គឺជារុក្ខជាតិម្យ៉ាងដែលជារឿយៗត្រូវបានគេដាំដុះលម្អនៅតាមដងផ្លូវ សួនច្បារ និងសាលារៀន ដោយសារភាពស្រស់ស្អាតនៃចង្កោមផ្កាពណ៌ផ្កាឈូលគួរជាទីទាក់ទាញភ្នែក។ ទោះជាយ៉ាងណា ផ្កានេះគឺមានគ្រោះថ្នាក់ខ្លាំងណាស់ ដោយសារគ្រប់ផ្នែកទាំងអស់នៃរុក្ខជាតិ oleander ចាប់ពីឫស ដើម ស្លឹក ផ្កា សុទ្ធតែមានផ្ទុកនូវជាតិពុលដ៏កាចសាហាវបំផុត អាចបណ្តាលឱ្យរលាកស្បែក ក្រហម រមាស់ និងពងបែកជាដើម នៅពេលដែលអ្នកប៉ះវា។ លើសពីនេះប្រសិនបើអ្នកច្រឡំបេះហិត ឬញ៉ាំអាចបណ្តាលឱ្យមានរោគសញ្ញាពុលដូចជាចង្អោរ ក្អួត រាគ ឈឺពោះខ្លាំង បេះដូងលោតញាប់ ប្រកាច់ សន្លប់ និងអាចស្លាប់បានទៀតផង។
២. Brugmansia suaveolens៖ គឺជារុក្ខជាតិលម្អដ៏ពេញនិយមមួយ ដោយសារវាមានភាពឆើតឆាយ និងស្រស់ស្អាត ជាមួយនឹងផ្កាពណ៌លឿង រាងដូចកណ្តឹង។ ទោះបីជាមានសម្រស់ស្រស់ស្អាតប៉ុណ្ណាក៏ដោយ ផ្កានេះត្រូវបានគេចាត់ទុកថា ជាផ្កាគ្រោះថ្នាក់ដោយសារគ្រប់ផ្នែកទាំងអស់នៃរុក្ខជាតិ ចាប់ពីផ្កា ស្លឹក ដើម និងឫស មានផ្ទុកនូវជាតិពុលអាល់កាឡូអ៊ីត។ ប្រសិនបើអ្នកត្រូវបានប៉ះពាល់នឹងជាតិពុលទាំងនេះ នឹងបណ្តាលឱ្យមានការរលាកស្បែក រលាកភ្នែក និងភ្នាសរំអិល ធ្វើឱ្យមានកន្ទួល រមាស់ និងក្រហម។ ក្នុងករណីទទួលទាន រោគសញ្ញាអាចរួមមានការមើលមិនច្បាស់ មាត់ស្ងួត ក្តៅខ្លួនខ្លាំង បាត់បង់ការចងចាំ សន្លប់ និងអាចស្លាប់បាន។
៣. Jatropha podagrica៖ រុក្ខជាតិមួយប្រភេទនេះវិញក៏មិនធម្មតាដែរ ដោយដើម មើម និងស្លឹក ជាពិសេសគ្រាប់សុទ្ធតែផ្ទុកជាតិពុលទាំងអស់។ វាមានផ្ទុកសារធាតុ Curcin ដែលជាជាតិពុលដ៏មានឥទ្ធិពលបំផុតរារាំងការសំយោគប្រូតេអ៊ីន និងបណ្តាលឱ្យស្លាប់កោសិកា។ នៅពេលអ្នកច្រឡំដៃប៉ះ ហិត ឬលេបចូល នឹងបណ្តាលឱ្យរលាកស្បែក កន្ទួល រមាស់ ក៏ដូចជារលាកបំពង់ក និងមាត់ ឈឺពោះធ្ងន់ធ្ងរ ក្អួត រាគចេញឈាម ហូរឈាមក្នុងក្រពះពោះវៀន ជំងឺសរសៃឈាមបេះដូង ខ្សោយថ្លើម ខ្សោយតំរងនោម និងរារាំងប្រព័ន្ធប្រសាទកណ្តាលជាដើម។
៤. Dieffenbachia ឬដើមផាត់ប្រមូល៖ គឺជារុក្ខជាតិលម្អក្នុងផ្ទះដ៏ពេញនិយមបំផុតនាពេលបច្ចុប្បន្ននេះ ដោយសារតែភាពស្រស់ស្អាតពណ៌បៃតង ភាពងាយស្រួលនៃការលូតលាស់ និងការថែទាំ។ ទោះជាយ៉ាងណាក៏ដោយ ស្លឹក និងដើមរបស់វាមានផ្ទុកគ្រីស្តាល់កាល់ស្យូម oxalate អាចបង្កគ្រោះថ្នាក់ដល់លោកអ្នកបានដូចជាបណ្តាលឱ្យរមាស់ ក្រហម ហើម និងពងបែក។ លើសពីនេះ ការលេបទឹករបស់រុក្ខជាតិអាចបណ្តាលឱ្យរលាកមាត់ និងបំពង់ក ពិបាកដកដង្ហើម ហើមអណ្តាត ឈឺពោះ ក្អួត រាគ ប្រកាច់ និងថប់ដង្ហើមជាដើម៕
