ទំនប់វារីអគ្គីសនីពហុបំណងសេកសក ដែលមានរហ័សនាមថា «សមុទ្រទឹកសាប» កំពុងក្លាយជាគោលដៅទាក់ទាញទេសចរណ៍មួយក្នុងស្រុករតនមណ្ឌល ខេត្តបាត់ដំបង។ ជាមួយនឹងទេសភាពបៃតងអមសងខាង បូករួមនឹងសម្រស់ព្រៃភ្នំធម្មជាតិ ខ្យល់អាកាសបរិសុទ្ធ ទំនប់វារីអគ្គិសនីនេះបច្ចុប្បន្នកំពុងក្លាយជាទីតាំងសម្រាប់អ្នកទេសចរសម្រាកលំហែកាយ ដោយអាចជិះទូកលេង មើលថ្ងៃរះ និងថ្ងៃលិចយ៉ាងស្រស់ស្អាត បោះតង់ ក៏ដូចជាអាចនេសាទត្រីបានផងដែរ។ 
ទំនប់វារីអគ្គិសនីពហុបំណងសេកសក មានទីតាំងស្ថិតនៅក្នុងឃុំផ្លូវមាស ស្រុករតនៈមណ្ឌល ខេត្តបាត់ដំបង មានចម្ងាយប្រមាណ ៥២ គីឡូម៉ែត្រពីរូបសំណាកលោកតាដំបងគ្រញូង លាតសន្ធឹងដោយបានតភ្ជាប់ពីភ្នំមួយ ទៅភ្នំមួយទៀត ដើម្បីបង្កើតជាអាងស្តុបទឹក និងមានសមត្ថភាពអាចស្តុកទឹកបានចំនួនដល់ ២៨៦ លានម៉ែត្រគូប ដែលប្រមូលស្តុកទុកនិងត្រូវទម្លាក់តាមដងស្ទឹងសង្កែ រួចបន្តចែកចាយតាមប្រឡាយមេ និងប្រឡាយរង ទៅស្រោចស្រពលើផ្ទៃដីស្រែដ៏ធំល្វឹងល្វើយ នៃស្រុករតនមណ្ឌល ស្រុកបាណន់ ស្រុកសង្កែ និងស្រុកមោងឫស្សី នៃខេត្តបាត់ដំប។
ក្រៅពីអាចផ្គត់ផ្គង់អគ្គិសនី និងទឹកដល់ប្រជាជនសម្រាប់ប្រើប្រាស់ ទំនប់វារីអគ្គីសនីនេះក៏មានសក្ដានុពលធំធេងដល់វិស័យកសិកម្មខេត្ដបាត់ដំបង និងមានសក្ដានុពលយ៉ាងសំខាន់ដល់វិស័យទេសចរណ៍ផងដែរ។ ទំនប់វារីអគ្គិសនីពហុបំណងសេកសក ពិតជាមានទេសភាពស្រស់ស្អាត និងទាក់ទាញខ្លាំងណាស់ ដោយភ្ញៀវទេសចរអាចមកទស្សនាតំបន់នេះ ស្វែងយល់ពីជីវិតប្រចាំថ្ងៃរបស់អ្នកស្រុក ទស្សនាសត្វស្លាប ជីវចម្រុះ ពិសារអាហារឆ្ងាញ់ៗជាមួយបងប្អូន គ្រួសារ និងមិត្តភក្តិយ៉ាងមានក្តីសុខ៕.png)
