ទប់ចិត្តមិនជាប់ កូនអាន ទៅជួបសត្វជ្រូក អាសំណាង ដោយផ្ទាល់នៅខេត្តសៀមរាប

ទស្សនិកជនមួយចំនួនធំជ្រាបមកហើយថាក្រៅពីកូនដំរី លំផាត់ ដែលទទួលបានការអាណិតស្រលាញ់មានប្រជាប្រិយភាពសត្វជ្រូក អាសំណាង ដែលចិញ្ចឹមដោយព្រះសង្ឃមួយអង្គស្ថិតក្នុងខេត្តសៀមរាបក៏ទទួលបាននូវការចាប់អារម្មណ៍មិនធម្មតា។ ភាពទាក់ទាញរបស់ អាសំណាង បានទាក់ទាញចិត្តស្រីស្អាត កូនអាន ទៅជួបដោយផ្ទាល់ថែមទិញអំណោយឱ្យទៀត។

ក្នុងរយៈពេលចុងក្រោយនេះសត្វចតុបាតចំនួនពីរប្រភេទកំពុងសាងភាពល្បីល្បាញជាងគេគឺកូនដំរី លំផាត់ ដែលកំពុងសម្រាកព្យាបាលមើលថែនៅសួនសត្វភ្នំតាម៉ៅ រួមជាមួយនឹងសត្វជ្រូកដែលហៅថា អាសំណាង ត្រូវបានចិញ្ចឹមដោយព្រះសង្ឃនៅខេត្តសៀមរាប។ សត្វទាំងពីរប្រភេទនេះគឺធ្វើឱ្យសាធារណជនចាប់អារម្មណ៍ជាងគេនិងទទួលបានការស្រលាញ់យ៉ាងច្រើននិងមានមនុស្សមិនតិចទេដែលចង់ទៅជួបផ្ទាល់។

ថ្មីៗនេះមានវីដេអូចែករំលែកដោយគេបានឃើញនាដការីល្បីឈ្មោះ សុគា គីមលាង ហៅកូនអាន បានទៅលេងអាសំណាងដោយផ្ទាល់។ តាមរយៈវីដេអូដែលបានចែករំលែកនៅលើគណនីទិកតុកកាលពីថ្ងៃទី៣១ ខែធ្នូ ឆ្នាំ២០២៤ គេបានឃើញ កូនអាន អង្អែល អាសំណាងដែលកំពុងតែដេកលើប៉ៅអ៊ី។ មិនត្រឹមតែប៉ុណ្ណោះ កូនអាន ថែមទាំងបានទិញតុក្កតាជ្រូករួមជាមួយនឹងប៉ៅអ៊ីថ្មីឱ្យ អាសំណាង ទៀតផង។

តាមការសង្ឃដីការបស់តេជគុណ សុវណ្ណ ឆ័យ ចំពោះអ្នកដែលចង់ទៅលេងអាសំណាង ចង់ទិញរបស់ផ្ញើអាចទិញជាអង្ករ ឬជាសម្ភារៈសិក្សាក៏បានដើម្បីបានចែករំលែកទៅកាន់សិស្សខ្វះខាត រៀននៅក្នុងវត្ត។

អាសំណាង ត្រូវបានចែកចាយនៅលើបណ្តាញសង្គមតាមរយៈព្រះសង្ឃមួយអង្គគង់នៅ វត្តព្រះពុទ្ធសិរី ហៅវត្តគ្រៀលពង ភូមិគ្រៀលពង ឃុំពពេល ស្រុកសូទ្រនិគម ខេត្តសៀមរាប។ ក្នុងវីដេអូដែលបានផ្សព្វផ្សាយ អាសំណាង ត្រូវបានមើលថែចិញ្ចឹមដោយក្តីស្រលាញ់មានកន្លែងសម្រាប់ដេក ខ្នើយនិងភួយ ថែមទាំងជាសត្វជ្រូកដែលចេះស្តាប់បង្គាប់។ វីដេអូរបស់ អាសំណាង គឺមានទស្សនិកជនចូលរួមទស្សនារាប់ម៉ឺនដងនិងលានដង ជាមួយនឹងមតិសរសើរ ជាច្រើននិងសំណូមពរឱ្យថតអាសំណាងឱ្យបានច្រើនៗផងដែរ៕