ប្លែកមែន! មិនធ្លាប់រៀនភាសាអ៊ីតាលីសោះ ក្រោយវះកាត់ខួរក្បាលស្ត្រីម្នាក់នេះអាចនិយាយភាសាអ៊ីតាលីដូចជ.នជាតិដើម

ប្រទេសអង់គ្លេស ៖ កាលពីថ្ងៃទី២៩ ខែធ្នូ ឆ្នាំ២០២៤ សារព័ត៌មានបរទេសបានចុះផ្សាយពីស្ត្រីអង់គ្លេសម្នាក់មានអាការៈខុសប្លែកខ្លាំងក្រោយពីវះកាត់ខួរក្បាលនៅមន្ទីរពេទ្យរួច គឺស្ត្រីរូបនេះអាចនិយាយភាសាអ៊ីតាលីច្បាស់ៗ និងផ្លាស់ប្តូរសំឡេងដើមទាំងស្រុង ។

អ្នកស្រី Althia Bryden បានប្រាប់ពីភាពខុសប្លែករបស់ខ្លួន ដែលអាចនិយាយភាសាអ៊ីតាលីដូចជ.នជាតិដើម ក្រោយការវះកាត់ ។ អ្នកស្រីបានកើតនៅទីក្រុងឡុងដ៍ ប្រទេសអង់គ្លេស ហើយពុំធ្លាប់ធ្វើដំណើរទៅប្រទេសអ៊ីតាលី ពីមុនទេ ប៉ុន្តែហេតុអ្វីអ្នកស្រីចេះនិយាយភាសាអ៊ីតាលី ថែមទាំងមានកាយវិការដូចគ្នាទៀត?

អ្នកស្រីមានអាយុ៥៨ឆ្នាំ បានចូលនិវត្តន៍ពីការងារ ហើយបច្ចុប្បន្ន អ្នកស្រីរស់នៅទីក្រុងឡុងដ៍ ជាមួយស្វាមីឈ្មោះ Winston អាយុ៦៣ឆ្នាំ ដែលបានជួយថែទាំអ្នកស្រីរហូតរមក ។ អ្នកស្រីមានជំងឺដាច់សរសៃឈាមខួរក្បាល កាលពីថ្ងៃទី៤ ខែឧសភា ឆ្នាំ២០២៤ ពេលនោះ អ្នកស្រីពុំអាចនិយាយបានទេ ហើយរាងកាយផ្នែកខាងលើគ្មានចលនាអស់រយៈពេល៣ខែ ។

បន្ទាប់ពីបានទទួលការវះកាត់ខួរក្បាល នៅខែសីហា ឆ្នាំ២០២៤ ស្រាប់តែអ្នកស្រីអាចនិយាយបានវិញ ប៉ុន្តែបែរជានិយាយភាសាអ៊ីតាលីយ៉ាងច្បាស់ បើទោះជាពុំធ្លាប់ទៅប្រទេសអ៊ីតាលីក្តី ។ លើសពីនេះ អ្នកស្រីថែមទាំងបង្ហាញកាយវិការដូចជនជាតិអ៊ីតាលីទៀតផង ដែលធ្វើឱ្យគ្រូពេទ្យភ្ញាក់ផ្អើលយ៉ាងខ្លាំង ។

ពីដំបូង អ្នកស្រីពុំជឿថា ខ្លួនអាចនិយាយភាសាអ៊ីតាលីបានទេ និងពុំចាំសំឡេងខ្លួនឯង ។ ក្រុមគ្រូពេទ្យបានពិនិត្យអាការៈអ្នកស្រី ប៉ុន្តែពួកគេឈរស្រឡាំងកាំង ពេលឮអ្នកស្រីនិយាយកាន់តែច្រើន និងបញ្ចេញសំឡេងច្បាស់ ។ គ្រូពេទ្យសួរថា តើអ្នកស្រីធ្លាប់និយាយភាសាអ៊ីតាលីឬក៏អត់ មុនកើតជំងឺដាច់សរសៃឈាមខួរក្បាល? វាគួរឱ្យបារម្ភខ្លាំងណាស់ដែលមានប្លែកៗបែបនេះ ហើយសូម្បីតែសំឡេងសើច ក៏ពុំដូចមុនដែរ ៕

គ្រូពេទ្យជំនាញការនិយាយ បញ្ជាក់ថា អ្នកស្រី Bryden បានកើតជំងឺកម្រមួយ ឬការបញ្ចេញសំឡេងបែបជនបរទេស ទើបធ្វើឱ្យសំឡេងដើមផ្លាស់ប្តូរទាំងស្រុង ។ វាបណ្តាលមកពីការខូចខួរក្បាល ហើយអ្នកជំងឺបាត់បង់ការទំនាក់ទំនងផ្នែកភាសា ឬពិបាកប្រើប្រាស់ភាសា ៕