កាលពីថ្ងៃទី១៩ ខែធ្នូ ឆ្នាំ២០២៤ អ្នកវិទ្យាសាស្ត្រនិយាយថា ផ្ទាំងទឹកកកធំបំផុតលើពិភពលោក ឈ្មោះ A23a ឬមានទំហំប៉ុនទីក្រុងឡុងដ៍ ២ដង ចាប់ផ្តើមបម្លាស់ទីនៅលើទឹកសមុទ្រម្តងទៀត ហើយការបម្លាស់ទីលើកនេះ អាចនាំមកនូវផលប្រយោជន៍ច្រើនជាងគ្រោះថ្នាក់ ។
អ្នកវិទ្យាសាស្ត្របានតាមដានការបម្លាស់ទីរបស់ផ្ទាំងទឹកកក A23a អស់ជាច្រើនឆ្នាំ ពីព្រោះក្រៅពីមានទំហំធំខ្លាំងហើយ ផ្ទាំងទឹកកកនេះបានធ្វើឱ្យពិភពលោក បារម្ភពីការបម្លាស់ទីរបស់វាអាចប៉ះពាល់ដល់ប្រព័ន្ធអេកូឡូស៊ីសមុទ្រ និងកម្រិតទឹកសមុទ្រកើនឡើង ។
កាលពីមុន ផ្ទាំងទឹកកកដ៏ធំបំផុតលើពិភពលោកនេះ ធ្លាប់ជាផ្នែកមួយរបស់ផ្ទាំងទឹកកកនៅទ្វីបអង់តាកទិក និងជាផ្នែករបស់ផ្ទាំងទឹកកក Filchner-Ronne ស្ថិតនៅភាគពាយ័ព្យរបស់ទ្វីប ហើយក៏ធ្លាប់ជាទីតាំងស្ថានីយស្រាវជ្រាវរបស់សហភាពសូវៀត ។
នៅឆ្នាំ១៩៨៦ ភ្នំទឹកកកយក្សបានផ្តាច់ចេញពីទ្វីប និងអណ្តែតនៅសមុទ្រ Weddell ។ រហូតមកដល់ខែសីហា ឆ្នាំ២០២៤ វាក៏អណ្តែតទៅជាប់ផ្ទាំងទឹកកកធំម្តងទៀត ដោយសារកម្លាំងទឹកសមុទ្រ ។ ប៉ុន្តែដោយសារផ្ទាំងទឹកកកនេះមានទំហំធំខ្លាំង វាក៏ក្លាយជាភ្នំទឹកកកធំបំផុតលើពិភពលោក ហើយធ្វើឱ្យអ្នកវិទ្យាសាស្ត្រតាមដានពីការបម្លាស់ទីថា តើវានឹងប៉ះពាល់ប្រព័ន្ធអេកូឡូស៊ីនៅជុំវិញ និងកម្រិតទឹកសមុទ្រដែរឬទេ?
អ្នកវិទ្យាសាស្ត្រអង់គ្លេសបាននិយាយកាលពីថ្ងៃទី១៣ ខែធ្នូ ឆ្នាំ២០២៤ ថា ផ្ទាំងទឹកកកនេះបានផ្តាច់ចេញពីផ្ទាំងទឹកកកធំជាថ្មី និងកំពុងតែរសាត់ទៅមកតាមកម្លាំងទឹកសមុទ្រ ទៅកាន់តំបន់ទឹកក្តៅត្រង់បរិវេណប្រជុំកោះ South Georgia ហើយវាអាចនឹងរលាយ ។
កន្លងមក អ្នកវិទ្យាសាស្ត្របារម្ភពីការបម្លាស់ទី និងការរលាយរបស់ផ្ទាំងទឹកកក A23a អាចធ្វើឱ្យកម្រិតទឹកសមុទ្រទូទាំងពិភពលោក កើនឡើងខ្ពស់ ។ ប៉ុន្តែការវិភាគចុងក្រោយបញ្ជាក់ថា ការរលាយរបស់ផ្ទាំងទឹកកកនឹងពុំធ្វើឱ្យកម្រិតទឹកសមុទ្រកើនឡើងទេ ប៉ុន្តែវានឹងផ្តល់ផលល្អដល់ប្រព័ន្ធអេកូឡូស៊ី ។
ទោះយ៉ាងណា មនុស្សភាគច្រើននៅតែបារម្ភពីបម្រែបម្រួលអាកាសធាតុបច្ចុប្បន្ន អាចធ្វើឱ្យផ្លាស់ប្តូរអ្វីម្យ៉ាង ជាពិសេស ទ្វីបអង់តាកទិក ពីព្រោះបើសីតុណ្ហភាពកើនឡើង នឹងធ្វើឱ្យផ្ទាំងទឹកកកលើសមុទ្រដាច់ពីគ្នាញឹកញាប់ ។ វាអាចប៉ះពាល់ដល់កម្រិតទឹកសមុទ្រលើពិភពលោក ឬប៉ះពាល់បរិមាណកាបូនក្នុងមហាសមុទ្រ និងតុល្យភាពបរិយាកាស ៕
