ប្រទេសថៃ ៖ តាមរបាយការណ៍របស់ភ្នាក់ងារទេសចរណ៍ Agoda បង្ហាញថា ច្បាប់អាពាហ៍ពិពាហ៍គូស្នេហ៍ភេ.ទ ដូចគ្នារបស់ថៃ នឹងអនុវត្តចាប់ពីខែមករា ឆ្នាំ២០២៥ តទៅ ហើយថៃនឹងអាចទាក់ទាញភ្ញៀវទេសចរបរទេសកើនឡើង ចំនួន៤លាននាក់បន្ថែមទៀតក្នុង១ឆ្នាំ ឬស្មើប្រមាណ១០% ។ ហេតុនេះ ថៃនឹងទទួលបានប្រាក់ចំណូលពីវិស័យទេសចរណ៍ រហូតដល់២ពាន់លានដុល្លារក្នុង១ឆ្នាំ ក្នុងរយៈពេល២ឆ្នាំខាងមុខ ។.png)
របាយការណ៍បញ្ជាក់ថា ក្រុមភ្ញៀវទេសចរបរទេសមកកម្សាន្តនៅថៃ មិនមែនមានតែគូស្នេហ៍ស្រឡាញ់ភេទដូចគ្នា ឬភ្ញៀវមកចូលរួមពិធីអាពាហ៍ពិពាហ៍ប៉ុណ្ណោះទេ ប៉ុន្តែរួមទាំងក្រុម LGBTQ ផ្សេងៗផងដែរ ។ ថៃនឹងទទួលបានភ្ញៀវទេសចរ និងជនបរទេសមកធ្វើការកើនឡើងជាបន្តបន្ទាប់ ហើយក្រៅពីការស្វែងរកកន្លែងស្នាក់នៅយ៉ាងសមរម្យហើយ ពួកគេនឹងមានអារម្មណ៍ថា នៅទីនេះ មានការទទួលស្គាល់យ៉ាងពិតប្រាកដ ។
លើសពីនេះ ច្បាប់អាពាហ៍ពិពាហ៍គូស្នេហ៍ភេទដូចគ្នារបស់ប្រទេសថៃ នឹងជំរុញឱ្យវិស័យទេសចរណ៍ថៃជួលបុគ្គលិកធ្វើការពេញម៉ោងបន្ថែមទៀត ចំនួន៧៦,០០០តួនាទី ព្រមទាំងបង្កើនផលិតផលក្នុងស្រុកសរុប (GDP) រហូតដល់០.៣% ។
អនុប្រធានផ្នែកអភិវឌ្ឍន៍អាជីវកម្មរបស់ Agoda បាននិយាយមកកាន់ CNBC Travel ថា នូវែលសេឡង់ និងអាមេរិក មានចំនួនរៀបអាពាហ៍ពិពាហ៍គូស្នេហ៍ភេទដូចគ្នាកើនឡើង ក្រោយពីប្រទេសទាំងពីរអនុម័តច្បាប់នេះ ។ នូវែលសេឡង់បានអនុម័តច្បាប់នេះកាលពីឆ្នាំ២០១៣ ហើយរហូតមកដល់ឆ្នាំ២០១៦ ការរៀបអាពាហ៍ពិពាហ៍របស់គូស្នេហ៍ភេទដូចគ្នាភាគច្រើន គឺជាភ្ញៀវទេសចរ ។.png)
ចំណែកថៃនឹងក្លាយជាប្រទេសគោលដៅគូស្នេហ៍ស្រឡាញ់ភេទដូចគ្នា LGBTQIA+ របស់ពលរដ្ឋឥណ្ឌាផងដែរ ។ គូស្នេហ៍ភេទដូចគ្នាស្មើជាង៣,៦០០លាននាក់នៅទូទាំងពិភពលោក គឺប្រទេសពួកគេពុំទាន់មានច្បាប់នេះទេ ។.png)
ដោយឡែក អ្នកធ្វើយុទ្ធនាការសិទ្ធិមនុស្សនៅថៃ និងអ្នកចូលរួមបង្កើត Bangkok Pride និយាយថា Bangkok Pride នឹងរៀបចំពិធីអាពាហ៍ពិពាហ៍សម្រាប់ក្រុមអ្នកស្រឡាញ់ភេទដូចគ្នា នៅថ្ងៃទី២៣ ខែមករា ឆ្នាំ២០២៥ ពីព្រោះវាជាថ្ងៃដែលថៃចាប់ផ្តើមអនុវត្តច្បាប់នេះ ។ យើងមានគូស្នេហ៍ចុះឈ្មោះរួចហើយជាង៣០០គូ ខណៈការកំណត់គោលដៅស្មើ១,០០០គូ នៅទូទាំងប្រទេស រួមទាំងគូស្នេហ៍បរទេស ។
ក្រៅពីនេះ រដ្ឋាភិបាលថៃមានគម្រោងធ្វើជាម្ចាស់ផ្ទះកម្មវិធី «World Pride» លំដាប់ពិភពលោក ខណៈកាលពីឆ្នាំ២០២៣ ទីក្រុងស៊ីដនី ប្រទេសអូស្ត្រាលី ទទួលបានចំណូលរហូតដល់១២០លានដុល្លារ ពីការរៀបចំពិធីនេះ ។ ថៃ គឺជាប្រទេសទី៣ ក្នុងតំបន់អាស៊ី ដែលបានអនុវត្តច្បាប់អាពាហ៍ពិពាហ៍គូស្នេហ៍ភេទដូចគ្នា បន្ទាប់ពីតៃវ៉ាន់ អនុម័តច្បាប់នៅឆ្នាំ២០១៩ និងនេប៉ាល់ ឆ្នាំ២០២៣ ៕
