អ្នកលេងបណ្តាញសង្គមមានការជជែកវែកញែកបន្ទាប់ពីរូបភាពរបស់តារាចម្រៀង ឧកញ៉ា ព្រាប សុវត្ថិ ឡើងឆាកប្រគំតន្រ្តីជាមួយនឹងសំលៀកបំពាក់ស្ទាយ៍ហ្វេសសិនលោកខាងលិច។ អ្នកគាំទ្រមួយចំនួនបានបង្ហាញពីការមិនចូលចិត្តរបស់ខ្លួនទៅកាន់តារាចម្រៀងជើងចាស់រូបនេះ។ គួរឱ្យដឹងថាកាលពីមុន តារាចម្រៀងរ៉េប ជី ដេវីត ក៏បានឡើងឆាកជាមួយនឹងស្ទាយ៍សំលៀកបំពាក់ស្រដៀងគ្នានេះរហូតដល់លោកចេញវីដេអូសូមទោស។
កាលពីកន្លងមកថ្មីៗនេះក្នុងកម្មវិធីប្រគំតន្រ្តីមួយវត្តមានរបស់តារាចម្រៀង ឧកញ៉ា ព្រាប សុវត្ថិ លោកជំទាវ ហ៊ឹម ស៊ីវន និងអ្នកនាង ម៉េង កែវពេជ្ជតា បកស្រាយចម្រៀងរួមគ្នាបង្កឱ្យហ្វេនៗរំភើបចិត្តយ៉ាងខ្លាំងចំពោះទិដ្ឋភាពនេះកម្រនឹងកើតមានឡើងពីសំណាកតារាចម្រៀងជើងចាស់ល្បីល្បាញ។ ទោះយ៉ាងណា ជាមួយនឹងការចាប់អារម្មណ៍របស់តារាចម្រៀងទាំង៣ដួង អ្នកលេងបណ្តាញសង្គមក៏បានចាប់អារម្មណ៍នឹងស្ទាយ៍សំលៀកបំពាក់របស់ឧកញ៉ា ព្រាប សុវត្ថិ ។
តារាចម្រៀងឧកញ៉ា ព្រាប សុវត្ថិ បានជ្រើសសំលៀកបំពាក់ស្ទាយ៍ហ្វេសសិនជាមួយខោដែលមានជើងធំៗដែលមើលទៅជាការស្លៀកសំពត់ ស្របពេលអ្នកមួយចំនួនក៏ដឹងថានេះជាស្ទាយ៍តាមបែបហ្វេកសិនស្រុកក្រៅ ប៉ុន្តែចំណែកមួយផ្នែកមិនពេញចិត្តនៃការស្លៀកពាក់បែបនេះចំពោះឧកញ៉ា ព្រាប សុវត្ថិ។ អ្នកលេងទិកតុកបានបញ្ចេញមតិថា «ចង់ស្គាល់មុខថា អ្នកណាជាអ្នកឱ្យគាត់ស្លៀកចឹង? , ធ្លាប់តែអាយដល ចុះមិចគាត់ស្លៀកមើលទៅដូចកូនក្មេងចឹង, ស្រុកខ្មែរបើមិនថ្មីទើបចំឡែក, ការស្លៀកពាក់ នេះ ប្រពន្ធគាត់អ្នករៀបចំ ម៉ង»។
មិនត្រឹមតែឧកញ៉ា ព្រាប សុវត្ថិ ប៉ុណ្ណោះទេដែលរងនូវសម្តីដែលហាក់មិនអាចទទួលយកបានចំពោះការលេងស្ទាយ៍បែបនេះ ជាក់ស្តែង កាលពីខែកញ្ញា តារាចម្រៀងរ៉េប ជី ដេវីត ត្រូវចេញវីដេអូសូមទោសដើម្បីបញ្ឈប់ការវែកញែកនិងបញ្ចប់រឿង បន្ទាប់ពីការស្លៀកពាក់របស់លោករងការរិះគន់ថា «ខោមិនចំខោ សំពត់មិនចំសំពត់»៕
