បន្ទាយមានជ័យ គឺជាខេត្តមួយស្ថិតនៅភាគពាយ័ព្យនៃប្រទេសកម្ពុជា ជិតព្រំដែនថៃ។ ខេត្តនេះមានរមណីយដ្ឋានប្រវត្តិសាស្រ្ត វប្បធម៌ និងធម្មជាតិជាច្រើនកន្លែង ដែលទាក់ទាញភ្ញៀវទេសចររាប់ពាន់នាក់ជារៀងរាល់ឆ្នាំ។ ខេត្តបន្ទាយមានជ័យ មានចម្ងាយ ៣៥៩ គីឡូម៉ែត្រពីរាជធានីភ្នំពេញ គឺជាខេត្តធំជាងគេទី ១០ ប្រចាំប្រទេស។ ដូច្នេះហើយប្រសិនបើលោកអ្នកបានទៅដល់ខេត្តបន្ទាយមានជ័យសូមកុំរំលងតំបន់ទេសចរណ៍ដ៏ស្រស់ស្អាតទាំងនេះឱ្យសោះ៖
១.ប្រាសាទបន្ទាយឆ្មារ៖ គឺជាប្រាសាទបុរាណខ្មែរកសាងឡើងក្នុងរជ្ជកាលព្រះបាទជ័យវរ្ម័នទី៧ ចន្លោះពីឆ្នាំ១១៨១ ដល់ឆ្នាំ១២១៩ ។ សព្វថ្ងៃប្រាសាទនេះមានសភាពទ្រុឌទ្រោមបន្តិច ប៉ុន្តែនៅតែស្រស់ស្អាតជាទីគយគន់ដែលហ៊ុមព័ទ្ធដោយទេសភាពខៀវស្រងាត់ជាមួយនឹងដើមឈើធំៗ ផ្តល់នៅភាពត្រជាក់ត្រជុំដល់ភ្ញៀវទេសចរ។ ប្រាសាទបន្ទាយឆ្មារ មានទីតាំងស្ថិតនៅភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ដែលល្បីល្បាញខ្លាំងដោយសារជាសម្បត្តិបេតិកភណ្ឌវប្បធម៌ជាតិ។
២.អាងជើងគ្រុស៖ គឺជាអាងស្តុកទឹកដ៏ធំមួយសម្រាប់ប្រើប្រាស់ក្នុងការស្រោចស្រពដំណាំកសិកម្ម និងប្រើប្រាស់ប្រចាំថ្ងៃរបស់ប្រជាពលរដ្ឋ។ មិនត្រឹមជាអាងស្ដុកទឹកប៉ុណ្ណោះទេ អាងជើងគ្រុស ក៏ជាតំបន់ទេសចរណ៍ដ៏សំខាន់បំផុតមួយមានសក្ដានុពល សម្រាប់ពលរដ្ឋ និងភ្ញៀវទេសចរទៅទស្សនាកម្សាន្តផងដែរ។ បច្ចុប្បន្នអាងជើងគ្រុសគឺមានប្រជាប្រិយភាពខ្លាំងណាស់ ដោយសារនៅទីនេះភ្ញៀវទេសចរ អាចគយគន់សុរិយាអស្ដង្គត ជិះទូកមើលសត្វស្លាប និងមានកន្លែងទទួលទានអាហារឆ្ងាញ់ៗយ៉ាងសម្បូរបែប រួមទាំងមានចំណតយានយន្តដ៏ធំទូលាយទៀតផង។ អាងជើងគ្រុសនេះស្ថិតក្នុងភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ មានចម្ងាយ ៥ គីឡូម៉ែត្រ ពីប្រាសាទបន្ទាយឆ្មារ។
៣.ភ្នំបាក់ និងភ្នំជញ្ជាំង៖ គឺជារមណីយដ្ឋានធម្មជាតិវប្បធម៌ដ៏ស្រស់ត្រកាលមួយ ដែលមានទីតាំងស្ថិតនៅក្រុងសិរីសោភ័ណ ខេត្តបន្ទាយមានជ័យ។ នៅទីនោះមានទេសភាពស្អាតខ្យល់អាកាសបរិសុទ្ធ បូករួមនឹងសម្រស់ធម្មជាតិដ៏សម្បូរបែប ដែលភ្ញៀវទេសចរអាចឡើងលើកំពូលភ្នំមើលថ្ងៃលិចនៅក្រុងសិរីសោភ័ណពីលើទាំងមូលបានផងដែរ ជាពិសេសក៏មានល្អាងដ៏ល្អឥតខ្ចោះមួយ ដែលអាចឱ្យភ្ញៀវទេសចរចូលលេងកម្សាន្តបានប្រកបដោយសុវត្ថិភាព និងសេចក្តីសប្បាយរីករាយទៀតផង។
៤.រមណីយដ្ឋានសួនស្នេហ៍ជនបទ៖ គឺជារមណីយដ្ឋានមួយដែលកំពុងទទួលបានការចាប់អារម្មណ៍ខ្លាំងពីភ្ញៀវទេសចរ ដែលស្ថិតនៅក្នុងក្រុងសិរីសោភ័ណ ខេត្តបន្ទាយមានជ័យ។ សួនស្នេហ៍ជនបទ ពិតជាមានទេសភាពស្អាតខ្លាំងណាស់ បូករួមនឹងសួនផ្កាជាច្រើនប្រភេទ បរិយាកាសស្រស់ស្រាយបរិសុទ្ធ ធ្វើឱ្យភ្ញៀវទេសចរមិនដែលរំលងរមណីយដ្ឋានកែឆ្នៃមួយនេះឡើយ៕
