ប្រទេសចិន៖ នៅត្រីមាសទីបីនៃឆ្នាំ ២០២៤ ប្រាក់ចំណូលរបស់ BYD គឺបានកើនឡើង ២៤% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ ២៨.២៤ ពាន់លានដុល្លារអាមេរិក ដែលនេះលើសពីប្រាក់ចំណូលរបស់ក្រុមហ៊ុន Tesla ទៅទៀត ខណៈប្រាក់ចំណូល Tesla មានត្រឹមតែ ២៥.២ ពាន់លានដុល្លារប៉ុណ្ណោះ។.png)
យោងតាម CNBC ក្រុមហ៊ុនរថយន្តអគ្គិសនីចិន BYD ទើបតែបានប្រកាសពីប្រាក់ចំណូល និងប្រាក់ចំណេញរបស់ខ្លួនកាលពីពេលថ្មីៗនេះទេ ដោយពួកគេបាននិយាយថា ប្រាក់ចំណូលនៅត្រីមាសទីបីរបស់ខ្លួន គឺបានកើនឡើងរហូតដល់ ២៤% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ ២៨.២៤ ពាន់លានដុល្លារអាមេរិក ដោយបានវ៉ាដាច់ក្រុមហ៊ុន Tesla ជាលើកដំបូងក្នុងរយៈពេលដូចគ្នាជាមួយនឹង ២៥.២ពាន់លានដុល្លារអាមេរិក។.png)
ខណៈប្រាក់ចំណេញសុទ្ធនៅត្រីមាសទីបីរបស់ BYD វិញក៏បានកើនឡើងខ្លាំងផងដែររហូតដល់ ១១.៥% ឈានដល់ ១.៦៣ ពាន់លានដុល្លារ។ ដូច្នេះក្នុងរយៈពេល ៩ ខែដំបូងនៃឆ្នាំនេះ ប្រាក់ចំណេញសុទ្ធរបស់ BYD គឺបានកើនឡើង ១៨.១% ឈានដល់ ៣.៥៤ ពាន់លានដុល្លារអាមេរិក។
បច្ចុប្បន្ន BYD កំពុងនាំមុខគេក្នុងការលក់រថយន្តអគ្គិសនីទូទាំងពិភពលោក ដោយសារការបញ្ចុះតម្លៃយ៉ាងខ្លាំងលើម៉ូដែលដែលលក់ដាច់បំផុត។ នេះបើតាមប្រភពដដែលបានឱ្យដឹងទៀតថា BYD បច្ចុប្បន្នលក់បានជាង ៩០% នៃយានយន្តរបស់ខ្លួននៅក្នុងប្រទេសចិន ដោយបានកំណត់គោលដៅលក់ប្រចាំឆ្នាំខ្ពស់បំផុតសម្រាប់ឆ្នាំ ២០២៤។
នេះមានន័យថា BYD ដែលជាក្រុមហ៊ុនផលិតរថយន្តឈានមុខគេរបស់ប្រទេសចិនគឺកំពុងស្ថិតនៅជួរមុខក្នុងទីផ្សារអាស៊ី និងអឺរ៉ុបទោះបីជាប្រឈមនឹងពន្ធបន្ថែមក៏ដោយ។ នៅក្នុងត្រីមាសទី ៣ ក្រុមហ៊ុនបានលក់រថយន្តចំនួន ៩៤,៤៧៧ គ្រឿងនៅក្រៅប្រទេស កើនឡើង ៣២.៦% ធៀបនឹងរយៈពេលដូចគ្នាកាលពីឆ្នាំមុន។ ហេតុនេះក្នុងរយៈពេល ៩ ខែកន្លងមក ក្រុមហ៊ុនគឺបានលក់រថយន្តអស់ចំនួន ៥០០,០០០ គ្រឿងហើយ៕
