នាថ្ងៃទី១៥ ខែតុលា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញបទបញ្ជាផ្លាស់ប្ដូរក្បាលម៉ាសុីនដឹកនាំពន្ធនាគារ ម១ ក្រោយមានការបង្ហោះវីដេអូចិនផឹកសុីយ៉ាងសប្បាយរីករាយនៅក្នុងពន្ធនាគារ។
តាមសេចក្តីប្រកាសពី ឯកឧត្តម ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ នៅថ្ងៃទី១៦ ខែតុលា ឆ្នាំ២០២៤នេះ បានចេញអនុក្រឹត្យតែងតាំង លោកឧត្តមអគ្គានុរក្សថ្នាក់លេខ១ នុត សវនា ឱ្យទទួលបន្ទុកជាប្រធានមណ្ឌលអប់រំកែប្រែទី១។
លោក នុត សវនា ប្រធានម១ថ្មី បានលើកឡើងថា៖” នេះជាវីដេអូចាស់តាំងពីឆ្នាំ២០២៣ ដោយម្នាក់នៅក្នុងវីដេអូនោះត្រូវបានដោះលែងកាលពីខែឧសភា ឆ្នាំ២០២៤ ទើបមានការបែកធ្លាយវីដេអូបែបនេះ”។
គួរបញ្ជាក់ផងដែរថា អគ្គនាយកដ្ឋានពន្ធនាគារ នៃក្រសួងមហាផ្ទៃ បានចាត់ក្រុមការងារចុះស្រាវជ្រាវលើករណីនេះកាលពីថ្ងៃទី១៦ ខែតុលា ដើម្បីធានាឱ្យបាននូវសុចរិតភាព សុក្រិតភាព និងប្រសិទ្ធភាព ស្របតាមច្បាប់ស្តីពីពន្ធនាគារនៅកម្ពុជា៕
