កម្មវិធីប្រកួតសម្រស់ដែលបង្កើតឡើងដោយស្នាដៃកូនខ្មែរ Miss Planet International នឹងត្រៀមស្វាគមន៍យ៉ាងកក់ក្តៅទទួលបវរកញ្ញាជាង៧០ប្រទេសមកពីជុំវិញពិភពលោកប្រកួតលើទឹកដីប្រទេសកម្ពុជាដែលជាម្ចាស់ផ្ទះ។ ដូច្នេះប្រជាជនកម្ពុជាកុំភ្លេចចូលរួមគាំទ្រកម្មវិធីមួយនេះឱ្យបានច្រើនដើម្បីបង្ហាញពិភពលោកថា កម្ពុជា មានសម្បត្តិវប្បធម៌ អរិយធម៌ចំណាស់ជាងគេនៅអាស៊ីអាគ្នេយ៍។
នៅព្រឹកថ្ងៃទី១២ តុលា ក្រសួងទេសចរណ៍បានប្រកាសជូនដំណឹងដល់សាធារណជនថា«បវរកញ្ញាជាង ៧០ប្រទេស នឹងមកកម្ពុជា ប្រកួតបវរកញ្ញាភពផែនដីអន្តរជាតិ ឆ្នាំ២០២៤ នៅខែក្រោយ។ ការប្រកួតបវរកញ្ញាភពផែនដីអន្តរជាតិ ឆ្នាំ២០២៤ ដែលកម្ពុជាទទួលធ្វើជាម្ចាស់ផ្ទះជាលើកទី៤ នឹងត្រូវប្រព្រឹត្តិទៅពីថ្ងៃទី១៩ ដល់ថ្ងៃទី២៧ ខែវិច្ឆិកា ឆ្នាំ២០២៤ ហើយនេះក៏ជាកម្មវិធីដែលបង្កើតឡើងដោយកូនខ្មែរយើងផងដែរ»។.png)
Miss Planet International ហៅកាត់ថា MPI គឺជាកម្មវិធីប្រកួតសម្រស់អន្តរជាតិប្រចាំឆ្នាំ ដែលមានមូលដ្ឋានក្នុងប្រទេសកម្ពុជា។ MPI គឺជាស្ថាប័នមួយ ដែលផ្អែកលើគោលដៅអភិវឌ្ឍប្រកបដោយចីរភាព របស់អង្គការសហប្រជាជាតិ (UN) ពោលគឺហេតុផលនេះហើយ ទើបគេបង្កើតកម្មវិធីប្រកួតប្រជែង ដើម្បីស្វែងរកឯកអគ្គរដ្ឋទូត សម្រាប់ប្រទេសនីមួយៗ។ តាំងពីបង្កើតឡើងនៅឆ្នាំ២០១៩ MPI តែងតែត្រូវបានរៀបចំឡើងរៀងរាល់ឆ្នាំ លើកលែងតែឆ្នាំ២០២១ និង ២០២២ ដោយសារបញ្ហាជំងឺរាតត្បាត។
គួរឱ្យដឹងថាក្នុងឆ្នាំនេះបវរកញ្ញា ដេត ស្រីនាឌ ជា Miss Planet Cambodia 2024 នឹងចូលរួមតំណាងឱ្យប្រទេសកម្ពុជាប្រកួត MPI 2024 ។ នាងត្រូវបានអ្នកគាំទ្រចាត់ទុកថាជាបវរកញ្ញាមានអត្តចរិតគួរឱ្យស្រលាញ់ មានចំណេះដឹង មានសមត្ថភាពខ្លាំងផងដែរ។ កាលពីឆ្នាំមុនបវរកញ្ញាដែលតំណាងកម្ពុជាប្រកួតក្នុងកម្មវិធី Miss Planet International គឺ ដាំ សុភ័ក្រស៊ីនឌី បានជាប់លំដាប់រងទី៧ ក្នុងការប្រកួតនេះ៕
