ពលរដ្ឋស្នាក់នៅអគារអង្គរមានជ័យ បានឯកភាពទទួលយកដំណោះស្រាយគោលនយោបាយ ចាកចេញពីអគារក្រោមការសម្របសម្រួលពីក្រសួងរៀបចំដែនដី នគរូបនីយកម្ម និងសំណង់។
អគារអង្គរមានជ័យ សាងសង់ឡើងតាំងពីឆ្នាំ១៩៥០ មកទល់បច្ចុប្បន្នមានសភាពចាស់ជរាទ្រុឌទ្រោមគួរឱ្យភ័យខ្លាច ដោយមានស្នាមប្រេះស្រាំជាច្រើនកន្លែង និងគ្មានការជួសជុលឱ្យបានត្រឹមត្រូវតាមលក្ខណៈបច្ចេកទេសអស់រយៈពេលជាយូរឆ្នាំ។
ដោយមើលឃើញពីស្ថានភាពនៃការគ្រោះថ្នាក់នេះ ទើបរដ្ឋបារាជធានីភ្នំពេញ និងក្រសួងរៀបចំដែនដី បានជួបពិភាក្សាជាមួយប្រជាពលរដ្ឋដែលស្នាក់នៅក្នុងអគារនេះម្តងហើយម្តងទៀតអស់ជាច្រើនឆ្នាំ ដើម្បីស្វែងរកដំណោះស្រាយ ធ្វើយ៉ាងណាដើម្បីឱ្យប្រជាពលរដ្ឋទាំងអស់ ចៀសបាននូវហានិភ័យផ្សេងៗដែលនឹងកើតចេញពីអគារចាស់នេះ។
គួរបញ្ជាក់ផងដែរថា អគារអង្គរមានជ័យ មានទីតាំងនៅទល់មុខអតីតអគារពាណិជ្ជកម្ម ប៊ីអេស នៅកាច់ជ្រុងមហាវិថីព្រះមុនីវង្ស កែងមហាវិថីកម្ពុជាក្រោម ទល់មុខនឹងអគារ WING TOWER ស្ថិតនៅខណ្ឌ៧មករា កសាងឡើងក្នុងឆ្នាំ១៩៥០៕
