តារាចម្រៀង លីម តិចម៉េង ជារឿយៗបានបង្ហាញពីភាពសាមញ្ញរបស់ខ្លួនជាក់ស្តែងថ្មីៗនេះលោកក៏បានលើកឡើងថាលោកផឹកកាហ្វេមួយកញ្ចប់៥០០រៀលប៉ុណ្ណោះ។ ការមិននិយមបង្ហាញសមកម្មភាពទិញរបស់ប្រ៊េនៗ លេងខ្លួនហ៊ឺហាទៅតាមសម័យកាលសម្ភារៈនិយម លីម តិចម៉េង ក៏បានស្រាយចម្ងល់មូលហេតុដែលលោកមិនប្រើរបស់ថ្លៃៗប្រ៊េនៗនេះ។
នៅថ្ងៃទី១២ ខែកញ្ញា ម្ចាស់ពាន Cambodian Idol រដូវកាលទី៤ បានបង្ហោះវីដេអូខ្លីមួយដោយបានដាក់ចំណងជើងថា «ធ្វើម៉េចបើខ្ញុំអ្នកស្រែចំការ គិតឃើញតែរឿងបែបនេះ»។ វីដេអូរយៈពេល១នាទីនេះ តិចម៉េង បាននិយាយថា«នេះជាវីដេអូខ្លីឆ្លងតបទៅកាន់អ្នកមួយចំនួនដែលឆ្ងល់ហេតុអ្វីបានជាលោកមិនសម្ភារៈនិយម មិនប្រើរបស់ប៊្រេនៗថ្លៃៗទៅតាមអាជីពការងាររបស់ខ្លួនជាតារាចម្រៀងមួយរូបជាសិល្បករមួយរូប។ តិចម៉េង ថាមិនមែនខ្លួនលោកមិនចង់នោះទេតែលោកក្រអត់លុយគ្មានអ្នកណាមិនចង់ប្រើរបស់ប្រ៊េន របស់ថ្លៃនោះទេ»។
ម្ចាស់បទ «ពេលណាអូនបែកគ្នាជាមួយអ្នកថ្មី» បានបន្ថែមទៀតថា លោកយកលុយមក កែលម្អផ្ទះឱ្យស្អាតសន្សំមកពីការងារផ្សេងៗដូចជាការងារសិល្បៈ ហើយនៅសល់ប៉ុន្មានលោកចំណាយទៅលើម្តាយឈឺ ប្អូនរៀន ប្អូនឈឺផ្សេងៗទៅតាមអ្វីដែលខ្លួនធ្វើបានលោកមិនបានគិតគូរទៅលើសម្ភារៈនិយមរបស់ប្រ៊េនអ្វីនោះទេសង្ឃឹមថាទស្សនិកជននឹងយោគយល់ដល់លោក។
ភាពសាមញ្ញរបស់ លីម តិចម៉េង នេះបានធ្វើឱ្យអ្នកគាំទ្រជាច្រើនសរសើរដល់លោកថា រស់នៅសាមញ្ញតែថ្លៃថ្នូរ និងបង្ហាញថាស្រលាញ់ត្រង់ភាពសាមញ្ញរបស់ លីម តិចម៉េង នេះឯង៕
