ម្លិះ គឺជាផ្កាមួយប្រភេទដែលមានក្លិនក្រអូបឈ្ងុយ និងសម្បូរមានខ្លាំងណាស់នៅក្នុងប្រទេសកម្ពុជាយើង ដោយភាគច្រើនមនុស្សតែងតែបេះវាយកទៅថ្វាយព្រះ។ ទោះជាយ៉ាងណាវាមិនត្រឹមតែជាផ្កាល្អសម្រាប់ថ្វាយព្រះនោះទេ ផ្កាម្លិះក៏ល្អចំពោះសុខភាព និងសម្រស់ផងដែរ។ ផ្កាម្លិះសម្បូរទៅដោយសារធាតុប្រឆាំងអុកស៊ីតកម្ម ដែលជួយផ្ចិតរន្ធញើស ការពារស្បែកពីកាំរស្មីយូវី និងព្យាបាលមុន ផ្តល់សំណើមដល់ស្បែក ជួយកាត់បន្ថយភាពចាស់មុនអាយុ និងកំចាត់ក្លិនអាក្រក់ចេញពីរាងកាយ។ ដូច្នេះហើយខាងក្រោមនេះគឺជារូបមន្តថែរក្សាសម្រស់ ៤ យ៉ាងពីផ្កាម្លិះ៖
១.ព្យាបាលមុន៖ គ្រឿងផ្សំមានទឹកក្តៅ ២ ពែង ផ្កាម្លិះស្រស់មួយក្តាប់តូច និងទឹកដោះគោស្រស់ ១-២ ស្លាបព្រាបាយ។ របៀបធ្វើ ដាក់ផ្កាម្លិះចូលទៅក្នុងទឹកក្តៅ បន្ទាប់មកស្រង់ផ្កាម្លិះ រួចយកទៅបុកឱ្យម៉ត់បន្ថែមទឹកដោះគោស្រស់ចូល លាបល្បាយនេះលើមុខរបស់អ្នក ហើយទុកចោល ១០ នាទីលាងសម្អាតនឹងទឹកត្រជាក់ជាការស្រេច។
២.ធ្វើឱ្យស្បែកសស្អាត៖ ផ្កាម្លិះ ក៏ត្រូវបានគេប្រើជាគ្រឿងផ្សំសម្រាប់ងូតទឹកផងដែរ ដោយអ្នកអាចបន្ថែមផ្កាម្លិះទៅក្នុងទឹក រួចងូតទឹក ដើម្បីជួយឱ្យស្បែករបស់អ្នកស្អាត ភ្លឺថ្លា រលោង និងកំចាត់ក្លិនអាក្រក់ចេញពីរាងកាយ។
៣.ប្រឆាំងភាពចាស់៖ ផ្កាម្លិះមិនត្រឹមតែមានសមត្ថភាពផ្តល់សំណើម ដល់ស្បែកបានយ៉ាងល្អឥតខ្ចោះប៉ុណ្ណោះទេ ប៉ុន្តែថែមទាំងជួយព្យាបាលសញ្ញានៃភាពចាស់នៅលើស្បែកផងដែរ។ ដោយអ្នកគ្រាន់តែបុកផ្កាម្លិះហើយលាយជាមួយទឹកឃ្មុំ និងទឹកដោះគោជូរ ដើម្បីលាបលើមុខ ឬស្បែក បន្ទាប់មកលាងជាមួយទឹកត្រជាក់ជាការស្រេច។
៤.ពង្រឹងសុខភាពសក់៖ គ្រាប់តែបន្ថែមប្រេងផ្កាម្លិះប៉ុន្មានដំណក់ក្នុងសាប៊ូកក់សក់ ឬក្រែមបន្ទន់ អាចជួយធ្វើឱ្យសុខភាពសក់រឹងមាំ និងទន់រលោងស្រស់ស្អាតមានពន្លឺគួរឱ្យកត់សម្គាល់។ ប្រសិនបើអ្នកកំពុងប្រឈមនឹងបញ្ហាអង្គែ ឬកើតចៃ អ្នកអាចប្រើប្រាស់ផ្កាម្លិះស្រស់មកដោះស្រាយបញ្ហានេះបាន។ អ្វីដែលអ្នកត្រូវធ្វើ គឺគ្រាន់តែបុកកំទេចផ្កាម្លិះមួយចំនួន ហើយដាក់កូរលាយវាក្នុងប្រេងដូងក្ដៅឧណ្ហៗ បន្ទាប់មករងចាំដល់ប្រេងដូងចុះត្រជាក់បន្តិច សឹមចាប់ផ្ដើមលាបម៉ាស្សាលើស្បែកក្បាល ដោយធ្វើបែបនេះពី ៤៥ ទៅ ៦០ នាទី មុនពេលអ្នកកក់សក់៕
