លោក ខាន់ ជេមស៍ ជាអ្នកសិល្បៈម្នាក់ប្រឡូកក្នុងអាជីពសិល្បៈអស់រយៈពេលជាង២០ឆ្នាំមកហើយរហូតលោកមានកូនប្រុសម្នាក់ស្រីម្នាក់ដើរតាមគន្លងធ្វើជាអ្នកចម្រៀងដូចឪពុកដែរ។ ទោះជាយ៉ាងណា រយៈពេលចុងក្រោយនេះអ្នកមួយចំនួនបានសម្តែងការមិនពេញចិត្តតារាចម្រៀងរូបនេះដូចមុនឡើយ។
ជាអ្នកចម្រៀងម្នាក់មិនសូវចូលចិត្តបង្ហាញអារម្មណ៍នៅលើបណ្តាញសង្គមស្រាប់តែថ្ងៃទី២៨ សីហា នេះលោក ខាន់ ជេមស៍ បានបង្ហោះសំណេរមួយនៅលើបណ្តាញសង្គមដោយបានរៀបរាប់ថា « បើយើងមិនខំ អ្នកណាមកខំជំនួសយើង រឿងខ្លះបើខំអស់ពីលទ្ធភាពហើយបើមិនសមតាមបំណងទេក៏បណ្តោយតាមនឹងសិនទៅ ត្រូវចាំថាអ្វីៗមិនចេះតែបានតាមចិត្តយើងចង់ទេ»។.png)
ម្ចាស់បទ សម្រែកបេះដូង បានបន្តទៀតថា «បើយើងរវល់គិតអំពីសម្តីរិះគន់ អ្នកនេះមិនចូលចិត្តយើង អ្នកនោះមិនស្រឡាញ់យើង នោះយើងស្ទើរតែគ្មានពេលសោះសម្រាប់ជីវិតខ្លួនឯង… បើយើងអនុញ្ញាតឱ្យសម្តី អ្នកដទៃមានឥទ្ធិពលមកលើជីវិតយើង នោះយើងនឹង តែងតែខំរត់តាមរបស់ក្រៅខ្លួន ពីព្រោះតែចង់គាប់ចិត្ត អ្នកដទៃ…»។ 
លោកបន្ថែមទៀតថា « តាមពិត ធាតុពិតនៃជីវិតយើងគឺគ្រាន់តែអាច ធ្វើអ្វីដែលខ្លួនចង់ធ្វើ ហើយអាចរស់នៅដោយសុខសាន្ត យ៉ាងសាមញ្ញបំផុត។ សម្តីអ្នកដទៃនឹងគ្មានឥទ្ធិពលសម្រាប់យើងប្រសិនបើយើង ស្គាល់ខ្លួនឯងច្បាស់ហើយដឹងថាជីវិតយើងផ្ទាល់នេះ ចង់បានអ្វីឱ្យប្រាកដ… កុំឱ្យសម្តីអ្នកដទៃមកបំផ្លាញ គោលដៅជីវិតរបស់យើង ពីព្រោះអ្នកដទៃមិនបានមក រស់នៅជំនួសជីវិតយើងឡើយ»។
គួរបញ្ជាក់ផងដែរថា តារាចម្រៀង ខាន់ ជេមស៍ និងក្រុមគ្រួសារ បានប្រកាសកាលពីថ្ងៃទី២៧ សីហា បរិច្ចាគធនធានផ្ទាល់ខ្លួនចំនួន ២០លានរៀល ដើម្បីចូលរួមជាមួយរាជរដ្ឋាភិបាល ក្នុងមូលនិធិកសាង ហេដ្ឋារចនាសម្ព័ន្ធ តាមបណ្ដោយព្រំដែន ដើម្បីការពារបូរណភាព ទឹកដី និងជាផ្លូវសេដ្ឋកិច្ចសម្រាប់ការធ្វើពាណិជ្ជកម្មរបស់ប្រជាពលរដ្ឋ និងការអភិវឌ្ឍន៍ប្រទេសជាតិផងដែរ៕
