សំណេរមួយឃ្លាពីលោកជំទាវទ្រី ដាណា បានបង្ហាញនូវសេចក្តីនឹករលឹក ក្តីអាណិតនិងមេត្តា ដែលលើសពីចាហ្វាយនិងកូនចៅ ទៅកាន់អតីតមេចុងភៅរបស់ខ្លួន បានបណ្តាលឲ្យមហាជនជាច្រើនក្តុកក្តួលតាម។
ថ្មីៗនេះ យោងតាមការបង្ហោះនៅលើគេហទំព័រផ្លូវការរបស់លោកជំទាវទ្រី ដាណា បានបង្ហាញរូបភាពជាច្រើនសន្លឹក ដោយភ្ជាប់មកជាមួយខ្លឹមសារយ៉ាងដូច្នេះថា «ថ្ងៃនេះមានអារម្មណ៍ថានឹកបងចុងភៅ! បងប្អូនប្រហែលស្គាល់គាត់ហើយ ជាចុងភៅម្នាក់ដែលខ្ញុំអាណិត ស្រលាញ់បំផុត ដឹងគាត់នៅដល់ណាទេ ដោយសារគាត់ទើបមានគ្រួសារ ក៏សុំទៅនៅជាមួយគ្រួសារវិញ។ ខ្ញុំនៅតែនឹក អាណិតគាត់ ស្រលាញ់គាត់»។
«មុនមកជួបខ្ញុំ គាត់ជាកម្មករសំណង់ម្នាក់។ ខ្ញុំឃើញគាត់ស្គមអាណិតគាត់ អោយគាត់ហូបឆ្ងាញ់ នៅស្រួល មួយរយៈក៏ជូនខ្សែក ខ្សែដៃ គាត់មួយឈុត រាប់ពាន់ដុល្លារ។ កាលឆ្នាំ២០២១ ខ្ញុំឃើញគាត់គ្មានផ្ទះនៅស្រួល ហើយម្ដាយគាត់នៅផ្ទះស្លឹកធ្លុះធ្លាយ ខ្ញុំក៏ចំណាយលុយប្រហែលមួយម៉ឺនដុល្លារ សង់ផ្ទះថ្មជូនគាត់ទៀត។ ថ្ងៃខួបកំណើតគាត់ ខ្ញុំក៏ជូនកាដូ ៥០០$ ដើម្បីសាប្រាយគាត់ ហើយធ្វើការមួយរយៈក៏ផ្ដល់រង្វាន់ម៉ូតូ Scoopy ថ្មីមួយគ្រឿងដល់គាត់ទៀត។ នេះមិនគិតលុយផ្សេងៗ ដែលខ្ញុំជូនគាត់ លើកទឹកចិត្តពីលើប្រាក់ខែផង។ ការងារផ្សេងៗ មិនថាទៅខេត្ត ឬមានកម្មវិធីអ្វីមួយ ឬចូលឆ្នាំ បុណ្យភ្ជុំ ខ្ញុំតែងជួយគាត់ថែម មិនដែលភ្លេចទេ ក៏ព្រោះតែពាក្យថាអាណិតនេះហើយ»។
លោកជំទាវបន្តទៀតថា«នៅជាមួយខ្ញុំ គាត់ឧស្សាហ៍ព្យាយាមណាស់ តែដោយសារគាត់មានគ្រួសារ មិនអាចនៅជាមួយខ្ញុំបន្ត ទើបគាត់សុំទៅធ្វើការនៅខាងក្រៅវិញ។ មុនឈប់ ខ្ញុំក៏ជូនគាត់ ១០០០$ ទៀតបន្ថែមលើប្រាក់ខែ ដើម្បីជាដើមទុន។ ខ្ញុំមានតែពាក្យជូនពរបង សូមអោយបងជោគជ័យក្នុងជីវិត នៅតែចងចាំបងជានិច្ច!»៕
