ប្រទេសកាណាដា ៖ ជាទូទៅ យើងអាចឮសូរសំឡេងមនុស្សជជែកគ្នា ឬសំឡេងយានជំនិះបើកបរនៅក្បែរៗខ្លួនតែប៉ុណ្ណោះ ប៉ុន្តែអ្នកភូមិមួយនៅប្រទេសកាណាដាបានឮសូរសំឡេងមនុស្សជជែកគ្នានៅឆ្ងាយពីភូមិ រហូតដល់ទៅ៥គីឡូម៉ែត្រ ។ តើលោកអ្នកឆ្ងល់ទេថា ហេតុអ្វីទើបពួកគេអាចស្តាប់ឮសំឡេងបានឆ្ងាយបែបនេះ?
បើស្តាប់ទៅ ពិតជាពុំគួរឱ្យជឿទេ យើងអាចគិតថា វាគ្រាន់តែជារឿងកុហកប៉ុណ្ណោះ ។ ប៉ុន្តែវាបានកើតឡើងក្នុងភូមិមួយស្ថិតនៅភាគពាយ័ព្យប្រទេសកាណាដា ហើយភូមិនេះមានចំណុចគួរឱ្យចាប់អារម្មណ៍ហួសពីការស្មាន ។
កាលពីរដូវរងា គិតចាប់ពីថ្ងៃទី១៧ ខែមករា រហូតដល់ថ្ងៃទី៥ ខែកុម្ភៈ ឆ្នាំ១៩៤៧ លោក កូដុន ធូឡេត ជាភ្នាក់ងារត្រួតពិនិត្យអាកាសធាតុ បានវាស់សីតុណ្ហភាពនៅបរិវេណអាកាសយានដ្ឋានតូចមួយក្នុងភូមិ Snag តំបន់ Yukon ប្រទេសកាណាដា ។ ការវាស់សីតុណ្ហភាពរបស់លោកពេលនោះ គឺបានត្រឹមតែ -៦២,២អង្សារសេ និងពុំអាចវាស់អាកាសធាតុត្រជាក់ខ្លាំងបានទេ ។
ហេតុនេះ លោកបានផលិតឧបករណ៍ពិសេសមួយសម្រាប់វាស់សីតុណ្ហភាព ។ នៅថ្ងៃទី៣ ខែកុម្ភៈ ឆ្នាំ១៩៤៧ ជាអំឡុងពេលសីតុណ្ហភាពទាបបំផុត ហើយលោក កូដុន អាចវាស់សីតុណ្ហភាពស្មើនឹង -៦៤អង្សារសេ ។ នេះជាស្ថិតិដែលបានកត់ត្រាទុកថា គឺជាថ្ងៃត្រជាក់បំផុតនៅប្រទេសកាណាដា ។
អាកាសធាតុត្រជាក់ខ្លាំងបានធ្វើឱ្យខ្យល់ដង្ហើមរបស់ពលរដ្ឋកាណាដាសម័យនោះក្លាយជាផ្សែងពណ៌ស ហើយការជជែកគ្នាក៏ឮកាន់តែឆ្ងាយ ។ ស្តាប់មើលទៅ គួរឱ្យអស់សំណើច ប៉ុន្តែបើយើងស្ថិតនៅក្រៅផ្ទះចាប់ពី២នាទី ទៅ៣នាទី គឺរាងកាយយើងនឹងក្លាយជាទឹកកក ។ ពេលអាកាសធាតុត្រជាក់ខ្លាំងមានផលប៉ះពាល់មួយយ៉ាងចម្លែក ហើយអ្នកភូមិ Snag រាយការណ៍ថា ពួកគេបានឮសំឡេងនៅឆ្ងាយពីខ្លួនរហូតដល់៥គីឡូម៉ែត្រ ។ ដូច្នេះ ពេលសីតុណ្ហភាពត្រជាក់ខ្លាំង វានឹងធ្វើឱ្យរលកសំឡេងកាន់តែខុសប្លែកពីមុន ។ 
ថ្ងៃមួយ លោក កូដុន បានទៅវាស់សីតុណ្ហភាពនៅអាកាសយានដ្ឋាន លោកមើលពុំឃើញអ្វីនៅជុំវិញខ្លួនទេ ក្រៅពីដុំទឹកកកគ្របដណ្តប់ពេញទីវាលទាំងអស់ ។ ប៉ុន្តែអ្វីដែលធ្វើឱ្យលោកភ្ញាក់ផ្អើលខ្លាំងនោះ គឺលោកបានឮសំឡេងឆ្កែព្រុសក្នុងភូមិមួយ ខណៈឆ្កែទាំងនេះនៅឆ្ងាយពីលោក រហូតដល់៦គីឡូម៉ែត្រ ។ លើសពីនេះ លោកបានឮសំឡេងទឹកកកធ្លាក់ដូចគ្នានឹងស្នូរកាំភ្លើង ដែលវានៅឆ្ងាយពីលោកចម្ងាយ១.៦គីឡូម៉ែត្រ ។ ហេតុអ្វីលោក កូដុន និងអ្នកភូមិអាចឮសំឡេងឆ្ងាយពីខ្លួន?
អាថ៌កំបាំងនៃការឮសំឡេងនេះ គឺសីតុណ្ហភាពបានប៉ះពាល់ដល់រលកសំឡេងក្នុងពេលអាកាសធាតុត្រជាក់ខ្លាំង ហើយវានឹងធ្វើឱ្យពួកគេអាចឮសំឡេងនៅឆ្ងាយៗពីខ្លួន ។ ហេតុនេះ ទើបអ្នកភូមិអាចឮសំឡេងមនុស្សជជែកគ្នា ដែលនៅឆ្ងាយពីខ្លួនជាច្រើនគីឡូម៉ែត្រ ។ បើមានទឹកកកធ្លាក់ខ្លាំងធ្វើឱ្យអ្នកភូមិកាន់តែឮសំឡេងប្លែកៗ ហើយពួកគេពុំដឹងពីប្រភពសំឡេងទេ និងគិតថា ជាសំឡេងអាថ៌កំបាំងរបស់ពួកអមនុស្ស ៕
