ប្រទេសថៃ ៖ កាលពីថ្ងៃទី២៣ ខែកក្កដា ឆ្នាំ២០២៤ សារព័ត៌មានថៃរាយការណ៍ថា មន្ត្រីប៉ូលិសចូលនិវត្តន៍ពីការងារម្នាក់បានយកលុយមកបិទពេញរថយន្តរបស់ខ្លួនដើម្បីចែកឱ្យជនក្រីក្រ ។ មន្ត្រីប៉ូលិសចូលនិវត្តន៍និយាយថា បើឃើញមានចន្លោះកន្លែងណា គឺនឹងយកលុយមកបិទលើរថយន្តបន្ថែមទៀត ហើយក្រៅពីលុយ ក៏មាននំចំណី, ភេសជ្ជៈ និងសម្លៀកបំពាក់ចែកជូនអ្នកខ្វះខាតផងដែរ ។
អ្នកប្រើប្រាស់ TikTok ម្នាក់ឈ្មោះ «arm_yimyim25» បានបង្ហោះវីដេអូមួយបង្ហាញពីមន្ត្រីប៉ូលិសចូលនិវត្តន៍ម្នាក់យកលុយមកបិទពេញរថយន្តរបស់ខ្លួន ដើម្បីចែកជូនអ្នកខ្វះខាត ព្រមទាំងសរសេរថា «បើបាត់លុយ គ្រាន់តែយកលុយមកបិទលើរថយន្តជាថ្មី» ។
លោក Narubet Meema ជាម្ចាស់វីដេអូបាននិយាយមកកាន់សារព័ត៌មានថា កាលពីថ្ងៃទី១៧ ខែកក្កដា កន្លងមក លោកបាននាំសាច់ញាតិទៅទីក្រុងបាងកក ហើយលោកបានដើរលេងក្នុងផ្សារនៅតំបន់ឡាតក្រាក់បាំង ជាមួយមិត្តភក្តិ ។ ពេលនោះ លោកបានជួបអ៊ំប្រុសម្នាក់កំពុងតែបិទលុយលើរថយន្ត ក្នុងនោះមានចាប់ពីក្រដាស២០បាត រហូតដល់១.០០០បាត ។
លោក និងមិត្តភក្តិឃើញហើយភ្ញាក់ផ្អើលយ៉ាងខ្លាំង ហើយមិត្តរបស់លោកប្រាប់លោកឱ្យសាកសួរអ៊ំប្រុសខាងលើ ។ លោកក៏សួរទៅអ៊ំប្រុសថា ៖ «លោកអ៊ំបិទលុយលើរថយន្តបែបនេះមិនខ្លាចបាត់ ឬមានអ្នកយកលុយទេឬ?» ។ អ៊ំប្រុសឆ្លើយថា ៖ «បើបាត់លុយ គ្រាន់តែយកលុយថ្មីមកបិទលើរថយន្តថែមទៀត» ។ ប្រយោគបែបនេះធ្វើឱ្យលោកស្រឡាំងកាំង និងចាប់អារម្មណ៍យ៉ាងខ្លាំង ។
អ៊ំប្រុសបន្តថា អ្នកខ្វះខាតអាចមកយក ឬសុំលុយបាន ប៉ុន្តែកុំលួចលុយទៅបានហើយ ។ ពេលលោក Narubet Meema កំពុងតែឈរមើលនោះ អ៊ំប្រុសពុំបានចែកលុយឱ្យមនុស្សគ្រប់គ្នាទេ ប៉ុន្តែអ៊ំប្រុសនឹងមើលថា បើអ្នកមកសុំលុយពុំបានខ្វះខាតទេ អ៊ំប្រុសនឹងមិនចែកលុយឱ្យទេ ពីព្រោះគាត់ចង់ផ្តល់លុយឱ្យជនក្រីក្រពិតប្រាកដ ឬគ្មានលុយហូបបាយប៉ុណ្ណោះ ។ អ៊ំប្រុសបញ្ជាក់ថា នឹងចតរថយន្តនៅតាមផ្លូវ ហើយអត់ខ្លាចបាត់លុយទេ ។
អ៊ំប្រុសរូបនេះឈ្មោះ ចាធីន ជាអតីតមន្ត្រីប៉ូលិសចូលនិវត្តន៍ពីការងារយូរហើយ ហើយមូលហេតុដែលអ៊ំប្រុសធ្វើបែបនេះ ដើម្បីឱ្យអ្នកធ្វើដំណើរឆ្លងកាត់ឃើញហើយចូលមកជជែកជាមួយ ។ ប៉ុន្តែមនុស្សភាគច្រើនយល់ឃើញថា អ៊ំប្រុសជាមនុស្សឆ្កួត ដែលយកលុយជាច្រើនមកបិទលើរថយន្ត ហើយពួកគេពុំហ៊ានមកជជែកឡើយ ។
ក្រៅពីចែកលុយហើយ អ៊ំប្រុសនៅមាននំចំណី, ភេសជ្ជៈ និងសម្លៀកបំពាក់សម្រាប់ចែកជូនអ្នកខ្វះខាតផងដែរ ។ រីឯរឿងផ្ទះសម្បែង និងក្រុមគ្រួសាររបស់អ៊ំប្រុស គឺលោក Narubet Meema ពុំបានសាកសួរទេ ។ ប៉ុន្តែបើតាមការសាកសួរមនុស្សផ្សេងទៀតឱ្យដឹងថា អ៊ំប្រុសតែងតែបើករថយន្តនៅតំបន់ឡាតក្រាក់បាំង ជាញឹកញាប់ ៕
