ដ្បិតថារៀបចំកម្មវិធីប្រកួតបវរកញ្ញាផ្សេងគ្នាក្តីប៉ុន្តែលោក អ៊ិន វិចិត្រ បានចូលរួមសម្តែងក្តីត្រេកអរចំពោះលោកស្រី អ៊ឹម សុគន្ធា ND Miss Grand Cambodia ក្នុងឱកាសទទួលរៀបចំកម្មវិធី Miss Grand International ដោយបានលើកឡើងថានេះជាការលះបង់ដ៏ធំដើម្បីជាតិព្រោះត្រូវការចំណាយច្រើនហើយព្រឹត្តិការណ៍នេះនឹងលើកមុខមាត់ជាតិមួយកម្រិតទៀត។ លោកស្រី អ៊ឹម សុគន្ធា វិញក៏រំពឹងដែរថាការរៀបចំនេះនឹងរួមចំណែកមួយក្នុងការពង្រីកលើវិស័យទេសចរណ៍ឱ្យកាន់តែខ្លាំងឡើងខណៈបរវកញ្ញាជុំវិញពិភពលោក៧២ប្រទេសនឹងមកដល់ប្រទេសកម្ពុជាឆាប់ៗ។
អ្នកគាំទ្រវិស័យបវរកញ្ញាទាំងក្នុងស្រុកនិងក្រៅស្រុកមានការភ្ញាក់ផ្អើលអមដោយការរំភើបចិត្តមិនតិចនោះទេបន្ទាប់ពីស្ថាប័ន Miss Grand International បានប្រកាសកាលពីថ្ងៃទី៣០ កក្កដា ថាប្រទេសកម្ពុជានិងប្រទេសថៃនឹងធ្វើជាម្ចាស់ផ្ទះក្នុងការប្រកួតឆ្នាំនេះ។ មិនត្រឹមតែទស្សនិកជនប៉ុណ្ណោះទេដែលសប្បាយចិត្តចំពោះដំណឹងនេះស្របពេលនេះជាលើកដំបូងសម្រាប់កម្ពុជាដែលមានឱកាសរៀបចំកម្មវិធីដ៏ល្បីល្បាញមួយនេះសូម្បីអ្នករៀបចំផ្ទាល់ក៏រំភើបចិត្តដូចគ្នា។

លោកស្រី អ៊ឹម សុគន្ធា បានសរសេរនៅលើបណ្តាញសង្គមរបស់ខ្លួនបង្ហាញពីអារម្មណ៍ដែលទទួលបានឱកាសរៀបចំកម្មវិធីអន្តរជាតិនេះទោះបីជាពេលវេលានេះមិនទាន់ស័ក្តិក៏ដោយ។ ND Miss Grand Cambodia បានរៀបរាប់ថា «ទឹកភ្នែកខ្ញុំហូរដោយមិនដឹងខ្លួនហេតុអីបានជាខ្ញុំរំភើបម្ល៉េះហើយក៏មានអារម្មណ៍ថាភ័យដែរ ពីព្រោះជាលើកទីមួយសម្រាប់ខ្ញុំ ហើយអរគុណបងប្អូនហ្វេនទាំងអស់គ្នាបើមិនមានកម្លាំងចិត្តពីអ្នកទាំងអស់គ្នាទេ នាងខ្ញុំក៏មិនអាចធ្វើបានដែរ។ នាងខ្ញុំខិតខំដើម្បីមុខមាត់ប្រទេសជាតិហើយ ខ្ញុំមិនចង់បានអ្វីទេ ចង់ឱ្យតែប្រទេសកម្ពុជាយើងរីកចម្រើន ហើយឱ្យប្រទេសផ្សេងបានមកស្គាល់Cambodia ឱ្យកាន់តែច្រើនឡើង។
លោកស្រី អ៊ឹម សុគន្ធា បានបន្តទៀតថា «ទោះក្នុងពេលវេលានេះមិនទាន់ស័ក្តិសម100%ក៏ដោយតែបើយើងមិនធ្វើក៏យើងមិនដឹងដែលថាលទ្ធផលនឹងត្រលប់មកវិញយ៉ាងណាដែរតែនាងខ្ញុំគិតថាឱកាសនេះ ពេលវេលាមួយនេះហើយដែលត្រូវជួយគ្នាបន្ថែម មិនអាចកាន់តែស្ងាត់ កាន់តែមិនធ្វើអីនោះទេ…ធ្វើបានកម្រិតណាក៏ដោយ ឱ្យតែមានឱកាសយើងត្រូវតែធ្វើឡើង មិនខុសអីពីការរកស៊ីទេ សង្ឃឹមថាឱ្យភ្ញៀវមកទិញយើងទាល់តែយើងចេះប្រម៉ូតផលិតផលមួយនោះថាមានអ្វីពិសេសខ្លះដែលធ្វើឱ្យគេចាប់អារម្មណ៍ ទិញតិចរឺក៏ច្រើនមិនសំខាន់យើងត្រូវតែប្រឹងប្រម៉ូតឱ្យច្រើនបំផុតដែលអាចធ្វើបាន ខ្ញុំជឿជាក់ថាជោគជ័យនឹងមិនរត់ចោលអ្នកតស៊ូព្យាយាមឡើយ»។
«សង្ឃឹមថាកម្មវិធីMiss Grand Cambodia រួមជាចំណែកមួយក្នុងការពង្រីកលើវិស័យទេសចរណ៍ឱ្យកាន់តែខ្លាំងឡើង ដើម្បីទាក់ទាញភ្ញៀវពីជុំវិញពិភពលោកឱ្យមកទស្សនាប្រទេសកម្ពុជា។ បរវកញ្ញាជុំវិញពិភពលោក៧២ប្រទេស ពួកគាត់នឹងមកដល់ប្រទេសកម្ពុជាក្នុងពេលឆាប់ៗខាងមុខនេះ ហើយនាងខ្ញុំសូមឱ្យក្រសួងពាក់ព័ន្ធទាំងអស់ជួយជ្រោមជ្រែង និងសម្របសម្រួលដល់កម្មវិធីផង»។
ទន្ទឹមនឹងការលើកឡើងរបស់ ND Miss Grand Cambodia ក្នុងការធ្វើជាម្ចាស់ផ្ទះជាមួយប្រទេសថៃ លោក អ៊ិន វិចិត្រ នាយកប្រតិបត្តិក្រុមហ៊ុន Mediaload ដែលមានសិទ្ធរៀបចំការប្រកួត Miss Teen និង Miss Pre Teen International Cambodia ក៏បានចូលរួមសម្តែងក្តីត្រេកអរនិងកោតសរសើរចំពោះលោកស្រី អ៊ឹម សុគន្ធា ផងដែរ។ លោកបានលើកឡើងដែរថា
ការទទួលរៀបចំកម្មវិធីលំដាប់សកលលោកបែបនេះ គឺត្រូវចំណាយកំលាំង និងថវិកាជាច្រើន ដូច្នេះនេះជាការលះបង់ដ៏ធំដើម្បីជាតិ។
នាយកប្រតិបត្តិរូបនេះបន្ថែមទៀតថា «ព្រឹត្តិការណ៍នេះនឹងលើកមុខមាត់ជាតិមួយកម្រិ តទៀត ជាពិសេសវិស័យបវរកញ្ញា។ Fans បវរកញ្ញាពិភពលោកនឹងចាប់អារម្មណ៍កម្ពុជា ហើយ Brand Cambodia នឹងកាន់តែល្អប្រសើរឡើង»៕