តារាកំប្លែងដ៏ល្បីឈ្មោះលោក ចែម ចាន់រ៉ា ហៅនាយ ពាក់មី បង្ហាញអារម្មណ៍ហួសចិត្តយ៉ាងខ្លាំងទៅកាន់អ្នកនាង សុទ្ធ បញ្ចកា មានឈ្មោះបណ្តាញសង្គមថា Panhchaka June ដែលជាអតីតភរិយាម្ចាស់ផលិតកម្ម LD គ្រាន់តែយកតួស្រីមកសម្តែងដើម្បីប្រូម៉ូតផលិតផលបែរជានាងប្រើពាក្យសម្តីមិនសមរម្យមកកាន់ខ្លួនឈឺចិត្តស្អិតទ្រូងជំនួសប្រពន្ធលោកទៅទៀត។
នៅព្រឹកថ្ងៃទី១៣ កក្កដា នាយ ពាក់មី បានបង្ហោះគណនីហ្វេកប៊ុកមួយឈ្មោះថា Panhchaka June ដែលនាងមានឈ្មោះពិតថា សុទ្ធ បញ្ចកា ជាអតីតភរិយាលោក លៀក លីដា ម្ចាស់ផលិតកម្ម LD អមដោយចំណងជើងថា « Panhchaka June មើលទៅប្អូនស្រី ដូចជាឈឺចាប់ប្រចណ្ឌជាងប្រពន្ធបងទៀតក្នុងខ្លួនកើតអី ? ខ្ញុំនិងប្រពន្ធខ្ញុំ ជាអ្នកផលិតវីដេអូនេះ វាជាមុខរបរបែបសិល្ប: សំដែង ប្រម៉ូតផលិតផល។ វីដេអូនេះ តើខុសអី? ស្លៀកពាក់ធម្មតាមិនស៊ិចស៊ីហួសហេតុពេក ការសំដែងក៏មិនមានអីជ្រុលជ្រួស សូម្បីតែប៉ះតួស្រីបន្តិចមិនប៉ះផង ពាក្យសម្តីក៏មិនមានពាក្យណាដែលថាជាស្នេហាជាមួយតួស្រី អត់មានទេ គឺទៅជីកទំពាំង ។ ហើយជឿដែរថាទៅថតតែ២នាក់ ក្រុមការងារ ប្រពន្ធខ្ញុំ ក៏ទៅជាមួយដែរ សូមប្អូនស្រីបើកចិត្តឱ្យទូលាយ ហើយគិតថានេះជាកាសម្តែង ដើម្បីឱ្យបងប្អូនមើលលេងកម្សាន្តនិងប្រម៉ូតផលិតផល»។
ការឆ្លើយតបអមដោយការហួសចិត្តរបស់តារាកំប្លែងរូបនេះបន្ទាប់ពីអ្នកនាង « Panhchaka June» បានចែករំលែកវីដេអូរបស់លោកដោយបានប្រើពាក្យសម្តីមិនសមរម្យ។ ក្នុងន័យដែលអតីតភរិយាម្ចាស់ផលិតកម្ម LD លើកឡើងដោយមានពាក្យ «អញ » គឺនាងចង់និយាយក្នុងនាមជាស្រីធ្លាប់ជាប្រពន្ធស្របច្បាប់ម្នាក់ចង់ថាឱ្យតារាកំប្លែងពាក់មីយកមនុស្សស្រីជាច្រើនធ្វើជាឈ្នាន់ កេងប្រវ័ញ្ចយកផលប្រយោជន៍ ធ្វើជាឧបករណ៍ស្រេចតែចិត្តនឹកឃើញ ថែមទាំងចង់បកស្បែកមុខតារាកំប្លែងពាក់មីទៀតព្រោះតែនាងដឹងរឿងតារាកំប្លែងរូបនេះច្បាស់។ ទោះជាយ៉ាងណា បន្ទាប់ពីតារាកំប្លែង ពាក់មី បញ្ចេញមតិប្រតិកម្មរបស់ខ្លួនឆ្លើយតបទៅកាន់អ្នកនាង Panhchaka June សំណេររបស់នាងក៏បានបាត់ចេញពីបណ្តាញសង្គមផងដែរ៕
