ហេតុអ្វីកុលសម្ព័ន្ធមួយក្រុមនេះនិយមដើរនៅលើបង្គោលឈើខ្ពស់ៗ?

ប្រទេសអេត្យូពី ៖ ភ្ញៀវទេសចរដែលបានធ្វើដំណើរមកដល់ប្រទេសអេត្យូពី (ស្ថិតនៅអាហ្វ្រិកខាងកើត) នឹងចាប់អារម្មណ៍ជាមួយពួកកុលសម្ព័ន្ធនេះ រហូតដល់អ្នកខ្លះសុំថតរូបទៀតផង ។ កុលសម្ព័ន្ធនេះឈ្មោះ «Banna» រស់នៅភាគនិរតីប្រទេសអេត្យូពី និងមានគ្នាសរុបប្រមាណ៤៧.០០០នាក់ ។ ពួកគេប្រកបមុខរបរសំខាន់ គឺការបរបា.ញ់ និងចិញ្ចឹមសត្វ ហើយអ្វីដែលធ្វើឱ្យភ្ញៀវទេសចរចាប់អារម្មណ៍នោះ គឺពួកគេមានជំនាញខាងដើរនៅលើបង្គោលឈើខ្ពស់ៗផុតពីដី ។

ការដើរនៅលើបង្គោលខ្ពស់ៗបានធ្វើឱ្យពួកគេល្បីល្បាញ និងលេចធ្លោជាងក្រុមកុលសម្ព័ន្ធផ្សេងទៀតនៅប្រទេសអេត្យូពី ។ រីឯមូលហេតុធ្វើឱ្យពួកគេនិយមដើរនៅលើបង្គោលបែបនេះ គឺដើម្បីគេចពីសត្វកាចសាហាវផ្សេងៗ ដូចជា ៖ ពស់មានពិស, សត្វ Hyenas (ស្រដៀងនឹងឆ្កែព្រៃ) និងសត្វតោ ជាដើម ។ ដូច្នេះ គេជឿថា ការឈរនៅលើបង្គោលខ្ពស់នឹងធ្វើឱ្យសត្វទាំងនេះមើលឃើញពួកគេមានមាឌធំជាងមុន ។

ទោះយ៉ាងណា នេះមិនមែនជាមូលហេតុតែមួយដែលធ្វើឱ្យពួកកុលសម្ព័ន្ធ Banna និយមដើរនៅលើបង្គោលខ្ពស់ទេ ពីព្រោះការដើរនៅលើបង្គោលខ្ពស់ គឺជាវប្បធម៌មួយដែលបន្តតាំងពីយូរយាណាស់មកហើយ ។ បុរសវ័យក្មេងដែលពុំទាន់បានរៀបការនឹងទទួលយកវប្បធម៌នេះ ហើយវប្បធម៌ដើរនៅលើបង្គោលខ្ពស់ទទួលបានការពេញនិយមយ៉ាងខ្លាំងក្នុងពិធីបុណ្យនានា ឬពិធីបុណ្យសាសនារបស់កុលសម្ព័ន្ធ ក៏ដូចជាបង្ហាញពីការផ្លាស់ប្តូរវ័យពីយុវជនទៅជាមនុស្សចាស់ផងដែរ ។

បម្រាមមួយដែលក្រុមកុលសម្ព័ន្ធ Banna ត្រូវអនុវត្តក្នុងអំឡុងពេលដើរនៅលើបង្គោលខ្ពស់ គឺពួកគេត្រូវតែលាបថ្នាំពណ៌នៅលើខ្លួនប្រាណ ។ រីឯបង្គោលឈើដែលពួកគេប្រើប្រាស់អាចមានកម្ពស់ខ្ពស់ផុតពីដីជាច្រើនម៉ែត្រ ខណៈការដើរនៅលើបង្គោលនេះ ក៏ត្រូវមានជំនាញផងដែរ ដូចជា ៖ ត្រូវរក្សាលំនឹងខ្លួន និងមានរាងកាយរឹងមាំល្អ ។ ជាទូទៅ ក្រុមយុវជនអាចដើរនៅលើបង្គោលបានយ៉ាងល្អ និងមើលទៅដូចពួកគេកំពុងតែនាំគ្នារាំរបាំតាមចង្វាក់ភ្លេង ៕