នាដើមខែក្រោយ ពោលគឺនៅថ្ងៃទី៦ ខែមិថុនា ឆ្នាំ២០២៤ នេះ សម្តេចធិបតី នឹងអញ្ជើញចូលរួម ពិធីដាក់សម្ពោធឱ្យប្រើប្រាស់ជាផ្លូវការនូវ កំពង់ផែពហុបំណងកំពតតម្លៃ១៥០០លានដុល្លារ ដែលបានវិនិយោគដោយក្រុមហ៊ុន “កំពត ឡូជីស្ទីក អេន ផត” នៅលើផ្ទៃដី៦០០ហិកតា។
កំពង់ផែនេះ មានទីតាំងស្ថិតនៅ ភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត ដែលមានលទ្ធភាព ឱ្យនាវាផ្ទុកទំនិញទម្ងន់ចាប់ពី ៦០,០០០តោន ដល់ ១០០,០០០តោនអាចចូលសំចតបាន។
ក្រោយការដាក់សម្ពោធឱ្យប្រើប្រាស់ កំពង់ផែនេះនឹងក្លាយជាកំពង់ផែទឹកជ្រៅ និងធំមួយទៀតនៅកម្ពុជា និងដ៏ទំនើបលំដាប់អន្តរជាតិនៅក្នុងតំបន់អាស៊ាន។ គម្រោងនេះនឹងជួយបំពេញបន្ថែមទៅលើកំពង់ផែដែលមានស្រាប់ដូចជា៖ កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ និងជួយជំរុញអនុវត្តឱ្យបានជោគជ័យនូវផែនការមេដើម្បីអភិវឌ្ឍខេត្ដព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ដែលបានដាក់ចុះក្នុងគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥៕
