លោក អ៊ួន បឋម ហៅ សាយ បានប្រកាសពីព្រឹត្តិការណ៍ថ្មីមានឈ្មោះថា «រត់ដោយបេះដូង-RUN BY HEART» ដែលអ្នកចូលរួមអាចរត់ជាមួយកុមារអូទីហ្សឹម ក្នុងរយៈចម្ងាយ ៤០០ ម៉ែត្រ នៅក្នុងបរិវេណតម្រាយផ្លូវរត់ក្នុងទីលានបាល់ទាត់ នៃពហុកីឡដ្ឋានជាតិអូឡាំពិក។ កម្មវិធីនេះធ្វើឡើងមានគោលបំណងក្នុងការរៃអង្គាសថវិកាបន្ថែម ជូនទៅកាន់សាលាទន្សាយ ដែលជាសាលារៀនមួយ ទទួលការថែទាំ និងបង្ហាត់បង្រៀន ទៅដល់កុមារអូទីហ្សឹម។
សាយ ជាសិល្បករម្នាក់តែងតែខ្នះខ្វែងក្នុងកិច្ចការសប្បុរសធម៌បង្កើតព្រឹត្តិការណ៍រត់ដើម្បីរៃអង្គាសប្រាក់ជូនទៅដល់មន្ទីរពេទ្យកុមារហើយសកម្មភាពរបស់លោកដក់ជាប់ក្នុងចិត្តមហាជនជានិច្ច។ ជាមួយគ្នានេះ បន្ទាប់ពីសកម្មភាពជួយដល់មន្ទីរពេទ្យសង្គ្រោះកុមារ ពេលនេះសាយ បានប្រកាសកម្មវិធីពិសេសថ្មីមួយទៀតដើម្បីជួយដល់សាលារៀនកុមារអូទីហ្សឹម។
តាមការប្រកាសរបស់ សាយ នាថ្ងៃទី១៩ ឧសភា បានឱ្យដឹងថា «ក្រុមការងារ Run With Sai រួមជាមួយ សហភាពសហព័ន្ធយុវជនកម្ពុជារាជធានីភ្នំពេញ និង សាលាទន្សាយ The Rabbit School សូមអនុញ្ញាត នាំមកជូននូវកម្មវិធីពិសេស មានឈ្មោះថា “រត់ដោយបេះដូង-RUN BY HEART” ក្នុងព្រឹត្តិការណ៍ “រត់ពីចម្ងាយជាមួយសាយ លើកទី ២ ឆ្នាំ ២០២៤” ជាប្រភេទកម្មវិធីរត់ពិសេស សម្រាប់អ្នកដែលបានបរិច្ចាគចាប់ពី ២០០,០០០រៀល/៥០ដុល្លារ ឡើងទៅ ដែលនឹងទទួលបានឱកាសក្នុងការអញ្ជើញជាភ្ញៀវកិត្តិយសចូលរួមរត់ជាក្រុម ជាមួយកុមារអូទីហ្សឹម ក្នុងរយៈចម្ងាយ ៤០០ ម៉ែត្រ នៅក្នុងបរិវេណតម្រាយផ្លូវរត់ក្នុងទីលានបាល់ទាត់ នៃពហុកីឡដ្ឋានជាតិអូឡាំពិក។ កម្មវិធីពិសេសនេះ ជាកម្មវិធីថ្មីមួយរៀបចំឡើងដោយមានបំណងក្នុងការរៃអង្គាសថវិកាបន្ថែម ជូនទៅកាន់សាលាទន្សាយ ដែលជាសាលារៀនមួយ ទទួលការថែទាំ និងបង្ហាត់បង្រៀន ទៅដល់កុមារអូទីហ្សឹម(Autism) មានទីតាំងនៅរាជធានីភ្នំពេញ»។
គួរបញ្ជាក់ថា កាលពីខែវិច្ឆិកា ឆ្នាំ២០២៣ សាយ បានរៀបចំព្រឹត្តិការណ៍ “ទីកែប រត់អបអរសាទរបុណ្យឯករាជ្យជាតិ” “KEP SEA-MOUNTAIN RUN” នៅខេត្តកែប ដើម្បីអបអរសាទរខួបអនុស្សាវរីយ៍ ៧០ឆ្នាំ បុណ្យឯករាជ្យជាតិ ៩ វិច្ឆិកា រំលឹកនូវគុណូបការៈ ដ៏ថ្លៃថ្លា ឧត្តុង្គឧត្តមរបស់សម្តេចតាក្នុងព្រះរាជបូជនីយកិច្ចទាមទារមកវិញ នូវឯករាជ្យពេញបរិបូរណ៌ ពីសំណាក់ អាណាព្យាបាលបារំាង៕
