អាហារ ៤ មុខដែលនារីកូរ៉េចូលចិត្តញ៉ាំដើម្បីថែសម្រស់ឱ្យក្មេងជាងវ័យ

ភាពស្រស់ស្អាតជាចំណុចពិសេសមួយដែលស្ត្រីគ្រប់រូបតែងតែប្រាថ្នាចង់បាន មិនថាទោះស្ថិតក្នុងវ័យក្មេង ឬចាស់នោះទេ។ ដូច្នេះដើម្បីទទួលបានភាពស្រស់ស្អាត សាច់ចាំ និងក្មេងជាងវ័យ នារីកូរ៉េភាគច្រើនតែងជ្រើសរើសរបបអាហារសុខភាពទាំងនេះ ព្រោះវានឹងជួយការពារភាពចាស់ ធ្វើឱ្យអ្នកមើលទៅស្រស់ស្អាតនិងទាក់ទាញជាងមុន ដែលអាហារទាំងនោះរួមមាន៖

១.ស្ពៃក្ដោប៖ ស្ពៃក្ដោបមានផ្ទុកនូវវីតាមីន C និងវីតាមីន K យ៉ាងច្រើន ជាពិសេសស្ពៃក្ដោបខ្ចីដែលមានប្រសិទ្ធភាពក្នុងការប្រឆាំងនឹងអុកស៊ីតកម្មខ្ពស់។ មិនតែប៉ុណ្ណោះ បន្លែប្រភេទនេះក៏មានផ្ទុកនូវសារធាតុ isothiocyanate ដែលរារាំងការលូតលាស់នៃដុំសាច់ផងដែរ។

២.ខ្ទឹមស៖ ខ្ទឹមសគឺជាគ្រឿងទេសដែលភាគច្រើនត្រូវបានគេប្រើប្រាស់សម្រាប់ចម្អិនម្ហូបអាហារ។ ខ្ទឹមសមានសមត្ថភាពក្នុងការពង្រឹងភាពធន់នៃរាងកាយ និងព្យាបាលជំងឺទូទៅដូចជាគ្រុនផ្ដាសាយជាដើម។ ជាមួយគ្នានេះ ខ្ទឹមសក៏មានផ្ទុកនូវសារធាតុប្រឆាំងអុកស៊ីតកម្ម Allincin ដែលប្រឆាំងភាពចាស់ផងដែរ។

៣.សណ្ដែកសៀង៖ សណ្តែកសៀងមានផ្ទុកសារធាតុ isoflavones ខ្ពស់ដែលមានលក្ខណៈសម្បត្តិប្រឆាំងនឹងការរលាក កម្ចាត់បាក់តេរី ប្រឆាំងអុកស៊ីតកម្ម និងពន្យឺតភាពចាស់។ លើសពីនេះ សណ្តែកសៀងក៏សម្បូរទៅដោយសារធាតុរ៉ែដូចជាម៉ាញេស្យូម កាល់ស្យូម ជាតិដែក ម៉ង់ហ្គាណែស សេលេញ៉ូម និងផូស្វ័រជាដើមដែលអាចជួយឱ្យឆ្អឹងរឹងមាំ។ នេះបើយោងតាមការស្រាវជ្រាវក៏បានបង្ហាញដែរថាការទទួលតៅហ៊ូ ឬផលិតផលធ្វើពីសណ្ដែកសៀងក៏អាចជួយឱ្យមានអារម្មណ៍ឆ្អែតបានយូរ និងកាត់បន្ថយការឡើងទម្ងន់ទៀតផង។

៤.ផ្លែបឺរី៖ នៅពេលមនុស្សកាន់តែចាស់ សមត្ថភាពក្នុងការប្រឆាំងនឹងរ៉ាឌីកាល់នឹងកាន់តែចុះខ្សោយ។ ជាមួយគ្នានេះ នារីកូរ៉េតែងនិយមទទួលទានផ្លែបឺរីដោយសារវាមានផ្ទុកនូវសារធាតុប្រឆាំងអុកស៊ីតកម្មខ្ពស់អាចជួយប្រឆាំងនឹងរ៉ាឌីកាល់សេរីដែលនឹងចូលមកបំផ្លាញកោសិកាស្បែករបស់យើង។ ជាមួយសារធាតុប្រឆាំងអុកស៊ីតកម្មដែលនៅក្នុងផ្លែបឺរីនេះផងដែរក៏មានសមត្ថភាពពន្យឺតភាពចាស់ ពង្រឹងសុខភាពស្បែក និងព្យាបាលរបួសផងដែរ៕