នៅពេលនិយាយពីការធ្វើដំណើររឿងមួយដែលអ្នកនឹងនឹកឃើញមុនគេនោះគឺការចំណាយ ជាការពិតណាស់ប្រសិនបើអ្នកចេញក្រៅគឺអ្នកត្រូវតែចំណាយលើផ្ទះសំណាក់ អាហារ ក៏ដូចជាការទិញសម្ភារៈប្រើប្រាស់មួយចំនួន ឬក៏វត្ថុអនុស្សាវរីយ៍ជាដើម ដែលធ្វើឱ្យអ្នកបាត់បង់ថវិការច្រើន។ ទោះជាយ៉ាងណាប្រសិនបើអ្នកមានពេលវេលាច្រើនក្នុងការធ្វើដំណើរបែបនេះ ក្នុងឱកាសដ៏ល្អនេះអ្នកក៏អាចឆ្លៀតរកលុយបានផងដែរ ដោយគ្រាន់តែអនុវត្តវិធីសាស្ត្រងាយៗសាមញ្ញៗដូចខាងក្រោម។
១.ធ្វើជាងថតរូប៖ ប្រសិនបើអ្នកមានជំនាញក្នុងការថតរូប ឬចូលចិត្តថតរូប ក្នុងឱកាសដើរកំសាន្តបែបនេះ អ្នកគួរយកកាមេរ៉ាមកជាមួយ ដើម្បីឆ្លៀតរកលុយពីការថតរូបឱ្យគេ ឬក៏អាចផ្តិតយករូបភាពស្អាតៗពីកន្លែងមួយចំនួនដែលអ្នកបានទៅ ដើម្បីយករូបភាពទាំងនោះមកលក់ជារូបភាព Stock ព្រោះបច្ចុប្បន្នការលក់រូបភាពតាមអ៊ីនធឺណិតកំពុងមានការពេញនិយមខ្លាំង ដោយជារៀងរាល់ថ្ងៃមានមនុស្សជាច្រើនបាននាំគ្នាទៅទិញរូបភាពស្អាតៗដើម្បីប្រើសម្រាប់អ្វីមួយ។ ទោះជាយ៉ាងណាប្រសិនបើអ្នកមានបំណងចង់លក់រូបថតតាមអ៊ីនធឺណិត អ្នកគួររៀនជំនាញថតរូបជាមុនសិន។
២.Youtuber ឬ Vlogger៖ ប្រសិនបើអ្នកមានឱកាសដើរកម្សាន្តច្រើនបែបនេះ យល់ល្អអ្នកគួររៀនថតវីដេអូ ឬធ្វើ Vlogger ដើម្បីបង្ហោះក្នុង Youtuber ឬបណ្តាញសង្គមផ្សេងៗ។ នៅពេលដែលអ្នកមានភាពល្បីល្បាញ នោះចំណូលរបស់អ្នកពីអ៊ីនធឺណិត នឹងជួយអ្នកកាត់បន្ថយការចំណាយផ្សេងៗរបស់អ្នកទោះបីអ្នកដើរកម្សាន្តប៉ុន្មានកន្លែងក៏ដោយ។
៣.យកវត្ថុផ្សេងៗទៅលក់៖ សព្វថ្ងៃនេះការលក់ទំនិញផ្សេងៗពីប្រទេស A ទៅប្រទេស B គឺជាមធ្យោបាយដ៏ពេញនិយមបំផុតក្នុងការរកប្រាក់ចំណូលពីទេសចរណ៍។ ក្នុងឱកាសដើរកម្សាន្តបែបនេះអ្នកអាចចំណាយលុយតិចតួចទិញរបស់របរមួយចំនួនពីបរទេស ដើម្បីយកលក់ក្នុងស្រុក ឬក៏យកទំនិញក្នុងស្រុកទៅលក់នៅបរទេសក៏បាន។ ទោះជាយ៉ាងណាប្រសិនបើអ្នកលក់ខ្នាតធំវាអាចចំណាយប្រាក់ច្រើនដែលតម្រូវឱ្យអ្នកបង់ពន្ធ ដូច្នេះយល់ល្អអ្នកគួរលក់ទំនិញតិចតួចបានហើយព្រោះមិនចាំបាច់បង់ពន្ធនៅអាកាសយានដ្ឋានទេ៕