យោងតាមការបង្ហោះពីគេហទំព័រ cambodia_streetwise កាលពីថ្ងៃទី ៨ ខែឧសភា ឆ្នំា២០២៤នេះ បានបង្អួតសម្រស់លោកយាយចំនួន២នាក់ ក្នុងឈុតប្រពៃណី ទម្រង់អប្សរាអាយុកាលរាប់ឆ្នាំរបស់ខ្មែរ បានយ៉ាងស្រស់ផូរផង់ និងកំពុងទាក់ទាញចំណាប់អាម្មណ៍ពីមហាជនគ្រប់ៗរូប សរសើរមិនដាច់ពីមាត់ពីភាពល្អឯក។ 
តាមរយៈការបង្ហោះខាងលើបានភ្ជាប់ជាមួយនឹងសារមួយឃ្លាដែលបានរៀបរាប់ថា« លោកយាយអប្សរា! លោកយាយម៉ៅ អាយុ១០៤ឆ្នំា និង លោកយាយរក្សា អាយុ ៧៩ឆ្នាំ នៅក្នុងឈុតប្រពៃណីអប្សរាខ្មែរ ដែលការផ្តិតយករូបភាពទាំងនេះនឹងស្ថិតជាប់នៅក្នុងក្រអៅបេះដូងយើងគ្រប់ៗរូប ជាការបង្ហាញពីភាពសប្បុរស ទន់ភ្លន់ តែមិនទន់ជ្រាយរបស់ស្រ្តីខ្មែរ។ នេះហើយគឺជាក្តីរំពឹងនៃការបានឃើញសម្រស់អប្សរាដ៏ស្រស់ស្អាតបំផុត ស្ទើរតែមិនធ្លាប់បានឃើញ»។
យោងការសិក្សាពីអត្ថបទអក្សរសិល្ប៍ ជាទូទៅ អប្សរា ត្រូវបានគេចាត់ថាជាស្រីសួគ៌ រស់នៅជាមួយព្រះឥន្ទ្រ។ ពួកគេត្រូវបានគេស្គាល់ដោយសារភារកិច្ចពិសេស៖ បញ្ជូនទៅផែនដីដោយព្រះឥន្ទ្រ ដើម្បីចែចង់ពួកឥសី ដែលអាចបង្កគ្រោះថ្នាក់ រឺអាចនឹងមានអំណាចខ្លាំងជាងព្រះឥន្ទ្រទៀត។ ឈុតឆាកមួយក្នុងរឿង “កុកាវិន អរជុនវិវាហ” នៃប្រពៃណីជ្វា បានលេងពីវគ្គមួយដែល អរជុន ដើម្បីឈ្នះយក្សនិវតកវច បានតាំងចិត្តធ្វើតប នៅពេលនោះព្រះឥន្ទ្របានបញ្ជូនអប្សរាមកចែចង់បំបែកកម្មដ្ឋានគាត់។ អរជុនបានឈ្នះកាមតណ្ហារបស់ខ្លួនឯង ក៏ទទួលបានពរពីព្រះជាម្ចាស់ ហើយក៏ធ្វើសង្គ្រាមឈ្នះយក្សនោះទៅ។
ម៉្យាងវិញទៀត អប្សរាក៏ជាផ្នែកដ៏សំខាន់មួយនៃចម្លាក់នានាលើប្រាសាទបុរាណខ្មែរ។ ចម្លាក់នៅលើប្រាសាទខ្មែរមានរូបស្ត្រីសួគ៌ពីរប្រភេទ៖រូបមួយបង្ហាញ ពីលក្ខណៈកំពុងតែរាំ រឺរៀបចំនឹងរាំ មានឈ្មោះថាអប្សរា និងមួយទៀតមានរូបភាពឈរនៅនឹងថ្កល់ មុខមើលទៅមុខ មានលក្ខណៈជាអ្នកការពារប្រាសាទ មានឈ្មោះថាទេវតា។
ចំពោះរបាំអប្សរាវិញ គឺជារបាំមួយក្នុងបណ្តារបាំព្រះរាជទ្រព្យឬរបាំក្បាច់បុរាណខ្មែរដែលត្រូវបានអង្គការយូណេស្កូទទួលចុះក្នុងបញ្ជីបេតិកភណ្ឌអរូបីនៃមនុស្សជាតិ កាលពីថ្ងៃទី០៣ ខែវិច្ឆិកា ឆ្នាំ២០០៣។ របាំនេះ និយមសម្តែងនៅពេលប្រារព្ធពិធីបុណ្យជាតិ បុណ្យសាសនាមហោស្រព សិល្បៈធំៗ និងពិធីទទួលភ្ញៀវជាតិ និងអន្តរជាតិផ្សេងៗផងដែរ៕
