ព្រឹត្តិការណ៍ Met Gala បានធ្វើឱ្យបណ្តាញសារព័ត៌មាន និងអ្នកគាំទ្រចាប់អារម្មណ៍ច្រើនជាងគេជាពិសេសពួកគេចង់ដឹងថាតើតារាល្បីៗរូបណាខ្លះបានចូលរួម និងមិនបានចូលរួមក្នុងកម្មវិធីប្រចាំឆ្នាំដ៏ធំសម្បើមនេះ។ សម្រាប់តារាចម្រៀងល្បីឈ្មោះ៣រូបគឺ Rihanna, Beyoncé និង Taylor Swift ដែលមានហ្វេនៗទន្ទឹមរង់ចាំថាពួកគេនឹងស្លៀកពាក់ប្លែកបែបណាចូលរួមក្នុងកម្មវិធីនេះត្រូវខកចិត្តហើយព្រោះអ្នកទាំង៣មិនបានចូលរួមនោះទេ។
ដំបូងឡើយអ្នកគាំទ្រនិងបណ្តាញសារព័ត៌មានមួយចំនួនទស្សន៍ទាយថា Taylor Swift អាចបណ្តើរមិត្តប្រុសរបស់ខ្លួនចូលរួមក្នុងកម្មវិធីនេះ ឬអាចទៅម្នាក់ឯងតែទីបំផុតអ្នកគាំទ្របានទទួលចម្លើយរបស់ពួកគេហើយកម្មវិធីនេះឆ្នាំនឹងគ្មានវត្តមានតារាចម្រៀងប៉ុបរូបនេះទេ។ 
អវត្តមានគួរឱ្យកត់សម្គាល់ផ្សេងទៀតពីកម្រាលព្រំក្រហមគឺតារាចម្រៀង Beyoncé ដែលមិនត្រូវបានគេរំពឹងថានឹងចូលរួម និងតារាចម្រៀង Rihanna ដែលហាក់ដូចជាបានត្រៀមខ្លួនបង្ហាញពីម៉ូតសំលៀកបំពាក់ប្រចាំឆ្នាំទៅហើយក៏គ្មានវត្តមានដូចគ្នា។
កាលពីឆ្នាំមុន Rihanna បានបង្ហាញខ្លួនជាមួយសំលៀកបំពាក់ដោយបានរុំផ្កាយ៉ាងមានភាពទាក់ទាញ។ តារាចម្រៀងវ័យ៣៦ឆ្នាំរូបនេះបានប្រាប់ទូរទស្សន៍ Extra TV កាលពីដើមសប្តាហ៍ថានាងមានគម្រោងចូលរួមព្រឹត្តិការណ៍នេះ ប៉ុន្តែទស្សនាវដ្ដី People បានរាយការណ៍ថា តារាចម្រៀងរូបនេះមានជំងឺផ្តាសាយ។
តារាចម្រៀងរូបនេះបានក្លាយជាវត្តមានដែលគេទន្ទឹងរង់ចាំយ៉ាងក្តៅគគុកបំផុតនៅព្រឹត្តិការណ៍ Met Gala។ អ្នកគាំទ្រជាច្រើនតាមអ៊ីនធឺណិតបាននិយាយថា អវត្តមាន Rihanna គឺជាបញ្ហាមួយ ខណៈមានរូបភាព AI លេចឡើងនៅលើប្រព័ន្ធអ៊ិនធឺណិត។ 
Rihanna មានវត្តមានញឹកញាប់នៅក្នុងកម្មវិធី gala ក្នុងប៉ុន្មានឆ្នាំថ្មីៗនេះ ប៉ុន្តែ Taylor Swift និង Beyoncé មិនបានចូលរួមតាំងពីឆ្នាំ ២០១៦ មកម្ល៉េះ។
Taylor Swift បានចាប់ផ្តើមចូលរួមព្រឹត្តិការណ៍នេះនៅឆ្នាំ២០០៨ និងជាសហប្រធាននៅក្នុងឆ្នាំ ២០១៦។ ក្នុងឆ្នាំកន្លងទៅនេះ នាងពិតជាមិនចាប់អារម្មណ៍ព្រឹត្តិការណ៍នេះទៀតទេ។
Beyoncé បានចូលរួមព្រឹត្តិការណ៍នេះចំនួន ៧ ដង ពីឆ្នាំ ២០០៨ ដល់ឆ្នាំ ២០១៦។ ទោះបីជាមិនបានបង្ហាញខ្លួនក្នុងកម្មវិធី Met Gala ក៏ Beyoncé កាន់អំណាចយ៉ាងសម្បើមនៅក្នុងវិស័យម៉ូតដដែល៕
