អស់រយៈពេលជាង១ខែមកហើយនៃបទអបអរចូលឆ្នាំថ្មីរបស់ វណ្ណដា មានចំណងជើងថា «សង្ក្រាន្តស្គាល់ស្នេហ៍»ដែលជាប្រភេទកន្រ្ទឹម HipHop មានការចូលរួមសម្តែងដោយស្រីស្អាតកូនកាត់បារាំង មាលា បន្តជាប់ Trending លេខ១នៅលើយូធូបប្រទេសកម្ពុជាគិតត្រឹមរសៀលថ្ងៃទី៧ ឧសភា ។ មកទល់ពេលនេះបទនេះមានការស្តាប់លើសពី១០លានដងនៅឆាណែលយូធូបរបស់ វណ្ណដា។
តារារ៉េបជួរមុខប្រចាំប្រទេសកម្ពុជា ម៉ាន់ វណ្ណដា បានទម្លាក់បទ «សង្ក្រាន្តស្គាល់ស្នេហ៍» កាលពីយប់ថ្ងៃទី៥ ខែមេសា ឆ្នាំ២០២៤ ដែល វណ្ណដា ជូនជាកាដូបុណ្យចូលឆ្នាំខ្មែរ។ បទនេះជា កន្រ្តឹមហ៊ីបហបហើយនៅក្នុង MV បានរំលេចនូវវប្បធម៌ទំនៀមទម្លាប់អត្តសញ្ញាណជាតិខ្មែរជាច្រើនដូចជាឧបករណ៍បុរាណខ្មែរ ក្រម៉ាខ្មែរ ខោចែវ បន្តោងខ្សែករូបអង្គរវត្ត វេចនំអន្សម ល្បែងប្រជាប្រិយខ្មែរ និងការជួបជុំគ្រួសារក្នុងឱកាសចូលឆ្នាំថ្មីប្រពៃណីជាតិខ្មែរ។ ជាពិសេស មួយបទនេះជំរុញឱ្យជាតិសាសន៍ដទៃកាន់តែស្គាល់ពីសង្ក្រាន្តខ្មែរបានកាន់តែច្រើន។
នៅពេលទម្លាក់បទនេះមិនត្រឹមតែមានការចាប់អារម្មណ៍ទៅលើបទចម្រៀងប៉ុណ្ណោះទេ ប៉ុន្តែតួស្រីដែលជាកូនកាត់បារាំងមានឈ្មោះថា មាលា ដែលបានសម្តែងជាមួយ វណ្ណដា ជាលើកដំបូងនេះបានបង្កឱ្យមានការចាប់អារម្មណ៍ពាសពេញបណ្តាញសង្គមដូចគ្នា។
«សង្ក្រាន្តស្គាល់ស្នេហ៍» ដែលបានទម្លាក់តាំងពីមុនចូលឆ្នាំខ្មែររហូតមកដល់រសៀលថ្ងៃទី៧ ឧសភា ពោលគឺរយៈពេលជាង១ខែហើយនៅបន្តជាប់លេខ១នៅលើតារាងយូធូបក្នុងស្រុកនៅឡើយមិនទាន់ធ្លាក់ចំណាត់កំពូលនោះទេ បើទោះបីជាបទនេះមិនផ្ទុះកក្រើកដូចជាបទកំលោះស្រុកខ្មែរ ក្តី។ គួរបញ្ជាក់ថាបទ វណ្ណដា មួយបទនេះមានការចូលស្តាប់លើសពី១០លានដងផងដែរ៕
