អ្នកលេងបណ្តាញសង្គមមានការចាប់អារម្មណ៍យ៉ាងខ្លាំងទៅលើគូស្នេហ៍ ស៊ីន យូប៊ីន និង ខាត់ វៃហាំង បានបង្ហាញភាពស្និទ្ធស្នាលជាមួយគ្នាឡើងវិញបន្ទាប់ពីខកខានបង្ហាញរូបភាពគូជាមួយគ្នា។ មិនត្រឹមតែប៉ុណ្ណោះតារាទាំងពីរដួងនេះថែមទាំង ដឹកដៃតារាសម្តែងថៃ Janie Tienphosuwan ទៅទស្សនាប្រាសាទអង្គរផងដែរ។
នៅថ្ងៃទី៧ ឧសភា នៅលើ Story របស់តារាជួរមុខ ស៊ីន យូប៊ីន បានបង្ហាញពីសកម្មភាពតារាថៃ Janie មកទស្សនាប្រាសាទអង្គរវត្តរបស់ប្រទេសកម្ពុជា ក្នុងនោះក៏មានតារាសម្តែង ខាត់ វៃហាំង ផងដែរ។ ងាកទៅកាន់តារាថៃរូបនេះវិញក៏បានបង្ហោះវីដេអូខ្លីនៅលើបណ្តាញសង្គមផ្ទាល់ខ្លួនដូចគ្នាដោយបានដាក់រូបEmoji រូបបេះដូង និងពស់ ជាមួយអក្សរខ្មែរថា «អង្គរវត្ត»។ នៅក្នុងវីដេអូគេបានឃើញតារាស្រីរូបនេះបានត្រងត្រាប់ស្តាប់យ៉ាងខ្លាំងនូវការអធិប្បាយរបស់មគ្គុទេសក៍ទេសចរណ៍។
វត្តមានរបស់តារាសម្តែងដ៏មានប្រជាប្រិយភាពមួយរូបរបស់ប្រទេសថៃមកទស្សនាប្រាសាទអង្គរវត្តនេះធ្វើឱ្យមានការចាប់អារម្មណ៍ទាំងអ្នកលេងបណ្តាញសង្គមខ្មែរ និងថៃ ។ គួរកត់សម្គាល់ថា តារាថៃ Janie ក៏បានមកចូលរួមកម្មវិធីមួយចំនួននៅប្រទេសកម្ពុជាផងដែរ។
ជាមួយនឹងការចាប់អារម្មណ៍តារាថៃរូបនេះ អ្នកគាំទ្រក៏ចាប់អារម្មណ៍ដូចគ្នាចំពោះ ស៊ីន យូប៊ីន និង ខាត់ វៃហាំង ដែលឃើញអ្នកទាំងពីរបានដើរកម្សាន្តជាមួយគ្នាម្តងទៀតបន្ទាប់ពីពួកគេស្ងប់ស្ងាត់មួយរយៈពេលកន្លងមកនេះ ពុំសូវឃើញមានការស្និទ្ធស្នាលគ្នាដូចមុនឡើយ។ នៅលើបណ្តាញសង្គម Instagram របស់ យូប៊ីន ក៏បានបង្ហាញពីសកម្មភាពជួយគាំទ្រ អាកោរត្នោតផងដែរ៕.png)
