ហ្វីលីពីន៖ ការិយាល័យឧតុនិយម ភូមិសាស្ត្រ និងតារាសាស្ត្រហ្វីលីពីន (PAGASA) បាននិយាយកាលពីថ្ងៃទី៣០ ខែមេសា ឆ្នាំ២០២៤ ថាសន្ទស្សន៍កំដៅនៅក្នុងប្រទេសហ្វីលីពីនអាចឈានដល់កម្រិត ៥៧ អង្សាសេដែលជាកម្រិតគ្រោះថ្នាក់ខ្លាំងបំផុតមិនធ្លាប់មាននៅក្នុងប្រទេសនេះ។
យោងតាមប្រភពព័ត៌មាន Philstar បានឱ្យដឹងថា កាលពីអំឡុងឆ្នាំ ២០២០ ប្រទេសនេះក៏ធ្លាប់បានកត់ត្រាសន្ទស្សន៍កំដៅ ៥៧ អង្សាសេដែរ នៅក្នុងទីក្រុង San Jose និងOccidental Mindoro។ ក្រៅពីទីក្រុង San Jose សន្ទស្សន៍កំដៅខ្ពស់បំផុតដែលត្រូវបានកត់ត្រាគឺនៅទីក្រុង Dagupan, Pangasinan គឺ ៥៥ អង្សាសេកាលពីថ្ងៃទី៩ ខែឧសភា ឆ្នាំ២០១៦។
បន្ទាប់មកនៅថ្ងៃទី ១៨ ខែឧសភា ឆ្នាំ២០២១ សន្ទស្សន៍កំដៅគឺ ៥៤ អង្សាសេនៅតំបន់ Aparri និង Cagayan នេះបើផ្អែកលើកំណត់ត្រារបស់ PAGASA ពីឆ្នាំ ២០១០ ដល់ឆ្នាំ ២០២៣។ លោក Meliton Guzman ដែលជាអ្នកទទួលខុសត្រូវនៃនាយកដ្ឋានវាយតម្លៃផលប៉ះពាល់របស់ PAGASA បាននិយាយថា នៅឆ្នាំ២០២៤ នេះសន្ទស្សន៍កំដៅអាចឡើងដល់ ៥៧ អង្សាសេបន្ទាប់ពី ៤៥ អង្សាសេត្រូវបានកត់ត្រានៅថ្ងៃទី ២១ ខែមេសា។
ទន្ទឹមនឹងនេះ តំបន់ជាង ៤០ នឹងជួបប្រទះសន្ទស្សន៍កំដៅកម្រិត “គ្រោះថ្នាក់” នៅថ្ងៃទី៣០ ខែមេសា ដោយសារ El Niño និងរដូវប្រាំងបន្តប៉ះពាល់ដល់ប្រទេសហ្វីលីពីន នេះបើយោងតាមការិយាល័យអាកាសធាតុរដ្ឋ។ យោងតាម PAGASA ទីក្រុងជាច្រើនរបស់ហ្វីលីពីននឹងជួបប្រទះនឹងកំដៅពី ៤០-៤៥ អង្សាសេ ហើយកំដៅនឹងបន្តរហូតដល់សប្តាហ៍ទីពីរនៃខែឧសភា។
ក្រុមប្រឹក្សាជាតិគ្រោះមហន្តរាយ និងកាត់បន្ថយហានិភ័យ (NDRRMC) នៃប្រទេសហ្វីលីពីនបាននិយាយនៅថ្ងៃទី ២៩ ខែមេសាថា South Cotabato គឺជាខេត្តទី ៧ ដែលប្រកាសស្ថានភាពនៃគ្រោះធម្មជាតិដោយសារ El Nino៕