មួយរយៈចុងក្រោយនេះ គេឃើញមានការគេសង្កេតឃើញថា នៅក្នុងប្រទេសកម្ពុជាមានអ្នកស្រឡាញ់ភេទដូចគ្នាមួយចំនួនបានសម្រេចរៀបការជាមួយគ្នាតាមគន្លងទំនៀមទម្លាប់ ប្រពៃណីខ្មែរដូចមនុស្សទូទៅ ខណៈការសម្រេចរៀបការរបស់ពួកគេ មិនទាន់មានច្បាប់នៅស្រុកខ្មែរណាមួយអនុញ្ញាតនៅឡើយទេ ដោយពួកគេច្រើនអនុម័តដោយឯងៗតែប៉ុណ្ណោះ។
ស្ថិតក្រោមច្បាប់ជាតិ និងច្បាប់អន្ដរជាតិ បុគ្គលគ្រប់រូប រាប់ទាំងមនុស្សស្រីស្រលាញ់ភេទដូចគ្នា មនុស្សប្រុស ស្រឡាញ់ភេទដូចគ្នា មនុស្សស្រឡាញ់ភេទពីរ និងមនុស្សប្តូរភេទ មានសិទ្ធិទទួលបានសិទិ្ធដូចបុគ្គលដទៃទៀតដែរ។
នៅក្នុងនោះ រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៣១ បានចែងថាប្រជាពលរដ្ឋខ្មែរគ្រប់រូបមាន ភាពសិទ្ធិស្មើគ្នាចំពោះមុខច្បាប់ មានសិទ្ធិសេរីភាព និងករណីយកិច្ចដូចគ្នាទាំងអស់ ដោយមិនគិតពីឋានៈសង្គម ឬភេទ ហើយពួកគេក៏មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។
បើយោងតាមប្រសាសន៍សម្តេចតេជោ ធ្លាប់បានលើកឡើងថា៖”កម្ពុជាយើងគ្មានការរើសអើង ចំពោះសហគមន៍អ្នកស្រឡាញ់ភេទដូចគ្នានោះទេ ហើយច្បាប់យើងក៏មិនបានហាមប្រាមមិនឱ្យស្រលាញ់ភេទដូចគ្នានោះដែរ តែនៅកម្ពុជាយើងក៏មិនមានច្បាប់អាពាហ៍ពិពាហ៍សម្រាប់អ្នកស្រឡាញ់ភេទដូចគ្នានោះទេ”។
ហេតុដូច្នេះពលរដ្ឋខ្មែរ គ្រប់រូបអាចមានសិទ្ធស្រលាញ់មនុស្សភេទដូចគ្នាបាន ដោយមិនត្រូវរងការរើសអើងនោះទេ ក៏ប៉ុន្តែក្រោយរៀបការរួច មិនអាចចុះអេតាសុីវិល ដើម្បីបានការទទួលស្គាល់ពីរដ្ឋបាននោះទេ៕