ប្រទេសថៃ៖ ប្រទេសថៃគ្រោងនឹងនាំចេញទុរេនចំនួន ១ លានតោន ដែលមានតម្លៃប្រហែល ១៣០ ពាន់លានបាត (ប្រមាណ ៣,៥៣ ពាន់លានដុល្លារអាមេរិក) នៅឆ្នាំនេះ ដោយភាគច្រើននឹងទៅទីផ្សារប្រទេសចិន។
យោងតាមសារព័ត៌មាន Thai PBS World ដែលបានចុះផ្សាយនៅថ្ងៃទី២០ ខែមេសា ឆ្នាំ២០២៤ ថាប្រទេសថៃគ្រោងនឹងដាក់ចេញនូវស្តង់ដារផលិតផលថ្មីសម្រាប់ការនាំចេញទុរេន ដើម្បីបង្កើនគុណភាព និងការប្រកួតប្រជែងទីផ្សារពិភពលោក។ ស្របតាមការណែនាំរបស់នាយករដ្ឋមន្ត្រី ស្រេតថា ថាវីស៊ីន ក្រសួងកសិកម្ម និងសហករណ៍មានភារកិច្ចរៀបចំសេចក្តីព្រាងច្បាប់ ដើម្បីទប់ស្កាត់ការលក់ទុរេនមិនទាន់ទុំ ឬមិនទាន់មានស្តង់ដារ ក្នុងគោលបំណងធ្វើឱ្យប្រសើរឡើងនូវគុណភាពផ្លែឈើ និងអាចយកឈ្នះក្នុងការប្រកួតប្រជែងនាំចេញ។
បន្ថែមពីលើការប្តេជ្ញាចិត្តរបស់ខ្លួនចំពោះគុណភាព និងស្ថិរភាពទីផ្សារ ថ្មីៗនេះប្រទេសថៃក៏បានចុះហត្ថលេខាលើអនុស្សរណៈយោគយល់គ្នាជាមួយប្រទេសចិន ដើម្បីលើកកម្ពស់ និងធានាតម្លៃស្ថិរភាពសម្រាប់ការនាំចេញផ្លែឈើត្រូពិចពីប្រទេសថៃទៅកាន់ប្រទេសចិន។ កិច្ចព្រមព្រៀងនេះនឹងជួយសម្រួលដល់ការនាំចូលទុរេន និងផ្លែមង្ឃុតប្រមាណ ២០,០០០ តោនដែលមានតម្លៃជាង ៣ ពាន់លានបាត (ប្រហែល ៨២.៤៤ លានដុល្លារអាមេរិក) ដោយប្រទេសចិនពីប្រទេសថៃចាប់ពីខែមេសាដល់ខែមិថុនាឆ្នាំនេះ។
កាលពីឆ្នាំមុន ប្រទេសថៃបាននាំចេញទុរេនចំនួន ៩០០,០០០ តោន ជាមួយនឹង ៣០០,០០០ តោន ប្រើប្រាស់ក្នុងស្រុក ហើយភាគច្រើនដែលនៅសល់ត្រូវបាននាំចេញទៅកាន់ប្រទេសចិន ដែលតម្រូវការផ្លែឈើកំពុងកើនឡើងយ៉ាងឆាប់រហ័ស។ ការព្យាករណ៍បង្ហាញថាតម្រូវការនៅក្នុងប្រទេសចិនអាចឈានដល់ ១ លានតោននៅឆ្នាំនេះ ហើយអាចកើនឡើង ១៥ ដងនាពេលអនាគត។ ដូច្នេះហើយការនាំចេញទុរេនបានបង្កើតប្រាក់ចំណូលបាន ១២០ ពាន់លានបាតកាលពីឆ្នាំមុន ដោយបានដើរតួនាទីយ៉ាងសំខាន់ក្នុងសេដ្ឋកិច្ចរបស់ប្រទេសថៃ នេះបើយោងតាមបាងកកប៉ុស្តិ៍។
ទោះជាយ៉ាងណាក៏ដោយ នៅឆ្នាំនេះរដូវទុរេនអាចប្រឈមនឹងឥទ្ធិពលនៃការប្រែប្រួលអាកាសធាតុដែលប៉ះពាល់ដល់ទិន្នផលពូជពិសេស។ ទោះបីជាមានបញ្ហាប្រឈមទាំងនេះក៏ដោយ ក៏មជ្ឈមណ្ឌលស្រាវជ្រាវ Kasikorn បានព្យាករណ៍ថា តម្លៃនៃការនាំចេញទុរេនរបស់ថៃទៅកាន់ប្រទេសចិននឹងកើនឡើងដល់ ៤.៥ ពាន់លានដុល្លារក្នុងឆ្នាំ ២០២៤ ដែលជាការកើនឡើង ១២% ពីឆ្នាំ ២០២៣ ខណៈប្រទេសថៃក៏មានគោលបំណងបង្កើនតម្លៃនៃការនាំចេញទុរេនរបស់ខ្លួនដល់ ១ ពាន់ពាន់លានបាតផងដែរ៕