រូបភាពមួយសន្លឹកពិតជាបង្កប់នូវគុណតម្លៃមិនអាចកាត់ថ្លៃបាន ដែលបានផ្សារភ្ជាប់រវាងមនុស្សទៅនឹងធម្មជាតិ បាននឹងកំពុងល្បីល្បាញទូទាំងពិភពលោក ដោយគេហទំព័រអន្តរជាតិធំៗជាច្រើនបានយកទៅចែករំលែកទូទាំងពិភពលោក អំពីអត្ថប្រយោជន៍នៃដើមឈើមួយដើមសោះ អាចផ្តល់ជាម្លប់ជ្រកយ៉ាងត្រជាក់ដល់មនុស្សរាប់រយនាក់។ រូបភាពនេះទៀតសោត គឺថតនៅលើទឹកដីនៃប្រទេសកម្ពុជា។
ជាការពិត ដើមឈើគឺជាដំណោះស្រាយដ៏ល្អបំផុតសម្រាប់គ្រោះធម្មជាតិ ដែលបាននឹងកំពុងគំរាមកំហែងដល់មនុស្សជាតិនិងសត្វទាំងបច្ចុប្បន្ននិងអនាគត។ គុណតម្លៃនៃដើមឈើនីមួយៗគឺជាប្រភពអុកស៊ីសែននៅគ្រប់ដង្ហើមរបស់មនុស្សគ្រប់ៗគ្នា។ វានឹងជួយស្រូបយកកាបូនឌីអុកស៊ីតចេញពីបរិយាកាស ជំនួសមកវិញដោយអុកស៊ីសែន។
បន្ថែមពីនេះ ដើមឈើនឹងជួយកាត់បន្ថយការបំពុលខ្យល់នៅក្នុងទីក្រុង ជាពិសេសគឺផ្សែងអាក្រក់ដែលបានមកពីឧស្សាហកម្មឬយាន្តជំនិះផ្សេងៗ និងទប់ស្កាត់ការបំភាយឧស្ម័នផ្ទះកញ្ចក់កាន់តែច្រើន។ វាក៏ជួយរក្សាលំនឹងដី ការពារការរអិលបាក់ដី និងជំនន់ទឹកភ្លៀងជាដើម។ កាន់ពិសេសជាងនេះទៅទៀត ដើមឈើគឺជាម្លប់ដ៏ត្រជាក់ ទប់ស្កាត់ពីកាំរស្មី UV ពីពន្លឺព្រះអាទិត្យយ៉ាងមានប្រសិទ្ធភាព។
យោងតាមការសិក្សាស្រាវជ្រាវ ដើមឈើដែលដាំដុះនៅជុំវិញអគារគឺអាចកាត់បន្ថយតម្រូវការម៉ាស៊ីនត្រជាក់បាន ៣០% ជាមួយនឹងម្លប់របស់វា ហើយអាចសន្សំសំចៃថាមពលបានពី ២០ ទៅ ៥០%។ ហើយសម្រាប់កម្រិតដែលវាជួយចាប់យកទឹកជំនន់វិញ វាត្រូវបានគេប៉ាន់ស្មានថាដើមឈើចាស់ទុំមួយអាចស្ទាក់ទឹកព្យុះប្រមាណ ១៣៩,០០០ លីត្រក្នុងមួយឆ្នាំ។ លើសពីនេះ ដើមឈើក៏មានអត្ថប្រយោជន៍សម្រាប់សុខភាពផងដែរ គឺធ្វើឱ្យយើងមានអារម្មណ៍ស្ងប់ រីករាយ និងមានសុខភាពល្អ៕