អាហារគឺជាប្រភពនៃថាមពល សព្វថ្ងៃនេះអាហារនៅក្នុងភោជនីយដ្ឋានគឺមានការពេញនិយមជាខ្លាំង ដោយសារអ្នកខ្លះរវល់មិនមានពេលចម្អិនអាហារដោយខ្លួនឯងទេ ដូច្នេះពួកគេក៏សម្រេចចិត្តទៅបរិភោគអាហារនៅក្នុងភោជនីយដ្ឋាន ក៏ដូចជាជួបជុំមិត្តភក្តិនៅទីនោះ។ ទោះជាយ៉ាងណាសម្រាប់អាហារនៅក្នុងភោជនីយដ្ឋានភាគច្រើនអាចមានភាពកខ្វក់កំឡុងពេលកែច្នៃ ដូច្នេះនៅពេលញ៉ាំអាហារនៅភោជនីយដ្ឋាន អ្នកគួរតែពិចារណាមុននឹងសម្រេចចិត្តកម្មង់ ដើម្បីជៀសវាងការឆ្លងបាក់តេរី។ ខាងក្រោមនេះគឺជាអាហារដែលអ្នកមិនគួរបរិភោគពេលទៅភោជនីយដ្ឋាន៖
១.ស្រាក្រឡុក៖ ភេសជ្ជៈដូចជាស្រាក្រឡុកនៅភោជនីយដ្ឋានច្រើនតែត្រូវបានតុបតែងដោយបំណែកផ្លែឈើឬស្លឹកឈើដើម្បីទាក់ទាញភ្នែក។ ទោះជាយ៉ាងណាក៏ដោយ យោងទៅតាមអ្នកជំនាញផ្នែកមីក្រូជីវសាស្រ្តជនជាតិកាណាដា Jason Tetro បានឱ្យដឹងថា ស្រាក្រឡុកងាយនឹងឆ្លងបាក់តេរីណាស់ ដោយសារការតុបតែងទាំងនេះភាគច្រើនត្រូវបានរក្សាទុកតែនៅសីតុណ្ហភាពបន្ទប់ ហើយត្រូវបានគ្រប់គ្រងជាបន្តបន្ទាប់ដោយមនុស្សជាច្រើន ដូច្នេះហានិភ័យនៃការប៉ះពាល់នឹងមេរោគគឺខ្ពស់ណាស់ ដែលវានឹងប៉ះពាល់ដល់ការរំលាយអាហារ រួមទាំងផ្លូវដង្ហើមជាដើម។
២.ទឹកផ្លែឈើ៖ នៅពេលចូលភោជនីយដ្ឋាន អ្នកមិនគួរជ្រើសរើសភេសជ្ជៈប្រភេទនេះទេ ព្រោះវាពិបាកក្នុងការកំណត់ថាវាត្រូវបានផលិតនៅពេលណា។ យោងតាមសាស្រ្តាចារ្យ Warriner ទឹកផ្លែឈើមានសុវត្ថិភាពតែនៅពេលដែលផលិតពីគ្រឿងផ្សំល្អ និងប្រើប្រាស់ក្នុងរយៈពេល ២៤ ម៉ោងប៉ុណ្ណោះ។ លើសពីនេះ ប្រសិនបើទឹកផ្លែឈើទុកនៅសីតុណ្ហភាពបន្ទប់លើសពី ៤ ម៉ោងវាអាចជាកន្លែងបង្កាត់បាក់តេរីដ៏គ្រោះថ្នាក់ចំពោះសុខភាព។៣.សណ្តែកបណ្តុះ៖ សណ្តែកបណ្តុះគឺគ្រឿងផ្សំដែលមានសុខភាពល្អ ប៉ុន្តែប្រសិនបើមិនបានគ្រប់គ្រងឱ្យបានត្រឹមត្រូវទេនោះ វាគឺជាកន្លែងបង្កាត់ពូជដ៏ល្អឥតខ្ចោះសម្រាប់បាក់តេរី។ វេជ្ជបណ្ឌិត Tetro បាននិយាយថា “ប្រសិនបើបាក់តេរីត្រូវបានរីករាលដាលកំឡុងពេលរៀបចំអាហារ ពួកគេនឹងបង្កើតភ្នាក់ងារបង្កជំងឺជាច្រើន” ។ លើសពីនេះ បរិយាកាសសម្រាប់សណ្តែកបណ្តុះគឺក្តៅ និងសើម ដែលងាយនឹងឆ្លងបាក់តេរីធម្មតាពីរប្រភេទគឺ Salmonella និង E.coli ។ ទន្ទឹមនឹងនេះកន្លែងដាំដុះសណ្តែកបណ្តុះជាច្រើនក៏បាញ់ថ្នាំជំរុញឱ្យប្រមូលផលបានលឿនផងដែរ ដែលធ្វើឱ្យអាហារងាយនឹងពុល។៤.អាហារប៊ូហ្វេ៖ នេះជាអាហារដ៏ល្អសម្រាប់គ្រួសារ នៅពេលដែលអ្នកអាចជ្រើសរើសមុខម្ហូបដោយសេរីក្នុងតម្លៃថេរ។ អាហារប៊ូហ្វេច្រើនតែត្រូវបានបម្រើយ៉ាងរហ័ស ប៉ុន្តែការព្រួយបារម្ភនោះគឺថាការរៀបចំអាហារមានភាពងាយស្រួលក្នុងការឆ្លងមេរោគ ប្រសិនបើអ្នកនៅតែចង់ញ៉ាំអាហារប៊ូហ្វេ ត្រូវប្រាកដថាអាហារត្រូវតែចម្អិនឱ្យបានឆ្អិនជានិច្ច៕