តារារ៉េបជួរមុខប្រចាំប្រទេសកម្ពុជា ម៉ាន់ វណ្ណដា បានទម្លាក់បទថ្មីមួយបទមានចំណងជើងថា «សង្ក្រាន្តស្គាល់ស្នេហ៍» ដែលជារសជាតិថ្មីជូនអ្នកគាំទ្រដោយសហការជាមួយភេសជ្ជៈកូកាកូឡា។ កន្រ្តឹមហ៊ីបហបនេះបានរំលេចនូវវប្បធម៌ទំនៀមទម្លាប់អត្តសញ្ញាណជាតិខ្មែរជាច្រើនដូចជាឧបករណ៍បុរាណខ្មែរ ក្រម៉ាខ្មែរ ខោចែវ បន្តោងខ្សែករូបអង្គរវត្ត វេចនំអន្សម ល្បែងប្រជាប្រិយខ្មែរ និងការជួបជុំគ្រួសារក្នុងឱកាសចូលឆ្នាំថ្មីប្រពៃណីជាតិខ្មែរ។ ជាពិសេស មួយបទនេះជំរុញឱ្យជាតិសាសន៍ដទៃកាន់តែស្គាល់ពីសង្ក្រាន្តខ្មែរបានកាន់តែច្រើន។
កាលពីយប់ថ្ងៃទី៥ ខែមេសា ឆ្នាំ២០២៤ វណ្ណដា ជូនកាដូឆ្នាំថ្មីមួយបទទៀតមានចំណងជើងថា «សង្ក្រាន្តស្គាល់ស្នេហ៍» បន្ទាប់ពីបទ «ក្រមុំស្រុកណា?» ដែលសហការជាមួយ នរិទ្ធ ។ ចម្រៀងទី២ដើម្បីអបអរបុណ្យចូលឆ្នាំថ្មីនេះទទួលបានការគាំទ្រខ្លាំងយ៉ាងលើសលប់គិតត្រឹមព្រឹកថ្ងៃទី៨ ខែមេសា បទ វណ្ណដា ឈរនៅចំណាត់ថ្នាក់ទី២ Trending លើយូធូបនៅប្រទេសកម្ពុជាមានការចូលស្តាប់ជាង១លានដង។
កន្រ្តឹមហ៊ីបហបរបស់ វណ្ណដា បានរំលេចនូវ វប្បធម៌ទំនៀមទម្លាប់ប្រពៃណីអត្តសញ្ញាណជាតិខ្មែរ ដោយក្បាលដំបូងនៃវីដេអូចម្រៀងបានបង្ហាញពីការធ្វើដំណើរទៅស្រុកកំណើតក្នុងខែចូលឆ្នាំ ជាមួយទិដ្ឋភាពស្រុកស្រែមានដើមឈើផ្សេងៗនិងដើមត្នោតផងដែរ។ នៅមុខផ្ទះមានការរៀបចំដាក់ក្រម៉ាខ្មែរតុបតែងលម្អគេហដ្ឋានចាំទទួលទេវតាឆ្នាំថ្មីនិងគោមផ្កាយដ៏ស្រស់ស្អាត។ មិនត្រឹមតែប៉ុណ្ណោះមួយបទនេះបានភ្ជាប់មកជាមួយរូបភាពផ្សេងៗទៀតដូចជា ទំនៀមទន្លាប់ខ្មែរមិនត្រឹមតែខែភ្ជុំប៉ុណ្ណោះទេដែលមានការវេចអន្សម ប៉ុន្តែនៅតាមទីជនបទស្រុកស្រែចម្ការខែចូលឆ្នាំក៏មានការវេចនំទុកហូបដូចគ្នា។
ងាកទៅកាន់ តារាចម្រៀងរ៉េប វណ្ណដា វិញបានស្លៀកពាក់ជាមួយខោចែវខ្មែរ រួមជាមួយក្រម៉ា និងបន្តោលខ្សែករូបប្រាសាទអង្គរវត្ត ជាពិសេស វណ្ណដា និងក្រម៉ាខ្មែរ នៅជាប់នឹងខ្លួនជានិច្ចយ៉ាធ្វើឱ្យមានការកោតសរសើរយ៉ាងខ្លាំង។
អ្វីដែលកាន់តែពិសេស បទ «សង្ក្រាន្តស្គាល់ស្នេហ៍» បានរំលេចល្បែងប្រជាប្រិយខ្មែរដូចជា លាក់កន្សែង វាយក្អម ស្វាដណ្តើមស្លឹកឈើ ចាប់កូនមាន់ គ្មានប្រទេសណាដែលមានល្បែងប្រជាប្រិយលេងសប្បាយដូចជាប្រទេសខ្មែរទេ។ ចង្វាក់ភ្លេងទៀតសោតបានរួមបញ្ជូល ចាប៉ី ខ្លុយខ្មែរ និងឧបករណ៍ផ្សេងទៀតដែលជាស្នាដៃដ៏ចំណានរបស់លោក វណ្ណថាន។
ចុងបញ្ចប់នៃចម្រៀងគឺការថតរូបជុំគ្រួសារដែលជាទិដ្ឋភាពពេញដោយស្នាមញញឹមមានសុភមង្គលនៅក្នុងជីវិត ព្រោះជាពេលវេលាមានន័យបំផុតនៅក្នុងគ្រួសារនីមួយៗបន្ទាប់ពីចាកចោលផ្ទះនិងបំពេញការងាររៀងៗខ្លួនបានមកជួបជុំសប្បាយរីករាយក្នុងឱកាសចូលឆ្នាំថ្មីនេះ៕