ឱកាសបុណ្យចូលឆ្នាំប្រពៃណីជាតិខ្មែរនឹងមកដល់នាពេលខាងមុខ ខណៈដែលប្រទេសក្បែរមួយចំនួនទៀតក៏បានប្រារព្ធពិធីបុណ្យចូលឆ្នាំរបស់ពួកគេដំណាលគ្នាដែរ។ ជាមួយគ្នានេះ ការលេងទឹកបាននឹងកំពុងទទួលបានប្រជាប្រិយភាពខ្លាំង ក្នុងចំណោមពលរដ្ឋទាំងប្រទេសកម្ពុជា ថៃ ឡាវជាដើម ជាពិសេសគឺក្រុមយុវជននិងយុវនារីសម័យថ្មី សម្រាប់ឱកាសដ៏ពិសេសនេះ។ ទោះជាយ៉ាងណា របៀបនៃការលេងទឹកនេះ មានទាំងការជះទឹក បាញ់ទឹក គប់ទឹក ជាដើម ដែលបានបង្កឲ្យមានការរិះ.គន់ជាហូរហែរក្នុងចំណោមមហាជនមួយចំនួន ថាបានលេងតាមប្រទេសជិតខាង។
វប្បធម៌នៃ«ការលេងជះទឹក»ក្នុងប្រទេសកម្ពុជា មានប្រវត្តិតាំងពីយូរលង់ណាស់មកហើយ ជាពិសេសទទួលបានការពេញនិយមខ្លាំងតាំងពីសម័យរាស្រ្តនិយមមកម្លេះ។ «ការលេងជះទឹក»ពីសម័យដើម គឺប្រកបដោយសេចក្ដីថ្លៃថ្នូរ ដែលពាក្យថា “ជះ” គឺជាការជះនៅភាពមិនល្អចេញទៅក្រៅ ឬ ជះភាពចង្រៃនៃឆ្នាំចាស់ចេញពីខ្លួនរបស់យើង ហើយពាក្យជះទឹកមិនដូចគ្នា និង ពាក្យបាញ់ទឹកនោះទេ ។ ការលេងជះទឹក ប្រកបដោយអត្ថន័យយ៉ាងស៊ីជម្រៅ ទឹកជាគ្រឿងមង្គល នៃសិរីទាំង៣ប្រការផងដែរ ពោលគឺ “ពេលព្រឹក លាងមុខ” “ពេលថ្ងៃ លាងទ្រូង” និង “ពេលល្ងាច លាងជើង”។
«ការលេងជះទឹក»តាមប្រពៃណីខ្មែរបុរាណមានដូចជា ទឹកមួយធុងមានផ្កា មានទឹកអប់ មានផ្ទឹល ឬ បោយទឹក ឬ ត្រឡោកដូង ដួសជះលើអ្នកដំណើរនៅតាមផ្លូវតូចៗ ក្នុងភូមិស្រុក ឬ សហគមន៍ ឬលេងតាមតំបន់ដែលកំណត់ឱ្យលេង ហើយការលេងជះទឹកនេះទៀតសោត គឺមិនគួរលេងតាមផ្លូវជាតិធំៗនោះទេ ព្រោះនាំឱ្យមានគ្រោះថ្នាក់ផ្សេងៗដោយចៃដន្យ។ 
ដោយឡែក «ការលេងបាញ់ទឹក» ដោយប្រើប្រាស់នូវកាំភ្លើងសម្រាប់បាញ់ទឹក មិនមែនជាប្រពៃណីខ្មែរពីដើមនោះទេ ដែលតាមការលើកឡើងវាទំនងជាមានប្រភពមកពីប្រទេសថៃ វៀតណាមជាដើមដែលនិយមលេងមុន ខណៈដែលការនិយមនៃលេងបាញ់ទឹកនេះក៏បានហូរចូលក្នុងប្រទេសកកម្ពុជាបច្ចុប្បន្នផងដែរ ដែលជាហេតុបណ្តាលឲ្យមហាជនមួយចំនួនយល់ច្រឡំថា «ការលេងទឹក» គឺជារបស់ប្រទេសជិតខាងអ្វីបែបនេះ។ ជាថ្នូរប្រឡប់មកវិញ «ការលេងជះទឹក» ជាប្រពៃណីខ្មែរបុរាណ ខណៈដែល «ការលេងបាញ់ទឹក» គឺជាលំហូរចូលពីបរទេស៕
