នៅក្នុងឱកាសខួបកំណើតរបស់ខ្លួន Lisa សមាជិក BLACKPINK នាងបានបង្ហោះវីដេអូ Vlog នៅលើឆាណែលយូធូបក្រុមហ៊ុនផ្ទាល់ខ្លួនរបស់នាងដោយបង្ហាញពីទិដ្ឋភាពផ្ទះរួមជាមួយឡានទំនើប។ អ្វីដែលកាន់តែចាប់អារម្មណ៍ផ្ទះផ្ទាល់ខ្លួនរបស់ Lisa នៅប្រទេសកូរ៉េនេះមានតម្លៃរាប់លានដុល្លារ ខណៈម្ចាស់ផ្ទះមុនជាគ្រួសារមហាសេដ្ឋីកូរ៉េ។
យោងតាម Chosun បានឱ្យដឹងថា Lisa បានទិញផ្ទះវីឡានៅសង្កាត់ Seongbuk-gu ទីក្រុងសេអ៊ូល នៅដើមឆ្នាំ២០២៣ ហើយម្ចាស់ផ្ទះមុនគឺជាគ្រួសារមហាសេដ្ឋីកូរ៉េ។ វីឡានេះមានបន្ទប់ក្រោមដី និងជាវីឡាពីរជាន់ ដែលលាបពណ៌ជាចម្បងដោយពណ៌ស និងពណ៌ប្រផេះ។ ក្រោយពីទិញរួច Lisa ក៏បានកែលម្អ និងរៀបចំផ្ទះវីឡាតាមការពេញចិត្តរបស់នាង ដោយនាងបាននិយាយថា នាងបានប្រឹងប្រែងយ៉ាងខ្លាំងក្នុងការតុបតែងផ្ទះនេះ។ ប្រភពដដែលបានបញ្ជាក់ថា ផ្ទះនេះមានតម្លៃ ៧.៥ពាន់លានវ៉ុន ប្រមាណជាង ៥.៥ លានដុល្លារអាម៉េរិក។ នៅចុងបញ្ចប់នៃវីដេអូ Lisa បានចុះទៅបន្ទប់ក្រោមដីដោយបង្ហាញពីឡានទំនើប Mercedes G63 Mansory ឯតម្លៃរថយន្តទំនើបនេះក៏មិនធម្មតាដូចគ្នា។
យោងតាម Yahoo នៅថ្ងៃខួបកំណើតអាយុ២៧ឆ្នាំ របស់នាងកាលពីថ្ងៃទី២៧ ខែមីនា នេះ Lisa បានថតវីដេអូបង្ហាញទស្សនិកជនខណៈអ្នកគាំទ្រសង្ឃឹមថានាងនឹងបានបង្ហាញពីរបៀបដែលនាងតុបតែងផ្ទះរបស់នាងទៅកាន់អ្នកគាំទ្រ។ មិត្តភ័ក្តិ និងបុគ្គលិករបស់ Lisa បានតុបតែងបន្ទប់ទទួលភ្ញៀវជាមួយនឹងប៉េងប៉ោងដើម្បីអបអរខួបកំណើតរបស់តារាចម្រៀងរូបនេះផងដែរ។
ក្នុងវីដេអូនោះ Lisa ក៏បានបង្ហាញរូបថតកាលពីកុមារភាពរបស់នាងថា ធ្លាប់ស្រមៃចង់ក្លាយជាអ្នកបម្រើការលើយន្តហោះ ប៉ុន្តែក្រោយមកបែរជាងប់ងល់នឹងការរាំ និងច្រៀង ហើយម្តាយរបស់នាងតែងតែនៅក្បែរនាងនិងលើកទឹកចិត្តជានិច្ច នឹងសង្ឃឹមថាខ្លួនជាស្ត្រីរឹងមាំដូចម្ដាយ។
Lisa បច្ចុប្បន្នជានាយកប្រតិបត្តិនៃក្រុមហ៊ុន LLOUD ដែលជាក្រុមហ៊ុនដែលនាងបានបង្កើត ប្រតិបត្តិការក្នុងវិស័យម៉ូត ភាពយន្ត និងតន្ត្រី។ ឆ្នាំនេះ ក្រៅពីវិស័យតន្រ្តី Lisa បានចូលប្រឡូកក្នុងវិស័យភាពយន្តហូលីវូដផងដែរ។ Lalisa Manoban ជាតារាចម្រៀង Kpop ដ៏មានឥទ្ធិពល មានអ្នកគាំទ្រយ៉ាងច្រើននៅលើ Instagram មានអ្នកចុច Follow ដល់ទៅជាង ១០០ លាននាក់៕