បញ្ហារង្វង់គ្រួសារលោកស្រី ទ្រី ដាណា និងលោក រស់ រាជ្ជសាល ស្ថិតក្នុងដំណាក់កាលមួយដែលមិនទាន់អាចផ្សះផ្សាគ្នាបាននៅឡើយនៅពេលនេះទោះបីជាលោក រស់ រាជ្ជសាល ចេញមុខទទួលស្គាល់កំហុស ខិតខំ Live លក់ផលិតផលយ៉ាងណាក៏ដោយ អ្នកទាំងពីរនៅបន្តរក្សាគម្លាតគ្នាដដែល។ តាមលួងលោមប្រពន្ធជាច្រើនថ្ងៃមិនទាន់បានសម្រេចពេលនេះលោក រស់ រាជ្ជសាល ចេញសារថ្មីមួយទៀតសន្យាទៅកាន់លោកស្រី ទ្រី ដាណា ថាមិនឱ្យរឿងនេះកើតឡើងជាលើកទី២នោះទេដោយសង្ឃឹមថាអាចបន្តដំណើរទៅជាមួយទៀត។
នៅលើបណ្តាញសង្គមស្វាមីថៅកែពេជ្រ ទ្រី ដាណា បានរៀបរាប់នៅថ្ងៃទី២៨ ខែមីនា ឆ្នាំ២០២៤ នេះថា «បងដឹងថាមួយរយៈនេះអូនប្រហែលជាហត់ហើយ ត្រូវគិតច្រើនទៀត និងរងសំពាធគ្រប់បែបយ៉ាងពីមហាជន។ មិនថាខឹង ឬមិនខ្វល់ និយាយយ៉ាងណាក៏ដោយ បងមានតែពាក្យមួយឃ្លា គឺស្មោះត្រង់ ស្រលាញ់ដំបូងយ៉ាងណា ពេលនេះក៏ដូចគ្នា មិនដែលមានអារម្មណ៍ចង់កែប្រែសូម្បីម្ដង»។
លោក រស់ រាជ្ជសាល បន្តទៀតថា «រឿងកើតឡើងពីការបង្ហោះរបស់គ្រួសារខ្ញុំ នាំឱ្យមានការយល់ច្រឡំលើគាត់ច្រើន រិះគន់គាត់។ តាំងពីរៀបការរួច គាត់គិតសព្វគ្រប់ យកចិត្តទុកដាក់ និងជួយគ្រួសារបងប្អូនខ្ញុំបន្តបន្ទាប់។ គាត់មានមនោសញ្ចេតនា និងបារម្ភពីអ្នកជុំវិញខ្លួនណាស់ គោរពបងប្អូន និងម្ដាយរបស់ខ្ញុំ ហើយខ្ញុំក៏រំភើបចិត្តដូចគ្នាសម្រាប់ទង្វើគាត់។ បងសន្យាថា នឹងមិនអោយមានរឿងអស់នេះកើតឡើងទៀតទេ។ បារម្ភ និងគិតពីអូនគ្រប់ពេល សង្ឃឹមថាយើងអាចបន្តដំណើរទៅមុខទៀត រីករាយជាមួយគ្នា សប្បាយជាមួយគ្នា ព្រោះយើងនៅមានក្ដីស្រមៃច្រើនទៀត»។
ចាប់តាំងពីលោកស្រី ទ្រី ដាណា បង្ហាញភាពរង្គោះរង្គើជាមួយស្វាមីតាំងពីថ្ងៃទី២២ ខែមីនា មកទល់ពេលនេះ អ្នកទាំងពីរនៅមិនទាន់អាចផ្សះផ្សាគ្នាបាននោះទេ ខណៈអ្នកជំនួញទ្រី ដាណា ស្ថិតក្នុងការពិចារណាចំពោះទំនាក់ទំនងអាពាហ៍ពិពាហ៍មួយនេះ៕