ក្នុងអំឡុងពេលចូលរួមកម្មវិធីមួយនាពេលថ្មីៗនេះ កុយ អេនណា បានបង្ហើបថាការវិលមកកម្ពុជានេះនាងមានបំណងចង់ចូលរួមប្រកួត Miss Grand Cambodia 2024 ពិតៗ ប៉ុន្តែស្ថិតក្នុងដំណាក់កាលរង់ចាំអនុញ្ញាតពីស្ថាប័នជាមុនសិន ខណៈនាងបានស្នើសុំប្រកួតថ្មីជាច្រើនដង។ ជាមួយគ្នានេះ អេនណា ក៏បានលើកដៃស្នើសុំលោកស្រី អ៊ឹម សុគន្ធា ជួយបើកឱកាសឱ្យនាងផង។
កុយ អេនណា លំដាប់រងទី១ Miss Grand Cambodia2023 បានវិលត្រលប់មកកម្ពុជាវិញហើយបន្ទាប់ពីទៅដល់ទឹកដី នូវែលសេឡង់ (New Zealand) បានមួយរយៈពេលខ្លី។ គ្រាន់តែឈានជើងមកដល់មិនទាន់បានប៉ុន្មានផង បវរកញ្ញារូបនេះធ្វើឱ្យមានការចាប់អារម្មណ៍យ៉ាងខ្លាំងពីអ្នកគាំទ្រវិស័យបវរកញ្ញាដោយសារតែបានឃើញនាងបង្ហោះរូបស្ទាយថ្មីជាច្រើននិងដំរួយចង់ប្រលូកលើវិស័យនេះម្តងទៀត។
នាយប់ថ្ងៃទី១៩ ខែមីនា ស្រីស្អាត កុយ អេនណា បានចូលរួមកម្មវិធីមួយដោយបានផ្តល់បទសម្ភាសជាមួយអ្នកសារព័ត៌ក្នុងស្រុកក្នុងឱកាសនាងវិលមកកម្ពុជាម្តងទៀតបន្ទាប់ពីចាកចេញទៅក្រៅប្រទេស។ ក្នុងវីដេអូមួយ កុយ អេនណា បាននិយាយថា « និយាយឱ្យស្មោះត្រង់ចេញពីចិត្តទៅនាងនឹងវិលត្រលប់មកវិញនេះដោយមានចិត្តចង់ចូលរួមប្រកួត Miss Grand Cambodia 2024 ពិតៗតែនាងកំពុងតែមានការស្នើសុំទៅដល់ខាងស្ថាប័ន Miss Grand Cambodia ដោយបានលើកទៅជាច្រើនដងហើយ ប៉ុន្តែពេលនេះកំពុងតែស្ថិតនៅក្នុងការរង់ចាំពីស្ថាប័នផ្ទាល់ផងដែរក្នុងការបើកឱកាសឱ្យនាងអាចចូលរួមប្រកួតនៅក្នុងកម្មវិធីឆ្នាំនេះ។ ឆ្លៀតក្នុងឱកាសនេះ កុយ អេនណា បានលើកម្រាមដៃ១០សំណូមពរទៅកាន់លោកស្រី អ៊ឹម សុគន្ធា ND Miss Grand Cambodia ជួយបើកឱកាសឱ្យនាងផងដែរ។
គួរបញ្ជាក់ផងដែរថា ការប្រកួតឆ្នាំមុន កុយ អេនណា ឆក់បានប្រជាប្រិយភាពយ៉ាងខ្លាំងពីទស្សនិកជនទោះបីជាជាប់លំដាប់រងទី១ក្តី។ លើសពីនេះ កុយ អេនណា ក៏ទទួលបានការចាប់អារម្មណ៍ពីលោក ណាវ៉ាត់ ដូចគ្នានិងបាននិយាយឱ្យ កុយ អេនណា វិលត្រលប់មកប្រកួតម្តងទៀត។ ប្រសិនជានាងអាចចូលរួមប្រកួតឆ្នាំនេះបានពិតមែនច្បាស់ណាស់ឆាក Miss Grand Cambodia 2024 នឹងកក្រើកជាក់ជាមិនខានព្រោះប្រមូលផ្តុំដោយជើងខ្លាំងជាច្រើនរូបចូលរួមប្រកួត៕
