យោងតាមរបាយការណ៍ផ្តាច់មុខពី Hankook Ilbo ថ្មីៗនេះ Jisoo សមាជិក BLACKPINK បានបរិច្ចាគប្រាក់ចំនេញទាំងអស់ដែលនាងរកបានពីឆាណែលយូធូបរបស់នាង ដល់អង្គការសប្បុរសធម៌ «Save the Children» ដែលនឹងប្រើប្រាស់ប្រាក់នេះដើម្បីបង្កើតព្រៃកោងកាងនៅតំបន់ Ca Mau ប្រទេសវៀតណាម។ បច្ចុប្បន្ននេះឆាណែលយូធូបផ្ទាល់ខ្លួនរបស់ Jisoo មានអ្នក Subscribe ជិត៥លាននាក់ (៤.៩៩លាន) ។
Jisoo បានបើកឆាណែលយូធូបរបស់នាងក្នុងខែមករា ឆ្នាំ២០២៣ ខណៈកាលពីមុនតារាស្រីរូបនេះក៏បានបង្ហាញពីចេតនារបស់នាងក្នុងការបរិច្ចាគប្រាក់ដែលរកបានពីយូធូបរបស់នាង ដោយចែករំលែកថា ប្រាក់នឹងត្រូវបរិច្ចាគទៅកាន់កន្លែងដែលត្រូវការវាច្រើនជាងនាង។ ថ្មីៗនេះ Jisoo ក៏បានបង្កើតក្រុមហ៊ុនផ្ទាល់ខ្លួនមានឈ្មោះថា BLISSOO សម្រាប់សកម្មភាពផ្ទាល់ខ្លួនផងដែរ។
សមាជិក BLACKPINK រូបនេះកំពុងមាញឹកយ៉ាងខ្លាំងនៅក្នុងអាជីពសិល្បៈទៅលើសកម្មភាពផ្ទាល់ខ្លួនដូចជាចូលរួមកម្មវិធី Fashion ថតរឿងថ្មីដែលមានតារាល្បីៗជាច្រើនដូចជា Lee Min Ho និង Ahn Hyo Seop ជាដើម។ ក្រៅពីនេះ តារាស្រីវ័យ២៨ឆ្នាំរូបនេះ បានផ្សព្វផ្សាយផលិតផលជាច្រើនទៀតក្នុងនាមជាទូតសុឆន្ទៈ។ Jisoo ធ្លាប់គ្រងតំណែងជាតួឯកស្រីក្នុងរឿងភាគទូរទស្សន៍មានចំណងជើងថា «Snowdrop» ដោយសហការជាមួយតារាសម្ដែង Jung Hae In ៕