រដ្ឋលេខាធិការក្រសួងកិច្ចការនារីជួយ រ៉ូស រហូតទទួលបានយុត្តិធម៌ក្រោយត្រូវគេស្ទាក់វាយបា.ក់ខ្ទង់ច្រមុះកាលពីជិត១ឆ្នាំមុន

លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី បានបញ្ជាក់នៅលើបណ្តាញសង្គមដោយពេលនេះ អាណារ៉ូស ទទួលបានពន្លឺយុត្តិធម៌ហើយបន្ទាប់ពីតុលាការភ្នំពេញសម្រេចផ្តន្ទាទោសជនដៃដល់១ក្រុមដែលព្រួតគ្នាវ៉ៃ រ៉ូស ឱ្យរងរបួសធ្ងន់ បាក់ខ្ទង់ច្រមុះនៅកណ្តាលក្រុងភ្នំពេញជិត១ឆ្នាំមកនេះឱ្យមានទោស១ឆ្នាំ ៦ខែ។ តាមសាលក្រមសម្រេចឱ្យជនដៃដល់ពីរនាក់រួមគ្នាសងសំណងខូចខាតជាប្រាក់ចំនួន៨ ០០០ដុល្លារ និងសងជំងឺចិត្ត ចំនួន១០លានរៀលទៅដល់ រ៉ូស ដោយការប្តឹងនេះរ៉ូស បានទាមទារចំនួន១០ម៉ឺនដុល្លារ។

នៅថ្ងៃទី១២ មីនា លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី បានបញ្ជាក់នៅលើបណ្តាញសង្គមថា «ក្រោយការទន្ទឹងចាំនិង១ថ្ងៃៗខល ផ្ញើសារមកខ្ញុំដើម្បីជួយក្នុងឋានៈជាចាស់ទុំ និងដង្ហោយរកយុត្តិធម៌! តុលាការភ្នំពេញសម្រេច ផ្តន្ទាទោសជនដៃដល់១ក្រុមដែលព្រួតគ្នាវ៉ៃរ៉ូសតារាចម្រៀង សម្តែង ឱ្យរងរបួសធ្ងន់ បាក់ខ្ទង់ច្រមុះ។ល។ (ស្ទាក់កាក់ឡានឱ្យឈប់ធាក់ទ្វារចូលវ៉ៃ មានវីដេអូ)នៅកណ្តាលក្រុងភ្នំពេញជិត១ឆ្នាំមកនេះ ឱ្យ មានទោស១ឆ្នាំ ៦ខែ ហើយរួមគ្នាសងជំងឺចិត្ត និងថ្លៃព្យាបាលដល់ជនរងគ្រោះ»។ លោកជំទាវ ថា «ជនដៃដល់កាច ពូកែជេបញ្ចោរតាមប្រព័ន្ធសង្គមប្រើពាក្យអាសអាភាសខ្លាំងណាស់មិនខ្លាចញញើតច្បាប់ឡើយ»។ ក្នុងនោះលោកជំទាវក៏បានចូលរួមអបអសាទរ រ៉ូស ដែលទទួលបានយុត្តិធម៌តាមផ្លូវច្បាប់ផងដែរ។

រដ្ឋលេខាធិការក្រសួងកិច្ចការនារីរូបនេះបានបង្ហោះនៅលើបណ្តាញសង្គមមួយទៀតថា«
សូមអរគុណមេធាវី សុវណ្ណដា តាមរយៈការស្នើរបស់ខ្ញុំជួយការពារក្តីដល់តារាចម្រៀង រ៉ូស ដែលជាជនរងគ្រោះដោយជន១ក្រុមស្ទាក់វ៉ៃបាក់ឆ្អឹងច្រមុះ ..កណ្តាលក្រុងភ្នំពេញ នៅចំណុចកោះពេជ្រ ដោយជោគជ័យ និងចូលរួមក្នុងកិច្ចការសង្គមជាច្រើន។ ជូនពរលោកមេធាវី មានសុខភាពល្អ កម្លាំងរឹងមាំ និងជោគជ័យគ្រប់ការងារ»។

តាមសាលក្រមរបស់សាលាដំបូងរាជធានីភ្នំពេញចុះថ្ងៃទី២៨ ខែកុម្ភៈ ឆ្នាំ២០២៤ ដើមបណ្តឹងរដ្ឋប្បវេណីឈ្មោះ ហាស់ វីរ៉ាស្រីរ័ត្ន ហៅ រ៉ូស បានប្តឹងទាមទារសំណងជាប្រាក់ចំនួន ១០០.០០០(ដប់ម៉ឺន)ដុល្លារអាម៉េរិក ដោយលើកឡើងពីមូលហេតុថា ក្រោយពីមានរបួសដែលបង្កឡើងដោយជនជាប់ចោទឈ្មោះ ស៊ូ ហ្គេចហៀក និង ឈ្មោះ ម៉េង លីហ័រ គឺខ្លួនបានចេញទៅព្យាបាលច្រមុះនៅប្រទេសថៃចំណាយអស់ប្រាក់ចំនួន ៨.០០០(ប្រាំបីពាន់)ដុល្លារហើយមូលហេតុដែលខ្លួនប្តឹងទាមទារសំណងដល់ទៅ ១០០.០០០(ដប់ម៉ឺន)ដុល្លារ ដោយសារតែអំពើប្រព្រឹត្តរបស់ជនជាប់ចោទទាំងពីរ ធ្វើឱ្យខ្លួនខាតបង់ពេលវេលា និងខូចកិត្តិយសខ្លួន យ៉ាងធ្ងន់ធ្ងរព្រោះខ្លួនជាតារាសម្តែង។ ការអះអាងរបស់ដើមបណ្តឹងរដ្ឋប្បវេណីថាបានចំណាយលើការធ្វើដំណើរ និង ព្យាបាលច្រមុះរបស់ខ្លួនអស់ប្រាក់ចំនួន ៨០០០(ប្រាំបីពាន់)ដុល្លារអាម៉េរិក ឃើញថាមានភស្តុតាងបញ្ជាក់ច្បាស់លាស់។

សាលក្រមបញ្ជាក់ទៀតថា ចំណែកការទាមទារសំណងជំងឺចិត្តជាប្រាក់ចំនួន ៩២ ០០០(ប្រាំបួនម៉ឺនពីរពាន់)ដុល្លារអាម៉េរិក ឃើញថាមានចំនួនច្រើនគប្បីបន្ថយមកនៅត្រឹមចំនួនមួយសមរម្យ។ សេចក្តីសម្រេចរបស់តុលាការគឺសម្រេចផ្តន្ទាទោសឈ្មោះ ស៊ូ ហ្គេចហៀក
និង ម៉េង លីហ័រ ដាក់ពន្ធនាគារក្នុងម្នាក់ៗកំណត់រយៈពេល ១(មួយ)ឆ្នាំ ៦(ប្រាំមួយ)ខែ។
ពីបទ : ហិង្សាដោយចេតនា ប្រព្រឹត្តនៅមុខផ្ទះលេខ F5-F6 ផ្លូវវីរៈជន ក្រុមទី៧ សង្កាត់ ទន្លេបាសាក់ ខណ្ឌចំការមនរាជធានីភ្នំពេញ កាលពីថ្ងៃទី៥ ខែសីហា ឆ្នាំ២០២៣ បទល្មើសព្រហ្មទណ្ឌដែលមានចែង និងផ្តន្ទាទោសតាមមាត្រា ២១៧នៃក្រមព្រហ្មទណ្ឌឆ្នាំ២០០៩។ ចំណុចទី២ បង្គាប់ឱ្យឈ្មោះ ស៊ូ ហ្គេចហៀក និងឈ្មោះ ម៉េង លីហ័រ រួមគ្នាសងសំណងការខូចខាតជាប្រាក់ចំនួន ៨ ០០០ដុល្លារ (ប្រាំបីពាន់)ដុល្លារ និងសំណងជំងឺចិត្តជាប្រាក់ចំនួន ១០.០០០.០០០(ដប់លាន) រៀល ទៅដើមបណ្តឹងរដ្ឋប្បវេណី ឈ្មោះ ហាស់ វីរ៉ាស្រីរ័ត្ន។ ការទាមទារសំណងដែលមានចំនួនលើសពីនេះបដិសេធចោល។

គូសបញ្ជាក់ថា ជនដែលបានបង្កហិង្សាចំពោះ រ៉ូស ត្រូវបានគេស្គាល់នៅលើបណ្តាញសង្គមឈ្មោះថា Yubee Ly ដោយមុននឹងមានរឿងនេះពួកគេបានបង្ហោះសារឆ្លើយឆ្លងឌឺដងគ្នាទៅវិញទៅមក៕