កញ្ញា រឿន ណាត ដែលជា Miss Universe Cambodia 2018 ត្រូវបានទស្សនិកជនចាត់ទុកថានាងជាបវរកញ្ញាម្នាក់ដែលធ្វើឱ្យវិស័យបវរកញ្ញាកម្ពុជាចាប់ផ្តើមមានសន្ទុះគាំទ្រពីមហាជនបើទោះបីជាការប្រកួតតំណាងប្រទេសកាលពីឆ្នាំនោះពុំទទួលបានលទ្ធផលជាទីគាប់ចិត្តក៏ដោយ។ ទន្ទឹមនឹងបង្ហាញវត្តមានក្នុងកម្មវិធី ទិវាវប្បធម៌ជាតិ ៣មីនា ក្រោមប្រធានបទ «យុវជនដើម្បីវប្បធម៌ជាតិ» ក្នុងការដើរម៉ូតសំលៀកបំពាក់ខ្មែរ រឿន ណាត ត្រូវបានហ្វេនសរសើរថានៅតែជាជើងឯកលេខ១ប្រចាំប្រទេសកម្ពុជា ប៉ុន្តែនាងបានតបវិញថាមិនហ៊ានទទួលយកពាក្យទាំងនេះទេ។
ក្រសួងវប្បធម៌ និងវិចិត្រសិល្បៈបានរៀបចំកម្មវិធី« រាត្រីសមោសរសំពត់បត់ខ្មែរ» ដែលប្រព្រឹត្តិទៅមានរយៈពេល ៣ថ្ងៃ ចាប់ពីថ្ងៃទី១ រហូតដល់ថ្ងៃទី៣ ខែមីនា ឆ្នាំ ២០២៤ នៅសាលសន្និសីទចតុម្មុខ។ កម្មវិធីនេះ ក៏មានការតាំងបង្ហាញ «ពិព័រណ៍សិប្បកម្មយើង» ដែលមានការចូលរួមបង្ហាញស្នាដៃផលិតផលសិប្បកម្មខ្មែរ ជាច្រើនមុខ រួមទាំងយប់ថ្ងៃទី២ មីនា កម្មវិធីនេះមានការដើរបង្ហាញម៉ូតពីសំលៀកបំពាក់ច្នៃពីសូត្រខ្មែរយ៉ាងស្រស់ស្អាតពីសិល្បការិនីជាច្រើនរូប រួមទាំងបង្ហាញពីសិល្បៈចម្រុះរបស់ខ្មែរជាច្រើនទៀត។
កញ្ញា រឿន ណាត បវរកញ្ញាចក្រវាលកម្ពុជា គឺបានបង្ហាញវត្តមានដើរម៉ូតមុនគេតែម្តងស្ថិតក្នុងសំលៀកបំពាក់ដ៏ស្រស់ស្អាតជាមុខមាត់ ដំណើរឥរិយាបថដ៏សមសួន។ មិនត្រឹមតែប៉ុណ្ណោះ រឿន ណាត ជាបវរកញ្ញាតែម្នាក់ដែលទទួលបានប័ណ្ណសរសើរកិត្តិយសពីសម្ដេចកិត្តិសង្គហបណ្ឌិត ម៉ែន សំអន ដោយផ្ទាល់ដែលធ្វើឱ្យរូបនាងរំភើបចិត្តយ៉ាងខ្លាំងព្រោះមិនបានដឹងមុននោះទេថានាងនឹងទទួលបាន។ជាមួយគ្នានេះផងដែរ តាមរយៈផេកមួយឈ្មោះថា Queen Pageant Kh បានកោតសរសើរចំៗទៅកាន់ រឿន ណាត ថា «និមិត្តរូបនៃចក្រវាលកម្ពុជា ឃើញល្អថាល្អឃើញអាក្រក់ថាអាក្រក់មិនចេះសម្ដែង មិនដែលខ្លាចអ្នកណាល្អលើសខ្លួន តែងតែរក្សានូវគុណតម្លៃរបស់ខ្លួនជានិច្ច Queen Rern Nat Miss Universe Cambodia 2018 នៅតែជាជើងឯកលេខ១ប្រចាំប្រទេសកម្ពុជាតាំងពីឆ្នាំ ២០១៨ រហូតមកដល់ ២០២៤»។
ឃើញការសរសើរដូចនេះ រឿន ណាត ស៊ែរការបង្ហោះភ្ជាប់ជាមួយពាក្យថា «មិនហ៊ានទទួលទេ»។ ជាមួយគ្នានេះផងដែរបវរកញ្ញារូបនេះបានបង្ហើបដែរថា នាងស្ងាត់មួយរយៈនេះព្រោះសម្ងំធ្វើអ្វីមួយដែលថ្មីសម្រាប់អ្នកគាំទ្រ៕