ទន្ទឹមនឹង ព្រះនាងតូច ជេនណា មានវត្តមាននៅក្នុងកម្មវិធីមួយនៅចិនហើយត្រូវបានផ្សព្វផ្សាយលើកញ្ចក់ទូរទស្សន៍ធំប្រចាំប្រទេសទ្រង់បាននាំយកបទចម្រៀងខ្មែរ របាំខ្មែរ រូបប្រាសាទអង្គរវត្ត សំលៀកបំពាក់ប្រពៃណីជាដើម។ អ្វីដែលធ្វើឱ្យប្រជាជនកម្ពុជាផ្ទុះការសរសើរព្រះនាងតូចកាន់តែខ្លាំងភ្លូកទឹកភ្លូកដីនោះបន្ទាប់ពីទ្រង់បានបង្រៀនពលរដ្ឋចិនពីក្បាច់ដៃក្នុងការរាំរបាំខ្មែរ ដោយបញ្ជាក់អត្ថន័យស៊ីជម្រៅរាល់ចង្វាក់នីមួយៗ។
ក្បាច់ដៃ មានសារៈសំខាន់ខ្លាំងណាស់ក្នុងរបាំបុរាណខ្មែរទៅតាមរបៀបនៃម្រាមដៃ ដោយបង្ហាញពីអត្តន័យខុសៗគ្នានៃកាយវិការទាំងនោះ។ ក្បាច់ដៃខ្លះតំណាងឱ្យផ្កា ឬផ្លែ រួមទាំងអត្ថន័យផ្សេងៗទៀត។ កាយវិការដ៏រស់រវើកនៃក្បាច់របាំបុរាណនេះត្រូវបានព្រះនាងនរោត្តម ជេនណា នាំយកទៅបង្ហាញនិងបង្រៀនពលរដ្ឋចិនក្នុងកម្មវិធី « A World of Great Harmony » របស់ទូរទស្សន៍ CCTV 1 ដែលជាបណ្តាញផ្សព្វផ្សាយដ៏ធំរបស់ប្រទេសចិន។
ព្រះនាងតូច បានបង្ហាត់បង្ហាញក្បាច់ដៃពីរបាំបុរាណខ្មែរដោយក្បាច់ចង្អុល ដោយទ្រង់ប្រើដៃឆ្វេងយកម្រាមចង្អុលដៃចង្អុលទៅមុខរួចយកម្រាមទាំងបី មកផ្ទប់ជាមួយមេដៃមានន័យថាចង្អុលជិតចង្អុលឆ្ងាយបើប្រៀបធៀបជាមួយរុក្ខជាតិមានន័យថាលាស់ត្រួយ ដែលកើតពីការដាំដុះមក។ ចំណែកឯក្បាច់លា គឺយកម្រាមដៃទាំងបួនលាហើយយកមេដៃចង្អុលមកមុខ ដើម្បីជាសោភ័ណហើយជាតំណាងឱ្យស្លឹក។ ក្បាច់ជីប ព្រះនាងទ្រង់យកមេដៃ និងចង្អុលដៃផ្គុំគ្នារួចម្រាមដៃទាំងបីទៀតដាក់លាទៅមុខបញ្រ្ចាស់គ្នាដែលមានន័យថាក្បាច់ផ្កា ផ្ការីកឬផ្កាក្រពុំ។ រីឯក្បាច់ផ្លែ គឺយកមេដៃ និងម្រាមដៃកណ្ដាលផ្គុំគ្នារួចលាម្រាមដៃទាំងបីទៅមុខហើយផ្កាប់ដៃទៅមុខឡើងលើ និងក្បាច់ជ្រុះ ត្រូវយកមេដៃ និងម្រាមដៃកណ្ដាលផ្គុំគ្នារួចលាម្រាមដៃទាំងបីទៅមុខហើយផ្ងាដៃឡើងមកលើវិញ។
បន្ទាប់ពីបង្ហាញនិងបញ្ជាក់ពីអត្ថន័យនៃការរាំរបាំបុរាណខ្មែរ ព្រះនាង នរោត្តម ជេនណា ក៏បង្ហាញថាសកម្មភាពទាំងនោះនឹងវិលចុះវិលឡើងជាថ្មីម្តងទៀត ខណៈពលរដ្ឋចិន ក៏បង្ហាញពីអារម្មណ៍រំភើបនៃរបាំខ្មែរ និងនាំគ្នាធ្វើដៃហាត់រាំតាមព្រះនាងផងដែរ។
ក្រោយពីមានឱកាសចូលរួមកម្មវិធីដ៏ធំនេះព្រះនាងបានរៀបរាប់ពីព្រះទ័យទ្រង់ថា«ខ្ញុំមានមោទកភាពណាស់ ដែលបានបង្ហាញវត្តមានក្នុងឆាកទូរទស្សន៍ @CCTV 1 ដ៏ធំនៅសាធារណរដ្ឋប្រជាមានិតចិន ក្នុងសម្លៀកបំពាក់ប្រពៃណីខ្មែរ និងបកស្រាយចម្រៀងខ្មែរបទ មាគ៌ាអង្គរ ដោយមានការរាំរបាំដ៏ពិសេសអស្ចារ្យពីសាលារបាំនរោត្តមបុប្ផាទេវី ក្រោមព្រះកិច្ចដឹកនាំរបស់ព្រះអង្គម្ចាស់ ស៊ីសុវត្ថិ តេសូ។ ទន្ទឹមនិងនេះ ខ្ញុំក៏បានបកស្រាយចម្រៀងជាភាសាចិនជាមួយកុមារាកុមារីជនជាតិចិនដ៏ឆ្លាតវៃ និងស្អាតៗផងដែរ»៕
